પૈપ્પલાદ-સંહિતા · અધ્યાય 9.3

આપઃ પુનન્તુ વરુણઃ પુનાત્વ્
અયં ચ યઃ પવતે વિશ્વદાનીમ્ ।
યજ્ઞો ભગો અધિવક્તા વિધર્તા-
-અગ્નિશ્ ચ નઃ પાવયેતાં સૂર્યશ્ ચ ॥

દશશીર્ષો દશજિહ્વ
આ રભે વીરકો ભિષક્ ।
મા તે રિષં ખનિતા
યસ્મૈ ચ ત્વા ખનામસિ ॥

દશરાત્રે કિલાસસ્ય
વીરુધા વેદ ભેષજમ્ ।
ઇતસ્ તદ્ અભ્રિયાખનં
કિલાસં નાશયામિ તે ॥

અપ્સ્વ્ અન્યા વિ રોહતિ
ધન્વન્ય્ અન્યાધિ તિષ્ઠતિ ।
કિલાસમ્ અન્યાનીનશદ્
વર્ચસાન્યા સમ્ ઉક્ષતુ ॥

આજ્યેન ઘૃતેન
જુહોમિ કિલાસભેષજમ્ ।
વીરુધામ્ અગ્નેઃ સઙ્કાશે
કિલાસં નાનુ વિદ્યતે ॥

પિશઙ્ગરૂપો ભવતિ
કલ્માષમ્ ઉત સંદૃશિ ।
કિલાસ નશ્યેતઃ પરઃ
પ્ર ત્વા ધક્ષ્યામિ વીરુધા ॥

યાનિ પૃથગ્ ઉત્પતન્તિ
નક્ષત્રાણીવ સંદૃશિ ।
કિલાસં સર્વં નાશયન્ન્
ઓઘ ઇવાભ્ય્ એમિ વીરુધા ॥

યદિ વા પુરુષેષિતાત્
કિલાસ પર્યાજગન્ ।
નમો નમસ્યામો દેવાન્
પ્રત્યક્ કર્તારમ્ ઋચ્છતુ ॥

શીર્ષ્ણસ્ તે સ્કન્ધેભ્યો
લલાટાત્ પરિ કર્ણયોઃ ।
ઓષધ્યા વર્ષજૂતયા
કિલાસં નાશયામિ તે ।
સ્વસ્ ત્વા વર્ણ આયત્ય્
અનરાતિઃ સહૌષધિઃ ॥

ગ્રીવાભ્યસ્ ત ઉષ્ણિહાભ્યઃ
કીકસાભ્યો અનૂક્યાત્ ।
(…) ॥

અંસાભ્યાં તે દોર્ભ્યાં
બાહુભ્યાં પરિ હસ્તયોઃ ।
(…) ॥

પૃષ્ટિભ્યસ્ તે પાર્શ્વાભ્યાં
શ્રોણિભ્યાં પરિ ભંસસઃ ।
(…) ॥

ઊરુભ્યાં તે ઽષ્ઠીવદ્ભ્યાં
પાર્ષ્ણિભ્યાં પ્રપદાભ્યામ્ ।
ઓષધ્યા વર્ષજૂતયા
કિલાસં નાશયામિ તે ।
સ્વસ્ ત્વા વર્ણ આયત્ય્
અનરાતિઃ સહૌષધિઃ ॥