પૈપ્પલાદ-સંહિતા · અધ્યાય 6.4

રાત્રી માતા નભઃ પિતા-
-અર્યમા તે પિતામહઃ ।
શિલાચી નામ વા અસિ
સા દેવાનામ્ અસિ સ્વસા ॥

યસ્ ત્વા પિબતિ જીવતિ
ત્રાયસે પુરુષં ત્વમ્ ।
ધર્ત્રી ચ શશ્વતામ્ અસિ
શશ્વતાં ચ ન્યઞ્ચની ॥

યદ્ દણ્ડેન યદ્ ઇષ્વા
યદ્ અરુર્ હરસા કૃતમ્ ।
તસ્ય ત્વમ્ અસિ ભેષજી
નિષ્કૃતિર્ નામ વા અસિ ॥

ભદ્રા પ્લક્ષે નિ તિષ્ઠસ્ય્
અશ્વત્થે ખદિરે ધવે ।
ભદ્રા ન્યગ્રોધે પર્ણે
સા ન એહ્ય્ અરુન્ધતિ ॥

વૃક્ષંવૃક્ષમ્ આ રોહસિ
વૃષણ્યન્તીવ કન્યલા ।
જયન્તી પ્રત્યાતિષ્ઠન્તી
સંજયા નામ વા અસિ ॥

હિરણ્યવર્ણે યુવતે
શુષ્મે લોમશવક્ષણે ।
અપામ્ અસિ સ્વસા લાક્ષે
વાતો હાત્મા બભૂવ તે ॥

હિરણ્યબાહો સુભગે
સૂર્યવર્ણે વપુષ્ટમે ।
રુતં ગચ્છતિ નિષ્કૃતિઃ
સેમં નિષ્કૃધિ પૂરુષમ્ ॥

ઘૃતાચી નામ કાનીનો
ઽજબભ્રુ પિતા તવ ।
અશ્વો યમસ્ય યઃ શ્યાવસ્
તસ્ય હાસ્નાસ્ય્ ઉક્ષિતા ॥

અશ્વસ્યાસ્નઃ સંપતિતા
સા પર્ણમ્ અભિ ષિષ્યદઃ ।
સરા પતત્રિણ્ય્ અસિ
સા ન એહ્ય્ અરુન્ધતિ ॥

ઘૃતાચિકે વાતરથે
વિદ્યુત્પર્ણે અરુન્ધતિ ।
આતુરં ગમિષ્ઠાસિ
ત્વમ્ અઙ્ગ નિષ્કરીયસી ॥

યત્ તે જગ્ધં પિશાચૈસ્
તત્ ત આ પ્યાયતાં પુનઃ ।
લાક્ષા ત્વા વિશ્વભેષજી
દેવેભિસ્ ત્રાયતાં સહ ॥