પૈપ્પલાદ-સંહિતા · અધ્યાય 5.30

પયસ્વતીર્ ઓષધયઃ
પયસ્વન્ મામકં વચઃ ।
અથો પયસ્વતાં પય
આ હરામિ સહસ્રશઃ ॥

અહં વેદ યથા પયશ્
ચકાર ધાન્યં બહુ ।
સંભૃત્વા નામા યો દેવસ્
તં વયં યજામહે
સર્વસ્યાયજ્વનો ગૃહે ॥

યથા દ્યૌશ્ ચ પૃથિવી ચ
તસ્થતુર્ ધરુણાય કમ્ ।
એવા સ્ફાતિં નિ તનોમિ
મયારેષુ ખલેષુ ચ ॥

યથા કૂપઃ શતધારઃ
સહસ્રધારો અક્ષિતઃ ।
એવા મે અસ્તુ ધાન્યં
સહસ્રધારમ્ અક્ષિતમ્ ॥

શતહસ્ત સમાહર
સહસ્રહસ્ત સં કિર ।
યથેહ સ્ફાતિર્ આયતિ
કૃતસ્ય કાર્યસ્ય ચ ॥

ઇમા યાઃ પઞ્ચ પ્રદિશો
માનવીઃ પઞ્ચ કૃષ્ટયઃ ।
સર્વાઃ શંભૂર્ મયોભુવો
વૃષ્ટે શાપં નદીર્ ઇવ-
-ઇહ સ્ફાતિં સમાવહાન્ ॥

ઇહ સ્ફાતિર્ ઓષધીનાં
દેવાનામ્ ઉત સંગમઃ ।
ઇહૈવાશ્વિનોર્ અસ્તુ
દ્વાપરાશ્વો રુહત્ ॥

તિસ્રો માત્રા ગન્ધર્વાણાં
ચતસ્રો ગૃહપત્ન્યાઃ ।
તાસાં યા સ્ફાતિર્ ઉત્તમા
તયા ત્વાભિ મૃશામસિ ॥

જ્યેષ્ઠસ્ય ત્વાઙ્ગિરસસ્ય
હસ્તાભ્યામ્ આ રભામહે ।
યથાસદ્ બહુધાન્યમ્
અયક્ષ્મં બહુપૂરુષમ્ ॥