પૈપ્પલાદ-સંહિતા · અધ્યાય 5.3

ઉદ્ અપપ્તદ્ અસૌ સૂર્યઃ
પુરુદૃષ્ટો અદૃષ્ટહા ।
ઉદાયન્ રશ્મિભિર્ હન્તુ -
-ઉદાયન્ન્ અરસાઁ અકઃ ॥

ન્ય્ અમ્રુચદ્ અસૌ સૂર્યો
વિશ્વદૃષ્ટો અદૃષ્ટહા ।
નિમ્રોચન્ રશ્મિભિર્ હન્તુ
નિમ્રોચન્ન્ અરસાઁ અકઃ ॥

યે ચ દૃષ્ટા યે ચાદૃષ્ટા
ઉભયેહાવિષ્યવઃ ।
તેષાં વો અગ્રભં નામ
સર્વે સાકં નિ જસ્યત ॥

અદૃષ્ટહનની વીરુદ્
અમિતૌજા વિષાસહિ ।
ચુકાકણિ ત્વં જજ્ઞિષે
સાદૃષ્ટાઞ્ જાતશો જહિ ॥

જહિ જ્યેષ્ઠમ્ અદૃષ્ટાનાં
સર્પાણાં મોઘચારિણામ્ ।
ક્રિમીણાં સર્વા જાતાનિ
?પૌઞ્જષ્ટ ઇવ યવં મૃણ ॥

યશ્ ચ તોદો યશ્ ચ સર્પ
એકાદશશ્ ચ યો વૃષા ।
ચુકાકણિ ત્વં તાન્ વૃશ્ચ
વૃક્ષં પરશુમાન્ ઇવ ॥

સં વૃશ્ચૈનાંશ્ ચુકાકણિ
વૃક્ષં પરશુમાન્ ઇવ ।
ક્રિમીણાં સર્વા જાતાનિ
સં દહાગ્નિર્ ઇવોલપમ્ ॥

મેથિષ્ઠા અગ્નિર્ અઘલસ્ ત્વિષીમાન્
ક્રિમીણાં જાતાનિ પ્ર દુનોતુ સર્વા ।
બૃહસ્પતેર્ મેદિને જાતવેદા
અદૃષ્ટાન્ હન્તુ દૃષદેવ માષાન્ ॥