પૈપ્પલાદ-સંહિતા · અધ્યાય 5.22

યૌ હેમન્તં સ્વાપયથો બલેન-
-અર્વાગ્ દેવેભ્ય ઉત યૌ પરો દિવઃ ।
ભવારુદ્રયોઃ સુમતિં વૃણીમહે
ઽન્યત્રાસ્મદ્ અઘવિષા વ્ય્ એતુ ॥

યો દ્યામ્ આતનોતિ યો ઽન્તરિક્ષં
સ્તભ્નાત્ય્ ઓજસો જાયમાનઃ ।
તસ્મૈ રુદ્રાય હવિષા વિધેમ-
-અન્યત્રાસ્મદ્ અઘવિષા વ્ય્ એતુ ॥

યયોર્ વધાન્ નાપપદ્યતે કિં ચન-
-અન્તર્ દેવેષૂત માનુષેષુ ।
તાભ્યાં રુદ્રાભ્યાં હવિષા વિધેમ-
-અન્યત્રાસ્મદ્ અઘવિષા વ્ય્ એતુ ॥

યાવ્ ઈશાતે પશૂનાં પાર્થિવાનાં
ચતુષ્પદામ્ ઉત વા યે દ્વિપાદઃ ।
તાભ્યાં રુદ્રાભ્યાં હવિષા વિધેમ-
-અન્યત્રાસ્મદ્ અઘવિષા વ્ય્ એતુ ॥

યસ્ય પ્રતિહિતાયાઃ સં વિશન્ત
આરણ્યાઃ પશવ ઉત ગ્રામ્યાસઃ ।
તસ્મૈ રુદ્રાય હવિષા વિધેમ-
-અન્યત્રાસ્મદ્ અઘવિષા વ્ય્ એતુ ॥

યસ્માદ્ ઓષધયો બર્ભ્રિયમાણા યન્તિ
યસ્માદ્ વૃક્ષાસો ન વિયન્તિ વિશ્વે ।
વયાંસિ યસ્માત્ પ્રચરન્તિ ભીષા
તસ્મૈ રુદ્રાય હવિષા વિધેમ-
-અન્યત્રાસ્મદ્ અઘવિષા વ્ય્ એતુ ॥

યઃ પર્વતાન્ વિદધે ઽતિ વિદ્વાન્
યો ભૂતાનિ કલ્પયતિ પ્રજાનન્ ।
તસ્મૈ રુદ્રાય હવિષા વિધેમ-
-અન્યત્રાસ્મદ્ અઘવિષા વ્ય્ એતુ ॥

યાવ્ ઈશાનૌ ચરતો
દ્વિપદો ઽસ્ય ચતુષ્પદઃ ।
યા ઉગ્રૌ ક્ષિપ્રધન્વાનૌ
તાભ્યાં રુદ્રાભ્યાં હવિષા વિધેમ-
-અન્યત્રાસ્મદ્ અઘવિષા વ્ય્ એતુ ॥

પુનશ્ ચક્ષુઃ પુનઃ પ્રાણં
પુનર્ આયુર્ ધેહિ નો જાતવેદઃ ।
રુદ્ર જલાષભેષજ
વિદ્વાંસસ્ ત એના હવિષા વિધેમ-
-અન્યત્રાસ્મદ્ અઘવિષા વ્ય્ એતુ ॥