પૈપ્પલાદ-સંહિતા · અધ્યાય 4.7

અક્ષીભ્યાં તે નાસિકાભ્યાં
કર્ણાભ્યામ્ આસ્યાદ્ ઉત ।
યક્ષ્મં શીર્ષણ્યં મસ્તિષ્કાલ્
લલાટાદ્ વિ વૃહામસિ ॥

ગ્રીવાભ્યસ્ ત ઉષ્ણિહાભ્યઃ
કીકસાભ્યો અનૂક્યાત્ ।
યક્ષ્મં દોષણ્યમ્ અંસાભ્યામ્
ઉરસ્તો વિ વૃહામસિ ॥

ક્લોમ્નસ્ તે હૃદય્યાભ્યો
હલીક્ષ્ણાત્ પાર્શ્વાભ્યામ્ ।
યક્ષ્મં મતસ્નાભ્યાં પ્લીહ્નો
યક્નસ્ તે વિ વૃહામસિ ॥

આન્ત્રેભ્યસ્ તે ગુદાભ્યો
વનિષ્ઠોર્ ઉદરાદ્ ઉત ।
યક્ષ્મં પાણ્યોર્ અઙ્ગુલિભ્યો
નખેભ્યો વિ વૃહામસિ ॥

અસ્થિભ્યસ્ તે માંસેભ્યઃ
સ્નાવભ્યો ધમનિભ્યઃ ।
યક્ષ્મં પૃષ્ટિભ્યો મજ્જભ્યો
નાભ્યા વિ વૃહામસિ ॥

ઊરુભ્યાં તે અષ્ઠીવદ્ભ્યાં
પાર્ષ્ણિભ્યાં પ્રપદાભ્યામ્ ।
યક્ષ્મં ભસદ્યં શ્રોણિભ્યાં
ભંસસો વિ વૃહામસિ ॥

અઙ્ગાદઙ્ગાલ્ લોમ્નોલોમ્નો
બદ્ધં પર્વણિપર્વણિ ।
યક્ષ્મં ત્વચસ્યં તે વયં
વિષ્વઞ્ચં વિ વૃહામસિ ॥

અઙ્ગાદાઙ્ગાદ્ અહં તવ
પરુષઃપરુષસ્ પરિ ।
કશ્યપસ્ય વિવૃહેણ
યક્ષ્મં તે વિ વૃહામસિ ॥