પૈપ્પલાદ-સંહિતા · અધ્યાય 4.26

કન્યા વાર્ અવાયતી
સોમમ્ અપિ સ્રુતાવિદત્ ।
અસ્તં ભરન્ત્ય્ અબ્રવીદ્
ઇન્દ્રાય સુનોમિ ત્વા
શક્રાય સુનોમિ ત્વા ॥

અસૌ ય એષિ વીરકો
ગૃહંગૃહં વિચાકશત્ ।
ઇમં જમ્ભસુતં પિબ
ધાનાવન્તં કરમ્ભિણમ્
અપૂપવન્તમ્ ઉક્થિનમ્ ॥

કુવિચ્ છકત્ કુવિત્ કરત્
કુવિન્ નો વસ્યસસ્ કરત્ ।
કુવિત્ પતિદ્વિષો યતીર્
ઇન્દ્રેણ સં ગમામહૈ ॥

આ ચન ત્વા ચિકિત્સામો
ઽધિ ચન ત્વા નેમસિ ।
શનૈર્ ઇવ શનકૈર્ ઇવ-
-ઇન્દ્રાયેન્દો પરિ સ્રવ ॥

ઇમાનિ ત્રીણિ વિષ્ટપા
તાનીન્દ્ર વિ રોહય ।
શિરસ્ તતસ્યોર્વરામ્
આદ્ ઇદં મ ઉપોદરે ॥

અસૌ ચ યા ન ઉર્વરા-
-આદ્ ઇમાં તન્વં મમ ।
અથો તતસ્ય યચ્ છિરઃ
સર્વા તા રોમશા કૃધિ ॥

ખે રથસ્ય ખે ઽનસઃ
ખે યુગસ્ય શતક્રતો ।
અપાલામ્ ઇન્દ્ર ત્રિષ્ પૂત્વ્ય્
અકૃણોઃ સૂર્યત્વચમ્ ॥