પૈપ્પલાદ-સંહિતા · અધ્યાય 20.9

ત્વિષિર્ અસિ ત્વિષિવન્તો ભૂયાસ્મ ।
ચક્ષુષ્મન્તો ગોમન્તઃ
પ્રજાવન્તો વર્ચસ્વિનઃ ॥

યદ્ અહ્ના સંચિનુથ
ક્ષીરં ભરથોધભિઃ ।
ઇદં તદ્ વિશ્વરૂપા વઃ
પયો હરામિ વીરુધા ॥

યદ્ અઘ્ન્યા ઓષધીભ્યો
ઽદ્ભ્યઃ સંભરથા મધુ ।
ઇદં તદ્ વિશ્વરૂપા વઃ
ક્ષીરં હરામ્ય્ ઓષધ્યા ॥

યો અભ્યવભૃણાયસિ
સ્વપન્તમ્ ઇચ્છ પૂરુષં
શયાનમ્ અકસ્વલમ્ ।
અયસ્મયેન વર્મણ્-
-આશ્મમયેન વર્મણા
પર્ય્ અસ્માન્ વરુણો દધત્ ॥

યે નો ગૃહે બ્રાહ્મણા મન્યમાના
ઘોરાં વાચં મિથુયાનુબ્રુવન્તિ ।
એનોહૃતો મલહૃતો ભવન્તુ
દુર્યોણમ્ અસ્મત્ પરિ તે હરન્તુ ॥

અયમ્ અગ્નિઃ સત્પતિર્ વૃદ્ધવૃષ્ણિયો
રથીવ પત્યૈ ન જનયત્ પુરોહિતઃ ।
નાભા પૃથિવ્યા નિહિતો દવિદ્યુતદ્
અધસ્પદં કૃણુતાં યે પૃતન્યવઃ ॥

અગ્ને શર્ધ મહતે સૌભગાય
તવ દ્યુમ્નાન્ય્ ઉત્તમાનિ સન્તુ ।
સં જાસ્પત્યં સુયમમ્ આ કૃણુષ્વ
શત્રૂયતામ્ અભિ તિષ્ઠા મહાંસિ ॥

દૃષ્ટો દમૂના અતિથિર્ દુરોણ
ઇમં નો યજ્ઞમ્ ઉપ યાહિ વિદ્વાન્ ।
વિશ્વા હ્ય્ અગ્ને અભિયુજો વિહત્ય
શત્રૂયતામ્ આ ભરા ભોજનાનિ ॥

અગ્ને સપત્નાન્ પ્ર ણુદસ્વ જાતાન્
પ્રત્ય્ અજાતાઞ્ જાતવેદો નુદસ્વ ।
અધિ નો બ્રૂહિ સુમનસ્યમાનઃ
શર્મ નો યચ્છ ત્રિવરૂથમ્ ઉદ્ભિત્ ॥

પ્રાન્યાન્ સપત્નાન્ સહસા સહસ્વ
પ્રત્ય્ અજાતાઞ્ જાતવેદઃ શૃણીહિ ।
ઇદં રાષ્ટ્રં પિપૃહિ સૌભગાય્-
-આનુ ત્વા દેવા વસવો મદન્તામ્ ॥