પૈપ્પલાદ-સંહિતા · અધ્યાય 20.32

પ્રજાવતીઃ સૂયવસે રિશન્તીર્
મા વો વિદ્યુત્ તરન્ મોત સેના ।
સુગે તીર્થે સુપ્રપાણે પિબન્તીઃ
પરિવૃજ્ય વધં ગોહનં ચરન્તુ ॥

પદજ્ઞા સ્ત રમતયઃ
સંહિતા વિશ્વરૂપા
ઉપ નો દેવીર્
દેવેભિર્ એત ।
ઇમં ગોષ્ઠમ્ ઇદં સદો
ઘૃતેના નઃ સમ્ ઉક્ષત ॥

યા ગ્રૈવ્યા અપચિતો
અથો યા ઉપપક્ષિયાઃ ।
વિજામન્ યા અપચિતઃ સ્વયંસ્રસસ્
તા ઇતો નાશયામસિ ॥

સાંતપના ઇદં હવિર્
મરુતસ્ તજ્ જુજુષ્ટન ।
યુષ્માકોતી રિશાદસઃ ॥

યો નો મર્તો મરુતો દુર્હણાયુસ્
તિરશ્ ચિત્તાનિ વસવો જિઘાંસાત્ ।
તસ્મિન્ તાન્ પાશાન્ પ્રતિ મુઞ્ચતા યૂયં
તપિષ્ઠેન તપસા હન્તના તમ્ ॥

સંવત્સરીણા મરુતઃ સ્વર્કા
ઉરુક્ષયાઃ સગણા માનુષેભ્યઃ ।
તે અસ્મત્ પાશાન્ પ્ર મુઞ્ચન્તુ સર્વાન્
સાંતપના મત્સરા માદયિષ્ણવઃ ॥

ધૃષત્ પિબ કલશે સોમમ્ ઇન્દ્ર
વૃત્રહા શૂર સમરે વસૂનામ્ ।
માધ્યંદિને સવન આ જુષસ્વ
રયિષ્ઠાનો રયિમ્ અસ્માસુ ધેહિ ॥

યુનજ્મિ ત્વા બ્રહ્મણા દૈવ્યેન્-
-આસ્મૈ ક્ષત્રાણિ ધારયન્તમ્ અગ્ને ।
દિદિડ્ઢ્ય્ અસ્મભ્યં દ્રવિણેહ ભદ્રા
પ્રેમં વોચો હવિર્દાં દેવતાસુ ॥

વિ તે મુઞ્ચામિ રશનાં
વિ યોક્ત્રં વિ નિયોજનમ્ ।
ઇહૈવ ત્વમ્ અજસ્ર એધ્ય્ અગ્ને ॥

પ્રજાપતે ન હિ ત્વદ્ અન્યો
વિશ્વા રૂપાણિ મહિના જજાન ।
યત્કામાસ્ તે જુહુમસ્ તન્ નો અસ્તુ
વયં સ્યામ પતયો રયીણામ્ ॥