પૈપ્પલાદ-સંહિતા · અધ્યાય 18.3

ઇહૈવ સ્તં મા વિ યૌષ્ટં
દીર્ઘમ્ આયુર્ વ્ય્ અશ્નુતમ્ ।
ક્રીડન્તૌ પુત્રૈર્ નપ્તૃભિર્
મોદમાનૌ સ્વે ગૃહે ॥

પૂર્વાપરં ચરતો માયયૈતૌ
શિશૂ ક્રીડન્તૌ પરિ યાતો અધ્વરમ્ ।
વિશ્વાન્ય્ અન્યો ભુવના વિચષ્ટ
ઋતૂંર્ અન્યો વિદધજ્ જાયતે નવઃ ॥

નવોનવો ભવતિ જાયમાનો
ઽહ્નાં કેતુર્ ઉષસામ્ એત્ય્ અગ્રમ્ ।
ભાગં દેવેભ્યો વિ દધાત્ય્ આયન્
પ્ર ચન્દ્રમાસ્ તિરતે દીર્ઘમ્ આયુઃ ॥

પરા દેહિ શામૂલ્યં
બ્રહ્મભ્યો વિ ભજા વસુ ।
કૃત્યૈષા પદ્વતી ભૂત્વા-
-આ જાયા વિશતે પતિમ્ ॥

નીલલોહિતં ભવતિ
કૃત્યાસક્તિર્ વ્ય્ અજ્યતે ।
એધન્તે અસ્યા જ્ઞાતયઃ
પતિર્ બન્ધેષુ બધ્યતે ॥

અશ્લીલા તનૂર્ ભવતિ
રુશતી પાપયામુયા ।
પતિર્ યદ્ વધ્વો વાસસઃ
સ્વમ્ અઙ્ગમ્ અભ્યૂર્ણુતે ॥

આશસનં વિશસનમ્
અથો અધિવિકર્તનમ્ ।
સૂર્યાયાઃ પશ્ય રૂપાણિ
તાનિ બ્રહ્મા તુ શુન્ધતિ ॥

તૃષ્ટમ્ એતત્ કટુકમ્
અપાષ્ઠવદ્ વિષવન્ નૈતદ્ અત્તવે ।
સૂર્યાં યો બ્રહ્મા વેદ
સ ઇદ્ વાધૂયમ્ અર્હતિ ॥

સ વૈ તત્ સ્યોનં હરતિ
બ્રહ્મા વાસઃ સુમઙ્ગલમ્ ।
પ્રાયશ્ચિત્તિં યો અધ્યેતિ
યેન જાયા ન રિષ્યતિ ॥

યુવં ભગં સં ભરથઃ સમૃદ્ધમ્
ઋતં વદન્તામ્ ઋતોદ્યેન ।
બ્રહ્મણસ્પતે પતિમ્ અસ્યૈ રોચયામું
ચારુ સમ્ભલો વદતુ વાચમ્ એતામ્ ॥