Paippalāda-Saṃhitā · Chapter 18.3
ihaiva staṃ mā vi yauṣṭaṃ
dīrgham āyur vy aśnutam |
krīḍantau putrair naptṛbhir
modamānau sve gṛhe ||
pūrvāparaṃ carato māyayaitau
śiśū krīḍantau pari yāto adhvaram |
viśvāny anyo bhuvanā vicaṣṭa
ṛtūṃr anyo vidadhaj jāyate navaḥ ||
navonavo bhavati jāyamāno
'hnāṃ ketur uṣasām ety agram |
bhāgaṃ devebhyo vi dadhāty āyan
pra candramās tirate dīrgham āyuḥ ||
parā dehi śāmūlyaṃ
brahmabhyo vi bhajā vasu |
kṛtyaiṣā padvatī bhūtvā-
-ā jāyā viśate patim ||
nīlalohitaṃ bhavati
kṛtyāsaktir vy ajyate |
edhante asyā jñātayaḥ
patir bandheṣu badhyate ||
aślīlā tanūr bhavati
ruśatī pāpayāmuyā |
patir yad vadhvo vāsasaḥ
svam aṅgam abhyūrṇute ||
āśasanaṃ viśasanam
atho adhivikartanam |
sūryāyāḥ paśya rūpāṇi
tāni brahmā tu śundhati ||
tṛṣṭam etat kaṭukam
apāṣṭhavad viṣavan naitad attave |
sūryāṃ yo brahmā veda
sa id vādhūyam arhati ||
sa vai tat syonaṃ harati
brahmā vāsaḥ sumaṅgalam |
prāyaścittiṃ yo adhyeti
yena jāyā na riṣyati ||
yuvaṃ bhagaṃ saṃ bharathaḥ samṛddham
ṛtaṃ vadantām ṛtodyena |
brahmaṇaspate patim asyai rocayāmuṃ
cāru sambhalo vadatu vācam etām ||
Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0