પૈપ્પલાદ-સંહિતા · અધ્યાય 18.2

શુચી તે ચક્રે યાત્યા
વ્યાનો અક્ષ આહતઃ ।
અનો મનસ્મયં સૂર્યા-
-આરોહત્ પ્રયતી પતિમ્ ॥

સૂર્યાયા વહતુઃ પ્રાગાત્
સવિતા યમ્ અવાસૃજત્ ।
અઘાસુ હન્યન્તે ગાવઃ
ફલ્ગુનીષુ વ્ય્ ઉહ્યતે ॥

યદ્ અશ્વિના પૃચ્છમાનાવ્ અયાતં
ત્રિચક્રેણ વહતું સૂર્યાયાઃ ।
ક્વૈકં ચક્રં વામ્ આસીત્
ક્વ દેષ્ટ્રાય તસ્થથુઃ ॥

યદ્ અયાતં શુભસ્પતી
વરેયં સૂર્યામ્ ઉપ ।
વિશ્વે દેવા અનુ તદ્ વામ્ અજાનન્
પુત્રઃ પિતરાવ્ અવૃનીત પૂષા ॥

દ્વે તે ચક્રે સૂર્યે
બ્રહ્માણ ઋતુથા વિદુઃ ।
અથૈકં ચક્રં યદ્ ગુહા
તદ્ અદ્ધાતય ઇદ્ વિદુઃ ॥

પ્ર ત્વા મુઞ્ચામિ વરુણસ્ય પાશાદ્
યેન ત્વાબધ્નાત્ સવિતા સુશેવાઃ ।
ઋતસ્ય યોનૌ સુકૃતસ્ય લોકે
સ્યોનં તે અસ્તુ સહપત્ન્યૈ વધુ ॥

અર્યમણં યજામહે
સુબન્ધું પતિવેદનમ્ ।
ઉર્વારુકમ્ ઇવ બન્ધનાદ્
ઇતો મુઞ્ચન્તુ મામુતઃ ॥

પ્રેતો મુઞ્ચન્તુ મામુતઃ
સુબદ્ધામ્ અમુતસ્ કરત્ ।
યથેયમ્ ઇન્દ્ર મીઢ્વઃ
સુપુત્રા સુભગાસતિ ॥

ભગસ્ ત્વેતો નયતુ હસ્તગૃહ્ય-
-અશ્વિના ત્વા પ્ર વહતાં રથેન ।
ગૃહાન્ ગચ્છ ગૃહપત્ની યથાસો
વશિની ત્વં વિદથમ્ આ વદાસિ ॥

ઇહ પ્રિયં પ્રજાયૈ તે સમ્ ઋધ્યતામ્
અસ્મિન્ ગૃહે ગાર્હપત્યાય જાગૃહિ ।
એના પત્યા તન્વં સં સ્પૃશસ્વ-
-અથ જિર્વિર્ વિદથમ્ આ વદાસિ ॥