પૈપ્પલાદ-સંહિતા · અધ્યાય 18.21

સુખં સૂર્ય રથમ્ અંશુમન્તં
સ્યોનં સુવહ્નિમ્ અધિ તિષ્ઠ વાજિનમ્ ।
યં તે વહન્તિ હરિતો વહિષ્ઠાઃ
શતમ્ અશ્વા યદિ વા સપ્ત બહ્વીઃ ॥

સપ્ત સૂર્યો હરિતો યાતવે રથે
હિરણ્યત્વચસો બૃહતીર્ અયુક્ત ।
અમોચિ શુક્રો રજસઃ પરસ્તાદ્
વિધૂય દેવસ્ તમો દિવમ્ આરુહત્ ॥

ઉત્ કેતુના બૃહતા દેવા આગન્ન્
અપાવૃક્ તમો ઽભિ જ્યોતિર્ અશ્રૈત્ ।
દિવ્યઃ સુપર્ણ સ્થવીરો વ્ય્ અખ્યદ્
અદિત્યાઃ પુત્રો ભુવનાનિ વિશ્વા ॥

ઉદ્યન્ રશ્મીન્ આ તનુષે
પ્રજાઃ સર્વા વિ પશ્યતિ ।
ઉભા સમુદ્રૌ ક્રતુના વિ ભાસિ
સર્વાં લોકાન્ પરિભૂર્ ભ્રાજમાનઃ ॥

પૂર્વાપરં ચરતો માયયૈતૌ
શિશૂ કુન્દાના પરિ યાતો અર્ણવમ્ ।
વિશ્વાન્ય્ અન્યો ભુવનાભિ વસ્તે
હૈરણ્યૈર્ અન્યં હરિતો વહન્તિ ॥

દિવિ ત્વાત્રિર્ ધારયત્
સૂર્યા માસાય કર્તવે ।
સ એષિ સુધૃતસ્ તપન્
સ્વર્ ભૂતાવચાકશત્ ॥

ઉભાવ્ અન્તૌ સમ્ અર્ષતિ
વત્સઃ સંમાતરાવ્ ઇવ ।
નન્વ્ એતદ્ ઇતઃ પુરા
બ્રહ્મ દેવા અમી વિદુઃ ॥

યત્ સમુદ્રમ્ અનુ શ્રિતં
તત્ સિષાસતિ સૂર્યઃ ।
અધ્વાસ્ય વિતતો મહાન્
પૂર્વશ્ ચાપરશ્ ચ યઃ ॥

તં સમ્ આપ્નોતિ જૂતિભિસ્
તસ્માન્ નાપ ચિકિત્સતિ ।
તેનામૃતસ્ય ભક્ષં
દેવાનાં નાવ રુન્ધતે ॥

ઉદ્ ઉ ત્યં જાતવેદસં
દેવં વહન્તિ કેતવઃ ।
દૃશે વિશ્વાય સૂર્યમ્ ॥