પૈપ્પલાદ-સંહિતા · અધ્યાય 18.19

એકપદી દ્વિપદી સા ચતુષ્પદ્ય્
અષ્ટાપદી નવપદી બભૂવુષી ।
સહસ્રાક્ષરા ભુવનસ્ય પઙ્ક્તિસ્
ત્યસ્યાઃ સમુદ્રા અધિ વિ ક્ષરન્તિ ॥

આરોહન્ દ્યામ્ અમૃતઃ પ્રાવ મે વચ
ઉત્ ત્વા યજ્ઞા બ્રહ્મપૂતા વહન્તિ ।
ઘૃતં પિબન્તં હરયસ્ ત્વા વહન્તિ ॥

વેદ તત્ તે અમર્ત્તિ
યત્ ત આક્રમણં દિવિ ।
યત્ તે સધસ્થં પરમે વ્યોમન્ ॥

સૂર્યો દ્યાં સૂર્યઃ પૃથિવીં
સૂર્ય આપો ઽતિ પશ્યતિ ।
સૂર્યો ભૂતસ્યૈકં ચક્ષુર્
આ રુરોહ દિવં મહીમ્ ॥

ઉર્વીર્ આસન્ પરિધયો
વેદિર્ ભૂમિર્ અકલ્પત ।
તત્રૈતાવ્ અગ્ની આધત્ત
હિમં ઘ્રંસં ચ રોહિતઃ ॥

હિમં ઘ્રંસં ચાધાય
યૂપાન્ કૃત્વા પર્વતાન્ ।
વર્ષાજ્યાવ્ અગ્ની ઈજાતે
રોહિતસ્ય સ્વર્વિદઃ ॥

સ્વર્વિદો રોહિતસ્ય
બ્રહ્મણાગ્નિઃ સમાહિતઃ ।
તસ્માદ્ ઘ્રંસસ્ તસ્માદ્ ધિમસ્
તસ્માદ્ યજ્ઞો અજાયત ॥

બ્રહ્મણાગ્નિઃ સંઇધાનો
બ્રહ્મવૃદ્ધો બ્રહ્મહુતઃ ।
બ્રહ્મેદ્ધાવ્ અગ્ની ઈજાતે
રોહિતસ્ય સ્વર્વિદઃ ॥

અપ્સ્વ્ અન્યઃ સમાહિતઃ
સત્યે અન્યઃ સમાહિતઃ ।
(…) ॥

યં વાતઃ પરિશુમ્ભતિ
યમ્ ઇન્દ્રો બ્રહ્મણસ્પતિઃ ।
બ્રહ્મેદ્ધાવ્ અગ્ની ઈજાતે
રોહિતસ્ય સ્વર્વિદઃ ॥