પૈપ્પલાદ-સંહિતા · અધ્યાય 18.15

ઉદેહિ વાજિન્ યો ઽપ્સ્વ્ અન્તર્
ઇદં રાષ્ટ્રં પ્ર વિશ સૂનૃતાવત્ ।
યો રોહિતો વિશ્વમ્ ઇદં જજાન
સ ત્વા રાષ્ટ્રાય સુભૃતં પિપર્તુ ॥

ઉદ્ વાજ આગન્ યો ઽપ્સ્વ્ અન્તર્
વિશ આ રોહ ત્વદ્યોનયો યાઃ ।
સોમં દધાનો ઽપ ઓષધીર્ ગાશ્
ચતુષ્પદો દ્વિપદ આ વેશયેહ ॥

યૂયમ્ ઉગ્રા મરુતઃ પૃશ્નિમાતર
ઇન્દ્રેણ યુજા પ્રમૃણીત શત્રૂન્ ।
આ વો રોહિતઃ શૃણવત્ સુદાનવસ્
ત્રિષપ્તા મરુતઃ સ્વાદુસંમુદઃ ॥

રુહો રુરોહ રોહિત આ રુરોહ
ગર્ભો જનીનાં જનુષામ્ ઉપસ્થમ્ ।
તાભિઃ સંરબ્ધો અન્વ્ અવિન્દત્ ષડ્ ઉર્વીર્
ગાતું પ્રપશ્યન્ન્ ઇહ રાષ્ટ્રમ્ આહાઃ ॥

આ તે રાષ્ટ્રમ્ ઇહ રોહિતો ઽહાર્
મૃધો વ્ય્ આસ્થદ્ અભયં તે અભૂત્ ।
તસ્મૈ તે દ્યાવાપૃથિવી રેવતીભિઃ
કામં દુહતામ્ ઇહ શક્વરીભિઃ ॥

રોહિતો દ્યાવાપૃથિવી જજાન
તં તન્તું પરમેષ્ઠી તતાન ।
તત્ર શિશ્રિયે ઽજ એકપાદ્
અદૃંહદ્ દ્યાવાપૃથિવી બલેન ॥

રોહિતો દ્યાવાપૃથિવી અદૃંહત્
તેન સ્વ સ્તભિતં તેન નાકઃ ।
તેનાન્તરિક્ષં વિમિતા રજંસિ
તેન દેવા અમૃતમ્ અન્વ્ અવિન્દન્ ॥

વિ રોહિતો અમૃશદ્ વિશ્વરૂપં
સમાકૃણ્વાનઃ પ્રરુહો રુહશ્ ચ ।
દિવં રૂઢ્વા મહતા મહિમ્ના
સં તે રાષ્ટ્રમ્ અનક્તુ પયસા ઘૃતેન ॥

યાસ્ તે રુહઃ પ્રરુહો યાસ્ ત આરુહો
યાભિર્ આપૃણાસિ દિવમ્ અન્તરિક્ષમ્ ।
તાસાં બ્રહ્મણા પયસા વાવૃધાનો
વિશિ રાષ્ટ્રે જાગૃહિ રોહિતસ્ય ॥

યાસ્ તે વિશસ્ તપસઃ સંબભૂવુર્
વત્સં ગાયત્રીમ્ અનુ તા ઇહાગુઃ ।
તાસ્ ત્વા વિશન્તુ મનસા શિવેન
સંમાતા વત્સો અભ્ય્ એતિ રોહિતઃ ॥