પૈપ્પલાદ-સંહિતા · અધ્યાય 17.45

સમ્ ઇન્ધતે સંકસુકં સ્વસ્તયે
શુદ્ધા ભવન્તઃ શુચયઃ પાવકાઃ ।
જહાતિ રિપ્રમ્ અત્ય્ એન એતિ
સમિદ્ધો અગ્નિઃ સુપુના પુનાતિ ॥

દેવો અગ્નિઃ સંકસુકો
દિવસ્ પૃષ્ઠાન્ય્ આરુહત્ ।
મુચ્યમાનો નિર્ અંહસો
મોહ્યાસ્માઁ અશસ્ત્યાઃ ॥

અસ્મિન્ વયં સંકસુકે
અગ્ને રિપ્રાણિ મૃજ્મહે ।
અભૂમ યજ્ઞિયાઃ શુદ્ધાઃ
પ્ર ણ આયૂંષિ તારિષત્ ॥

સંકસુકો વિકસુકો
નિરૃથો યશ્ ચ નિસ્વરઃ ।
તે તે યક્ષ્મં સવેદસો
દૂરાદ્ દૂરમ્ અચુચ્યવુઃ ॥

અન્નાત્ ત્વા પુરુષેભ્યો
ગોભ્યો અશ્વેભ્યસ્ ત્વા ।
ક્રવ્યાદં નિર્ ણુદામસ્ય્
અગ્નિં જીવિતયોપનમ્ ॥

યો નો અશ્વેષુ વીરેષુ
યો ગોષુ યો અજાદિષુ ।
ક્રવ્યાદં નિર્ ણુદામસ્ય્
અગ્નિર્ યો જનયોપનઃ ॥

સમિદ્ધો અગ્ન આહુત
સ નો માભ્યપક્રમીઃ ।
અત્રૈવ દીદિહિ દ્યવિ
જ્યોક્ ચ સૂર્યાય દૃશે ॥

યસ્મિન્ દેવા અમૃજત
યસ્મિન્ મનુષ્યા ઉત ।
તસ્મિન્ ઘૃતસ્તાવો મૃષ્ટ્વા
ત્વમ્ અગ્ને દિવં રુહ ॥

સીસે મૃઢ્વં નડે મૃઢ્વમ્
અગ્નિઃ સંકસુકશ્ ચ યઃ ।
અથો અવ્યાં રામાયાં
શીર્ષક્તિમ્ ઉપબર્હણે ॥

સીસે બલં સાદયિત્વા
શીર્ષક્તિમ્ ઉપબર્હણે ।
અવ્યામ્ અસિક્ન્યાં મૃષ્ટ્વા
શુદ્ધા ભવન્તિ યજ્ઞિયાઃ ॥