પૈપ્પલાદ-સંહિતા · અધ્યાય 17.46

પરં મૃત્યો અનુ પરેહિ પન્થાં
યસ્ ત એષ ઇતરો દેવયાનાત્ ।
ચક્ષુષ્મતે શૃણ્વતે તે બ્રવીમિ-
-ઇહ મે વીરા બહવો ભવન્તુ ॥

ઇમે જીવા વિ મૃતૈર્ આવવૃત્રન્ન્
અભૂદ્ ભદ્રા દેવહૂતિર્ નો અદ્ય ।
પ્રાઞ્ચો અગામ નૃતયે હસાય
સુવીરાસો વિદથમ્ આ વદેમ ॥

ઇમં જીવેભ્યઃ પરિધિં દધામિ
મૈષાં નુ ગાદ્ અપરો અર્થમ્ એતમ્ ।
જ્યોગ્ જીવન્તઃ શરદઃ પુરૂચીસ્
તિરો મૃત્યું દધતાં પર્વતેન ॥

યથાહાન્ય્ અનુપૂર્વં ભવન્તિ
યથર્તવ ઋતુભિર્ યન્તિ સાકમ્ ।
યથા ન પૂર્વો અપરં જહાત્ય્
એવા ત્વષ્ટર્ આયુંષિ કલ્પયૈષામ્ ॥

આ રોહતાયુર્ જરસં વૃણાના
અનુપૂર્વં યતમાના યતિ ષ્ઠ ।
તાન્ વસ્ ત્વષ્ટા સુજનિમા સજોષાઃ
સર્વમ્ આયુર્ નયતુ જીવનાય ॥

અશ્મન્વતી રીયતે સં રભધ્વં
વીરયધ્વં પ્ર તરતા સખાયઃ ।
અત્રા જહીત યે અસન્ દુરેવા
અનમીવાન્ ઉત્ તરેમાભિ વાજાન્ ॥

ઉત્ તિષ્ઠતા પ્ર તરતા સખાયો
+ઽશ્મન્વતી સ્યન્દતે નદીયમ્ ।
અત્રા જહીત યે અસન્ન્ અશિવાઃ
શિવાન્ સ્યોનાન્ ઉત્ તરેમાભિ વાજાન્ ॥

વૈશ્વદેવીં સૂનૃતામ્ આ રભધ્વં
શુદ્ધા ભવન્તઃ શુચયઃ પાવકાઃ ।
અતિક્રામન્તો દુરિતાનિ વિશ્વા
શતં હિમાઃ સર્વવીરા મદેમ ॥

ઉદીચીનૈઃ પથિભિર્ વાયુમ્ અદ્ભિર્
અતિક્રામન્તો ઽવરાન્ પરેભિઃ ।
ત્રિઃ સપ્ત કૃત્વ ઋષયઃ પરેતા
મૃત્યું પ્રત્યૌહન્ પદયોપનેન ॥

મૃત્યોઃ પદં યોપયન્ત એત
દ્રાઘીય આયુઃ પ્રતરં દધાનાઃ ।
આસીના મૃત્યું નુદતા સધસ્થે
ઽથ જીવા વિદથમ્ આ વદેમ ॥