Scripture Library

Paippalāda-Saṃhitā · Chapter 17.45

17.45.1

sam indhate saṃkasukaṃ svastaye
śuddhā bhavantaḥ śucayaḥ pāvakāḥ |
jahāti ripram aty ena eti
samiddho agniḥ supunā punāti ||

17.45.2

devo agniḥ saṃkasuko
divas pṛṣṭhāny āruhat |
mucyamāno nir aṃhaso
mohyāsmām̐ aśastyāḥ ||

17.45.3

asmin vayaṃ saṃkasuke
agne riprāṇi mṛjmahe |
abhūma yajñiyāḥ śuddhāḥ
pra ṇa āyūṃṣi tāriṣat ||

17.45.4

saṃkasuko vikasuko
nirṛtho yaś ca nisvaraḥ |
te te yakṣmaṃ savedaso
dūrād dūram acucyavuḥ ||

17.45.5

annāt tvā puruṣebhyo
gobhyo aśvebhyas tvā |
kravyādaṃ nir ṇudāmasy
agniṃ jīvitayopanam ||

17.45.6

yo no aśveṣu vīreṣu
yo goṣu yo ajādiṣu |
kravyādaṃ nir ṇudāmasy
agnir yo janayopanaḥ ||

17.45.7

samiddho agna āhuta
sa no mābhyapakramīḥ |
atraiva dīdihi dyavi
jyok ca sūryāya dṛśe ||

17.45.8

yasmin devā amṛjata
yasmin manuṣyā uta |
tasmin ghṛtastāvo mṛṣṭvā
tvam agne divaṃ ruha ||

17.45.9

sīse mṛḍhvaṃ naḍe mṛḍhvam
agniḥ saṃkasukaś ca yaḥ |
atho avyāṃ rāmāyāṃ
śīrṣaktim upabarhaṇe ||

17.45.10

sīse balaṃ sādayitvā
śīrṣaktim upabarhaṇe |
avyām asiknyāṃ mṛṣṭvā
śuddhā bhavanti yajñiyāḥ ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0