પૈપ્પલાદ-સંહિતા · અધ્યાય 17.44

નડમ્ આ રોહ ન તે અત્ર લોક
ઇદં સીસં ભાગધેયં ત એહિ ।
યો ગોષુ યક્ષ્મઃ પુરુષેષુ યક્ષ્મસ્
તેન ત્વં સાકમ્ અધરાઙ્ પરેહિ ॥

અઘશંસદુઃશંસૌ
કરેણાનુકરેણ ચ ।
મૃત્યૂંશ્ ચ સર્વાંસ્ તેનેતો
યક્ષ્માંશ્ ચ નિર્ અજામસિ ॥

નિર્ ઇતો મૃત્યું નિરૃતિં
નિર્ યક્ષ્મમ્ અજામસિ ।
યો નો દ્વેષ્ટિ તમ્ અદ્ધ્ય્ અગ્ને ક્રવ્યાદ્
યં દ્વિષ્મસ્ તં તે પ્ર સુવામઃ ॥

યદ્ય્ અગ્નિઃ ક્રવ્યાદ્ યદિ વા વ્યાઘ્ર
ઇમં ગોષ્ઠમ્ અન્યોકા આ વિવેશ ।
તં માષાજ્યં કૃત્વા પ્ર હિણોમિ
દૂરં સ ગચ્છત્વ્ અપ્સુષદો ઽત્ય્ અગ્નીન્ ॥

યત્ ત્વા કુદ્ધાઃ પ્રચક્રુર્
મન્યુના પુરુષે મૃતે ।
સુકલ્પમ્ અગ્ને તત્ ત્વયા
પુનસ્ ત્વોદ્ દીપયામસિ ॥

પુનસ્ ત્વાદિત્યા રુદ્રા વસવઃ
પુનર્ બ્રહ્મા વસુનીતિર્ અગ્રે ।
પુનસ્ ત્વા બ્રહ્મણસ્પતિર્ આધાદ્
દીર્ઘાયુત્વાય શતશારદાય ॥

યો અગ્નિઃ ક્રવ્યાત્ પ્રવિવેશ વો ગૃહમ્
ઇમં પશ્યન્ન્ ઇતરં જાતવેદસમ્ ।
તં હરામિ પિતૃયજ્ઞાય દૂરં
સ ઘર્મમ્ ઇન્ધત્ પરમે સધસ્થે ॥

ક્રવ્યાદમ્ અગ્નિં પ્ર હિણોમિ દૂરં
યમરાજ્ઞો ગચ્છતુ રિપ્રવાહઃ ।
ઇહૈવાયમ્ ઇતરો જાતવેદા
દેવો દેવેભ્યો હવ્યં વહતુ પ્રજાનન્ ॥

ક્રવ્યાદમ્ અગ્નિમ્ ઇષિતો હરામિ
જનાન્ દ્રુહન્તં વજ્રેણ મૃત્યુમ્ ।
વિ તં શાસ્મિ ગાર્હપત્યેન વિદ્વાન્
પિતૄણાં લોકે અપિ ભાગો અસ્ય ॥

ક્રવ્યાદમ્ અગ્નિં શસમાનમ્ ઉક્થ્યં
પ્ર હિણોમિ પથિભિઃ પિતૃયાણૈઃ ।
મા દેવયાનૈઃ પથિભિર્ આ ગા
અત્રૈવૈધિ પિતૃષુ જાગૃહિ ત્વમ્ ॥