પૈપ્પલાદ-સંહિતા · અધ્યાય 17.4

યાસ્ તે પ્રાચીઃ પ્રદિશો યા ઉદીચીર્
યાસ્ તે ભૂમે અધરાદ્ યાશ્ ચ પશ્ચાત્ ।
સ્યોનાસ્ તા મહ્યં ચરતે ભવન્તુ
મા નિ પપ્તં ભુવને શિશ્રિયાણે ॥

મા મા પશ્ચાન્ મા પુરસ્તાન્ નુદિષ્ઠાઃ
સ્વસ્તિ ભૂમે મે કૃણુ
વરીયો યાવયા વધન્
મા વિદન્ પરિપન્થિનઃ ॥

યાવત્ તે ઽભિ વિપશ્યામિ
ભૂમે સૂર્યેણ મેદિના ।
તાવન્ મે ચક્ષુર્ મા મેષ્ટ-
-ઉત્તરામ્ ઉત્તરાં સમામ્ ॥

યત્ તે ભૂમે વિખનામ્ય્
ઓષં તદ્ અપિ રોહતુ ।
મા તે મર્મ વિમૃગ્વરિ
મા તે હૃદયમ્ અર્પિપમ્ ॥

યચ્ છયાનઃ પર્યાવર્તે
દક્ષિણં સવ્યમ્ અભિ ભૂમે પાર્શ્વમ્ ।
ઉત્તાનાસ્ ત્વા પ્રતીચીં
પૃષ્ટ્યા યદ્ અભિશેમહે
મા હિંસીસ્ તત્ર નો ભૂમે
સર્વસ્ય પ્રતિશીવરિ ॥

ગ્રીષ્મસ્ તે ભૂમે વર્ષાણિ
શરદ્ ધેમન્તઃ શિશિરો વસન્તઃ ।
ઋતવસ્ તે વિહિતા હાયના
અહોરાત્રે પૃથિવી નો દુહાતામ્ ॥

યાપ સર્પં નુદમાના વિમૃગ્વરી
યસ્યામ્ આસન્ન્ અગ્નયો અપ્સ્વ્ અન્તઃ ।
પરા દસ્યૂન્ દદતી દેવપીયૂન્
ઇન્દ્રં વૃણાના પૃથિવી ન વૃત્રં
શક્રાય દધ્રે વૃષભાય વૃષ્ણે ।
સ નો ભૂમેર્ આ દિશતુ યદ્ ધનં કામયામહે ॥

ભગો અનુ પ્રયુઙ્ક્તામ્
ઇન્દ્રો યાતુ પુરોગવઃ ।
યસ્યાં સદોહવિર્ધાને
યૂપો યસ્યાં નિમીયતે ।
બ્રહ્માણો યસ્યામ્ અર્ચન્તિ
ઋગ્ભિઃ સામ્ના યજુર્વિદઃ ।
યુજ્યન્તે યસ્યામ્ ઋત્વિજઃ
સોમમ્ ઇન્દ્રાય પાતવે ।
સા નો ભૂમિર્ દક્ષિણાયાં
સુશેવા યજ્ઞે દધાતુ સુમનસ્યમાના ॥

યસ્યાં પૂર્વે ભૂતકૃત
ઋષયો ગા ઉદાનૃચુઃ ।
સપ્ત સત્રેણ વેધસો
યજ્ઞેન તપસા સહ ।
સા નઃ પશૂન્ વિશ્વરૂપાન્ દધાતુ
દીર્ઘં મ આયુઃ સવિતા કૃણોતુ ॥

યસ્યામ્ અન્નં વ્રીહિયવૌ
યત્રેમાઃ પઞ્ચ કૃષ્ટયઃ ।
ભૂમ્યૈ પર્જન્યપત્ન્યૈ
નમો ઽસ્તુ વર્ષમ્ એધતે ॥