પૈપ્પલાદ-સંહિતા · અધ્યાય 17.5

યસ્યાં ગાયન્તિ નૃત્યન્તિ
જના મર્ત્યા વૈલવાઃ ।
યુજ્યન્તે યસ્યામ્ આક્રન્દો
યસ્યાં વદતિ દુન્દુભિઃ ।
સા નો ભૂમિઃ પ્ર ણુદતાં સપત્નાન્
યો નો દ્વેષ્ટ્ય્ અધરં તં કૃણોતુ ॥

યસ્યાં પુરો દેવકૃતાઃ
ક્ષેત્રે યસ્યાં વિકુર્વતે ।
પ્રજાપતિઃ પૃથિવીં વિશ્વગર્ભામ્
આશામાશાં રણ્યાં નઃ કૃણોતુ ॥

જનં બિભ્રતી બહુધા વિવાચસં
નાનાધર્માણં પૃથિવી યથૌકસમ્ ।
સહસ્રં ધારા દ્રવિણસ્ય નો દુહાં
ધ્રુવેવ ધેનુર્ અનપસ્ફુરન્તી ॥

યસ્ તે સર્પો વૃશ્ચિકસ્ તૃષ્ટદંશ્મા
હેમન્તજબ્ધો ભૃમલો ગુહા શયે ।
ક્રિમિર્ ઇલ્મં પૃથિવિ પ્રાવૃષિ યદ્ એજતિ
તન્ નઃ સર્પન્ મોપ સૃપદ્
યચ્ છિવં તેન નો મૃડ ॥

યે તે પન્થાનો બહુધા જનાયના
રથસ્ય વર્ત્મન્ મનસશ્ ચ યાતવે ।
યેભિશ્ ચરન્ત્ય્ ઉભયે ભદ્રપાપાસ્
તં પન્થાં જયેમાનમિત્રમ્ અતસ્કરમ્ ॥

મન્દં (⟨ મલ્વં?) બિભ્રતી ગુરુભૃદ્
ભદ્રપાપસ્ય નિધનં તિતિક્ષુઃ ।
સૂકરેણ પૃથિવી સંવિદાના
વરાહાય વિ જિહીતે મૃગાય ॥

યે ત આરન્યાઃ પશવો મૃગા વને હિતાઃ
સિંહા વ્યાઘ્રાઃ પુરુષાદશ્ ચરન્તિ ।
ઉલં વૃકં પૃથિવિ દુચ્છુનામ્ ઇત
ઋક્ષીકાં રક્ષો અપ બધાસ્મત્ ॥

યે ગન્ધર્વાપ્સરસો
યે ચરાયાઃ કિમીદિનઃ ।
પિશાચાન્ સર્વા રક્ષાંસિ
તાન્ અસ્મદ્ ભૂમે યાવય ॥

યાં દ્વિપાદઃ પક્ષિણઃ સંપતન્તિ
હંસાઃ સુપર્ણાઃ શકુના વયાંસિ ।
યસ્યાં વાત ઈયતે માતરિશ્વા
રજાંસિ કૃણ્વંશ્ ચ્યાવયંશ્ ચ વૃક્ષાન્ ।
વાતસ્ય પ્રવામ્ ઉપવામ્ અનુ વાત્ય્ અર્ચિર્
યસ્યાં કૃષ્ણમ્ અરુણં ચ સંભૃતે
અહોરાત્રે વિહિતે ભૂમ્યામ્ અધિ ॥

વર્ષેણ ભૂમિઃ પૃથિવી વૃતાવૃતા ।
સા નો દધાતુ ભદ્રયા
પ્રિયે ધામનિધામનિ ॥