પૈપ્પલાદ-સંહિતા · અધ્યાય 17.3

અગ્નિર્ દિવ આ તપત્ય્
અગ્નેર્ દેવસ્યોર્વ્ અન્તરિક્ષમ્ ।
અગ્નિં મર્તાસ ઇન્ધતે
હવ્યવાહં ઘૃતપ્રિયમ્ ॥

અગ્નિવાસાઃ પૃથિવ્ય્ અસિતજ્ઞુસ્
ત્વિષીમન્તં સંશિતં મા કૃણોતુ ।
ભૂમ્યાં દેવેભ્યો જુહ્વતિ
યજ્ઞં હવ્યમ્ અરંકૃતમ્ ।
ભૂમ્યાં મનુષ્યા જીવન્તિ
સ્વધયાન્નેન મર્ત્યાઃ ।
સા નો ભૂમિઃ પ્રાણમ્ આયુર્ દધાતુ
જરદષ્ટિં મા પૃથિવી કૃણોતુ ॥

યસ્ તે ગન્ધઃ પૃથિવિ સંબભૂવ
યં બિભ્રત્ય્ ઓષધયો યમ્ આપઃ ।
યં ગન્ધર્વા અપ્સરસશ્ ચ ભેજિરે
યસ્ તે ગામ્ અશ્વમ્ અર્હતિ ।
તેનાસ્માન્ સુરભીન્ કૃણુ
મા નો દ્વિક્ષત કશ્ ચન ॥

યસ્ તે ગન્ધઃ પુષ્કરમ્ આવિવેશ
યં સંજભ્રુઃ સૂર્યાયા વિવાહે ।
અમર્ત્યાઃ પૃથિવિ ગન્ધમ્ અગ્રે ।
તેનાસ્માન્ સુરભીન્ કૃણુ
મા નો દ્વિક્ષત કશ્ ચન ॥

યસ્ તે ભૂમે પુરુષેષુ
સ્ત્રીષુ પુંસુ ભગો રુચિર્
યો વધૂષુ વધૂયુષુ ।
યો ગોષ્વ્ અશ્વેષુ
યો મૃગેષૂત હસ્તિષુ ।
કન્યાયાં વર્ચો યદ્ ભૂમે
તેનાસ્માઁ અધિ સં સૃજ
મા નો દ્વિક્ષત કશ્ ચન ॥

શિલા ભૂમિર્ અશ્મા પાંસુર્
યા ભૂમિઃ સંભૃતા ધૃતા ।
યસ્યાં વૃક્ષા વાનસ્પત્યા
ધ્રુવાસ્ તિષ્ઠન્તિ વિશ્વહા ।
ભૂમિં હિરણ્યવક્ષસં
ધૃતામ્ અચ્છા વદામસિ ॥

ઉદીરાણા ઉતાસીનાસ્
તિષ્ઠન્તઃ પ્રક્રામન્તઃ ।
પદ્ભ્યાં દક્ષિણસવ્યાભ્યાં
મા વ્યથિષ્મહિ ભૂમ્યામ્ ॥

વિમૃગ્વરીં પૃથિવીમ્ આ વદામિ
ક્ષમાં ભૂમિં બ્રહ્મણા વાવૃધાનામ્ ।
ઊર્જં પુષ્ટિં બિભ્રતીમ્ અન્નભાગં
ઘૃતં ત્વાભિ નિ ષીદામિ ભૂમે ॥

શુદ્ધા મ આપસ્ તન્વઃ ક્ષરન્તિ
યો મે સેહુર્ અપ્રિયે તં નિ દધ્મઃ ।
પવિત્રેણ પૃથિવીમ્ ઉત્ પુનામિ ॥

નિધીન્ બિભ્રતી બહુધા ગુહા વસુ
મણિં હિરણ્યં પૃથિવી દધાતુ નઃ ।
વસૂનિ નો વસુદા રાસમાના
દેવી દધાતુ સુમનસ્યમાના ॥