Paippalāda-Saṃhitā · Chapter 17.4

yās te prācīḥ pradiśo yā udīcīr
yās te bhūme adharād yāś ca paścāt |
syonās tā mahyaṃ carate bhavantu
mā ni paptaṃ bhuvane śiśriyāṇe ||

mā mā paścān mā purastān nudiṣṭhāḥ
svasti bhūme me kṛṇu
varīyo yāvayā vadhan
mā vidan paripanthinaḥ ||

yāvat te 'bhi vipaśyāmi
bhūme sūryeṇa medinā |
tāvan me cakṣur mā meṣṭa-
-uttarām uttarāṃ samām ||

yat te bhūme vikhanāmy
oṣaṃ tad api rohatu |
mā te marma vimṛgvari
mā te hṛdayam arpipam ||

yac chayānaḥ paryāvarte
dakṣiṇaṃ savyam abhi bhūme pārśvam |
uttānās tvā pratīcīṃ
pṛṣṭyā yad abhiśemahe
mā hiṃsīs tatra no bhūme
sarvasya pratiśīvari ||

grīṣmas te bhūme varṣāṇi
śarad dhemantaḥ śiśiro vasantaḥ |
ṛtavas te vihitā hāyanā
ahorātre pṛthivī no duhātām ||

yāpa sarpaṃ nudamānā vimṛgvarī
yasyām āsann agnayo apsv antaḥ |
parā dasyūn dadatī devapīyūn
indraṃ vṛṇānā pṛthivī na vṛtraṃ
śakrāya dadhre vṛṣabhāya vṛṣṇe |
sa no bhūmer ā diśatu yad dhanaṃ kāmayāmahe ||

bhago anu prayuṅktām
indro yātu purogavaḥ |
yasyāṃ sadohavirdhāne
yūpo yasyāṃ nimīyate |
brahmāṇo yasyām arcanti
ṛgbhiḥ sāmnā yajurvidaḥ |
yujyante yasyām ṛtvijaḥ
somam indrāya pātave |
sā no bhūmir dakṣiṇāyāṃ
suśevā yajñe dadhātu sumanasyamānā ||

yasyāṃ pūrve bhūtakṛta
ṛṣayo gā udānṛcuḥ |
sapta satreṇa vedhaso
yajñena tapasā saha |
sā naḥ paśūn viśvarūpān dadhātu
dīrghaṃ ma āyuḥ savitā kṛṇotu ||

yasyām annaṃ vrīhiyavau
yatremāḥ pañca kṛṣṭayaḥ |
bhūmyai parjanyapatnyai
namo 'stu varṣam edhate ||