પૈપ્પલાદ-સંહિતા · અધ્યાય 16.79

યૌ તે માતોન્મમાર્જ
જાતાયાઃ પતિવેદનૌ ।
દુર્ણામા તત્ર મા ગૃધદ્
અલિંશ ઉત વત્સપઃ ॥

પલાલાનુપલાલૌ શર્કું
કોકં મલિમ્રુચં પલીજકમ્ ।
આશ્લેષં વવ્રિવાસસમ્
ઋક્ષગ્રીવં પ્રમીલિનં
મુષ્કયોર્ અપ હન્મસિ ॥

મા સં વૃતો મોપ સૃપ
ઊરૂ માવ સૃપો ઽન્તરા ।
કૃણોમ્ય્ અસ્યૈ ભેષજં
બજં દુર્ણામચાતનમ્ ॥

દુર્ણામા ચ સુનામા ચ-
-ઉભૌ સંવૃતમ્ ઇચ્છતઃ ।
અરાયમ્ અપ હન્મસિ
સુનામા સ્ત્રૈણમ્ ઇચ્છતામ્ ॥

યઃ કૃષ્ણઃ કેશ્ય્ અસુર
સ્તમ્બજા ઉત તણ્ડિકઃ ।
અરાયાન્ અસ્યા ભંસસો
મુષ્કયોર્ અપ હન્મસિ ॥

અનુજિઘ્રં પ્રમૃશન્તં
ક્રવ્યાદમ્ ઉત રેરિહમ્ ।
અરાયં શ્વકિષ્કિણં
બજઃ પિઙ્ગો અનીનશત્ ॥

યસ્ ત્વા સુપ્તાં ત્સરતિ
યશ્ ચ દિપ્સતિ જાગ્રતીમ્ ।
છાયામ્ ઇવ પ્ર તાન્ સૂર્યઃ
પરિક્રામમ્ અનીનશત્ ॥

યસ્ ત્વા સુપ્તાં નિપદ્યતે
ભ્રાતા ભૂત્વા પિતેવ ચ ।
બજસ્ ત્વં સહતામ્ ઇતઃ
ક્લીબરૂપં તિરીટિનમ્ ॥

યઃ કૃણોત્ય્ અવતોકાં
મૃતવત્સામ્ ઇમાં સ્ત્રિયમ્ ।
તમ્ ઓષધે ત્વં નાશય-
-અસ્યાઃ કમલમ્ અઞ્જિવમ્ ॥

યે શાલાઃ પરિનૃત્યન્તિ
સાયં ગર્દભનાદિનઃ
કુસૂલા યે ચ કુક્ષિલાઃ
કકુભાઃ સરમાઃ સુમાઃ ।
તાન્ ઓષધે ત્વં ગન્ધેન
વિષૂચીનાન્ વિ નાશય ॥