પૈપ્પલાદ-સંહિતા · અધ્યાય 12.18

અગ્નાવ્ અગ્નિશ્ ચરતિ પ્રવિષ્ટ
ઋષીણાં પુત્રો અધિરાજ એષઃ ।
તસ્મૈ જુહોમિ હવિષા ઘૃતેન
મા દેવાનાં યૂયવદ્ ભાગધેયમ્ ॥

યુક્તો વહ જાતવેદઃ પુરસ્તાદ્
અગ્ને વિદ્ધિ ક્રિયમાણં યથેદમ્ ।
ત્વં ભિષગ્ ભેષજસ્યાપિ કર્તા
ત્વયા ગામ્ અશ્વં પુરુષં સનેમ ॥

તથા ત્વમ્ અગ્ને કૃણુ જાતવેદો
ઽનેન વિદ્વાન્ હવિષા યવિષ્ઠ ।
પિશાચો અસ્ય યતમો જઘાસ
યથા સો અસ્ય પરિધિષ્ પતાતિ ॥

યો ઽસ્ય દિદેવ યતમો જઘાસ
યથા સો અસ્ય પરિધિષ્ પતાતિ ।
તથા ત્વમ્ અગ્ને કૃણુ જાતવેદો
વિશ્વેભિર્ દેવૈઃ સહ સંવિદાનઃ ॥

અક્ષ્યૌ નિ વિધ્ય હૃદયં નિ વિધ્ય
જિહ્વાં નિ તૃન્ધિ પ્ર દતઃ શૃણીહિ ।
પિશાચો અસ્ય યતમો જઘાસ-
-અગ્ને યવિષ્ઠ પ્રતિ તં શૃણીહિ ॥

યદ્ અસ્ય હૃતં વિહૃતં યત્ પરાભૃતમ્
આત્મનો જગ્ધમ્ ઉત યત્ પિશાચૈઃ ।
તદ્ અગ્ને વિદ્વાન્ પુનર્ આ ભર
ત્વં શરીરે પ્રાણમ્ અસુમ્ એરયાસ્ય ॥

અપાં ત્વા પાને યતમો દદમ્ભ-
-ઓદને મન્થે યદિ વોત લેહે ।
તદ્ આત્મના પ્રજયા પિશાચા
વિ યાતયન્તામ્ અગદો ઽયમ્ અસ્તુ ॥

ક્ષીરે ત્વા માંસે યતમો દદમ્ભ-
-અકૃષ્ટપચ્યે અશને ધાન્યે યઃ ।
તદ્ આત્મના પ્રજયા પિશાચા
વિ યાતયન્તામ્ અગદો ઽયમ્ અસ્તુ ॥

આમે સુપક્વે શબલે વિપક્વે
ય ઇમં પિશાચો અશને દદમ્ભ ।
તમ્ ઇન્દ્રો વાજી વજ્રેણ હન્તુ
ભિનત્તુ સોમઃ શિરો અસ્ય ધૃષ્ણુઃ ॥

દિવા ત્વા નક્તં યતમો દદમ્ભ
ક્રવ્યાદ્ યાતુઃ શયને પિશાચઃ ।
તદ્ અગ્ને વિદ્વાન્ પ્ર દહ ક્ષિણીહ્ય્
અપ્ય્ એનં ધેહિ નિરૃતેર્ ઉપસ્થે ॥