Paippalāda-Saṃhitā · Chapter 12.18

agnāv agniś carati praviṣṭa
ṛṣīṇāṃ putro adhirāja eṣaḥ |
tasmai juhomi haviṣā ghṛtena
mā devānāṃ yūyavad bhāgadheyam ||

yukto vaha jātavedaḥ purastād
agne viddhi kriyamāṇaṃ yathedam |
tvaṃ bhiṣag bheṣajasyāpi kartā
tvayā gām aśvaṃ puruṣaṃ sanema ||

tathā tvam agne kṛṇu jātavedo
'nena vidvān haviṣā yaviṣṭha |
piśāco asya yatamo jaghāsa
yathā so asya paridhiṣ patāti ||

yo 'sya dideva yatamo jaghāsa
yathā so asya paridhiṣ patāti |
tathā tvam agne kṛṇu jātavedo
viśvebhir devaiḥ saha saṃvidānaḥ ||

akṣyau ni vidhya hṛdayaṃ ni vidhya
jihvāṃ ni tṛndhi pra dataḥ śṛṇīhi |
piśāco asya yatamo jaghāsa-
-agne yaviṣṭha prati taṃ śṛṇīhi ||

yad asya hṛtaṃ vihṛtaṃ yat parābhṛtam
ātmano jagdham uta yat piśācaiḥ |
tad agne vidvān punar ā bhara
tvaṃ śarīre prāṇam asum erayāsya ||

apāṃ tvā pāne yatamo dadambha-
-odane manthe yadi vota lehe |
tad ātmanā prajayā piśācā
vi yātayantām agado 'yam astu ||

kṣīre tvā māṃse yatamo dadambha-
-akṛṣṭapacye aśane dhānye yaḥ |
tad ātmanā prajayā piśācā
vi yātayantām agado 'yam astu ||

āme supakve śabale vipakve
ya imaṃ piśāco aśane dadambha |
tam indro vājī vajreṇa hantu
bhinattu somaḥ śiro asya dhṛṣṇuḥ ||

divā tvā naktaṃ yatamo dadambha
kravyād yātuḥ śayane piśācaḥ |
tad agne vidvān pra daha kṣiṇīhy
apy enaṃ dhehi nirṛter upasthe ||