પૈપ્પલાદ-સંહિતા · અધ્યાય 12.19

સોમસ્યેન્દ્રસ્ય વરુણસ્ય રાજ્ઞો
વિષ્ણોર્ બલેન સવિતુઃ સવેન ।
અગ્નેર્ હોત્રેણ પ્ર ણુદે પિશાચાન્
યવિષ્ઠસ્ય બ્રહ્મણા જાતવેદસઃ ॥

ક્રવ્યાદમ્ અગ્ને રુધિરં પિશાચં
મનોહનં જહિ જાતવેદઃ સહોભિઃ ।
શ્રદ્ધેમં બ્રહ્મ જુષતાં દક્ષિણાયુર્
યથા જીવાત્ય્ અગદો ભવાતિ ॥

પુનસ્ ત્વા પ્રાણઃ પુનર્ ઐત્વ્ આયુઃ
પુનશ્ ચક્ષુઃ પુનર્ ઐતુ શ્રોત્રમ્ ।
અપઘ્ના નો દુરિતાનિ વિશ્વા
શતં હિમાઃ સર્વવીરા મદેમ ॥

પુનર્ અસ્મૈ મનો ધેહિ
પુનર્ આયુઃ પુનર્ બલમ્ ।
અપાનામ્ અસ્ય પ્રાણં ચ-
-અગ્ને વર્ધય જીવસે ॥

ચક્ષુઃ સૂર્ય પુનર્ દેહિ
વાત પ્રાણં સમ્ ઈરય ।
શરીરમ્ અસ્ય માંસાન્ય્
અગ્ને સં ભારયા ત્વમ્ ॥

સમ્ આ ભર જાતવેદો
યજ્ જગ્ધં યત્ પરાભૃતમ્ ।
ગાત્રાણ્ય્ અસ્ય કલ્પય
પુનર્ આ પ્યાયતામ્ અયમ્ ॥

સોમસ્યેવ જાતવેદો
અંશુર્ આ પ્યાયતામ્ અયમ્ ।
અગ્ને વિરપ્સિનં મેધ્યમ્
અયક્ષ્મં કૃણુ જીવસે ॥

સં મા સિઞ્ચન્તુ મરુત ઇત્ય્ એકા ॥

વિ મુઞ્ચામિ બ્રહ્મણા જાતવેદસમ્
અગ્નિં હોતારમ્ અજરં રથસ્પૃતમ્ ।
સર્વા દેવાનાં જનિમાનિ વિદ્વાન્
યથાભાગં વહતુ હવ્યમ્ અગ્નિઃ ॥

યે પુમાંસો યાતુધાન
યા સ્ત્રિયો યાતુધાન્યઃ ।
બલવદ્ ઇન્દ્રસ્ય વજ્રેણ-
-અવાચીનાન્ અવ હન્મિ તાન્ ॥