પદ્મ પુરાણ · અધ્યાય 6.91

નારદ ઉવાચ-
ઇત્યુક્ત્વા ભગવાન્વિષ્ણુઃ શફરીતુલ્યરૂપધૃક્ ।
સ પપાતાંજલૌ વિંધ્યે નિવાસે કશ્યપસ્ય ચ

સ તં કમંડલૌ ક્ષિપ્રં કૃપયા ક્ષિપ્તવાન્મુનિઃ ।
તાવત્સ ન મમૌ તત્ર તતઃ કૂપે ન્યવેશયત્

તત્રાપિ ન મમૌ તાવત્કાસારે પ્રાક્ષિપત્સતામ્ ।
એવં સ સાગરે ક્ષિપ્તસ્તત્ર સોઽપ્યન્વવર્દ્ધત

તતોઽવધીત્સ તં શંખં વિષ્ણુર્વૈ મત્સ્યરૂપધૃક્ ।
અથ તં સ્વકરે ધૃત્વા બદરીવનમાગતઃ

તત્રાહૂય ઋષીન્સર્વાનિદમાજ્ઞાપયદ્વિભુઃ ।
શ્રીકૃષ્ણ ઉવાચ-
જલાંતરે વિશીર્ણાંસ્તુ યૂયં વેદાન્પ્રમાર્જથ

આનયધ્વં ચ ત્વરિતાઃ સરહસ્યં જલાંતરાત્ ।
તાવત્પ્રયાગે તિષ્ઠામિ દેવતાગણસંયુતઃ

નારદ ઉવાચ-
તતસ્તૈઃ સર્વમુનિભિસ્તપોબલસમન્વિતૈઃ ।
ઉદ્ધારિતાઃ ષડંગાસ્તે વેદા યજ્ઞસમન્વિતાઃ

તેષુ યાવન્મિતં યેન લબ્ધં તાવન્મિતસ્ય હિ ।
સ સ એવ ઋષિર્જાતસ્તદાપ્રભૃતિ પાર્થિવ

અથ સર્વેઽપિ સંગમ્ય પ્રયાગં મુનયો યયુઃ ।
વિષ્ણવે સવિધાત્રે તે લબ્ધાન્વેદાન્ન્યવેદયન્

લબ્ધ્વા વેદાન્સયજ્ઞાંસ્તુ બ્રહ્માહર્ષસમન્વિતઃ ।
અયજચ્ચાશ્વમેધેન દેવર્ષિગણસંવૃતઃ

યજ્ઞા તે દેવદેવેશ સિદ્ધપન્નગગુહ્યકાઃ ।
નિપત્ય દંડવદ્ભૂમૌ વિજ્ઞપ્તિં તત્ર ચક્રિરે

દેવા ઊચુઃ।
દેવદેવજગન્નાથ વિજ્ઞપ્તિં શૃણુ નઃ પ્રભો ।
હર્ષકાલોઽયમસ્માકં તસ્માત્ત્વં વરદો ભવ

સ્થાનેઽસ્મિન્નૃષયો વેદાન્નષ્ટાન્પ્રાપુઃ પુનઃ સ્વયમ્ ।
યજ્ઞભાગાન્વયં પ્રાપ્તાસ્ત્વત્પ્રસાદાદ્રમાપતે

સ્થાનમેતદપિ શ્રેષ્ઠં પૃથિવ્યાં પુણ્યવર્દ્ધનમ્ ।
ભુક્તિમુક્તિપ્રદં ચાસ્તુ પ્રસાદાદ્ભવતઃ સદા

કાલોઽપ્યયં મહાપુણ્યો બ્રહ્મઘ્નાદિવિશુદ્ધિકૃત્ ।
દત્તાક્ષયકરશ્ચાસ્તુ વરમેતદ્વદસ્વ નઃ

શ્રીવિષ્ણુરુવાચ।
મમાપ્યેતન્મતં દેવા યદ્ભવદ્ભિરુદાહૃતમ્ ।
તત્તથાસ્તુ લભત્વેતદ્બ્રહ્મક્ષેત્રમિતિ પ્રથામ્

સૂર્યવંશોદ્ભવો રાજા ગંગામત્રાનયિષ્યતિ ।
સા સૂર્યકન્યયા ચાત્ર કાલિંદ્યા સંગમિષ્યતિ

યૂયં ચ સર્વે બ્રહ્માદ્યા નિવસધ્વં મયા સહ ।
તીર્થરાજેઽતિ વિખ્યાતં તીર્થમેતદ્ભવિષ્યતિ

દાનં તપો વ્રતં હોમો જપપૂજાદિકાઃ ક્રિયાઃ ।
અનંતફલદાઃ સંતુ મત્સાંનિધ્યપ્રદાઃ સદા

બ્રહ્મહત્યાદિ પાપાનિ બહુજન્મકૃતાન્યપિ ।
દર્શનાદસ્ય તીર્થસ્ય વિનાશં યાંતુ તત્ક્ષણાત્

દેહત્યાગં તથા ધીરાઃ કુર્વંતિ મમ સન્નિધૌ ।
મત્તનું પ્રવિશંત્યેવ પુનર્જન્મનિ નો નરાઃ

પિતૄન્નિર્દિશ્ય યે શ્રાદ્ધં કુર્વંત્યત્ર સમાગતાઃ ।
તેષાં પિતૃગણાઃ સર્વે યાંતુ તે મત્સલોકતામ્

કાલોઽપ્યેષ મહાપુણ્યફલદોઽસ્તુ સદા નૃણામ્ ।
સૂર્ય્યે મકરગે પ્રાતઃ સ્નાયિનાં પાપનાશનમ્

મકરસ્થરવૌ માઘે પ્રાતઃ સ્નાનં પ્રકુર્વતામ્ ।
દર્શનાદેવ પાપાનિ યાંતિ સૂર્યાદ્યથા તમઃ

સલોકત્વં સરૂપત્વં સમીપત્વં ત્રયં ક્રમાત્ ।
નૃણાં દદામ્યહં સ્નાનાન્માઘે મકરગે રવૌ

યૂયં મુનીશ્વરાઃ સર્વે શૃણુધ્વં વરદોઽસ્મિ વઃ ।
બદરીવનમધ્યેઽહં સદા તિષ્ઠામિ સર્વગઃ

અન્યત્ર દશભિર્વર્ષૈસ્તપસાવાપ્યતે ફલમ્ ।
તદત્ર દિવસૈકેન ભવદ્ભિઃ પ્રાપ્યતે સદા

સ્થાનસ્ય દર્શનં તસ્ય યે કુર્વંતિ નરોત્તમાઃ ।
જીવન્મુક્તાસ્તદા તેષુ પાપં નૈવાવતિષ્ઠતે

સૂત ઉવાચ-
એવં દેવાન્દેવદેવસ્તદુક્ત્વા તત્રૈવાંતર્દ્ધાનમાગાત્સ વેધાઃ ।
દેવાઃ સર્વેઽપ્યંશકૈસ્તત્ર તસ્થુશ્ચાંતર્દ્ધાનં પ્રાપુરિંદ્રાદયસ્તે

ઇમાં ચ ગાથાં શૃણુયાન્નરોત્તમો યઃ શ્રાવયેદ્વાપિ વિશુદ્ધચિત્તઃ ।
સ તીર્થરાજં બદરીવનં યત્કૃત્વા ફલં માં સમવાપ્નુયાચ્ચ

ઇતિ શ્રીપાદ્મે મહાપુરાણે ઉત્તરખંડે પંચપંચાશત્સહસ્રસંહિતાયાં કાર્તિકમાહાત્મ્યે શ્રીકૃષ્ણસત્યભામાસંવાદે શંખાસુરવધો વેદાગમે પ્રયાગમાહાત્મ્યં નામૈકનવતિ-તમોઽધ્યાયઃ