Padma Purana · Chapter 6.91

nārada uvāca-
ityuktvā bhagavānviṣṇuḥ śapharītulyarūpadhṛk /
sa papātāṃjalau viṃdhye nivāse kaśyapasya ca

sa taṃ kamaṃḍalau kṣipraṃ kṛpayā kṣiptavānmuniḥ /
tāvatsa na mamau tatra tataḥ kūpe nyaveśayat

tatrāpi na mamau tāvatkāsāre prākṣipatsatām /
evaṃ sa sāgare kṣiptastatra so'pyanvavarddhata

tato'vadhītsa taṃ śaṃkhaṃ viṣṇurvai matsyarūpadhṛk /
atha taṃ svakare dhṛtvā badarīvanamāgataḥ

tatrāhūya ṛṣīnsarvānidamājñāpayadvibhuḥ /
śrīkṛṣṇa uvāca-
jalāṃtare viśīrṇāṃstu yūyaṃ vedānpramārjatha

ānayadhvaṃ ca tvaritāḥ sarahasyaṃ jalāṃtarāt /
tāvatprayāge tiṣṭhāmi devatāgaṇasaṃyutaḥ

nārada uvāca-
tatastaiḥ sarvamunibhistapobalasamanvitaiḥ /
uddhāritāḥ ṣaḍaṃgāste vedā yajñasamanvitāḥ

teṣu yāvanmitaṃ yena labdhaṃ tāvanmitasya hi /
sa sa eva ṛṣirjātastadāprabhṛti pārthiva

atha sarve'pi saṃgamya prayāgaṃ munayo yayuḥ /
viṣṇave savidhātre te labdhānvedānnyavedayan

labdhvā vedānsayajñāṃstu brahmāharṣasamanvitaḥ /
ayajaccāśvamedhena devarṣigaṇasaṃvṛtaḥ

yajñā te devadeveśa siddhapannagaguhyakāḥ /
nipatya daṃḍavadbhūmau vijñaptiṃ tatra cakrire

devā ūcuḥ/
devadevajagannātha vijñaptiṃ śṛṇu naḥ prabho /
harṣakālo'yamasmākaṃ tasmāttvaṃ varado bhava

sthāne'sminnṛṣayo vedānnaṣṭānprāpuḥ punaḥ svayam /
yajñabhāgānvayaṃ prāptāstvatprasādādramāpate

sthānametadapi śreṣṭhaṃ pṛthivyāṃ puṇyavarddhanam /
bhuktimuktipradaṃ cāstu prasādādbhavataḥ sadā

kālo'pyayaṃ mahāpuṇyo brahmaghnādiviśuddhikṛt /
dattākṣayakaraścāstu varametadvadasva naḥ

śrīviṣṇuruvāca/
mamāpyetanmataṃ devā yadbhavadbhirudāhṛtam /
tattathāstu labhatvetadbrahmakṣetramiti prathām

sūryavaṃśodbhavo rājā gaṃgāmatrānayiṣyati /
sā sūryakanyayā cātra kāliṃdyā saṃgamiṣyati

yūyaṃ ca sarve brahmādyā nivasadhvaṃ mayā saha /
tīrtharāje'ti vikhyātaṃ tīrthametadbhaviṣyati

dānaṃ tapo vrataṃ homo japapūjādikāḥ kriyāḥ /
anaṃtaphaladāḥ saṃtu matsāṃnidhyapradāḥ sadā

brahmahatyādi pāpāni bahujanmakṛtānyapi /
darśanādasya tīrthasya vināśaṃ yāṃtu tatkṣaṇāt

dehatyāgaṃ tathā dhīrāḥ kurvaṃti mama sannidhau /
mattanuṃ praviśaṃtyeva punarjanmani no narāḥ

pitṝnnirdiśya ye śrāddhaṃ kurvaṃtyatra samāgatāḥ /
teṣāṃ pitṛgaṇāḥ sarve yāṃtu te matsalokatām

kālo'pyeṣa mahāpuṇyaphalado'stu sadā nṛṇām /
sūryye makarage prātaḥ snāyināṃ pāpanāśanam

makarastharavau māghe prātaḥ snānaṃ prakurvatām /
darśanādeva pāpāni yāṃti sūryādyathā tamaḥ

salokatvaṃ sarūpatvaṃ samīpatvaṃ trayaṃ kramāt /
nṛṇāṃ dadāmyahaṃ snānānmāghe makarage ravau

yūyaṃ munīśvarāḥ sarve śṛṇudhvaṃ varado'smi vaḥ /
badarīvanamadhye'haṃ sadā tiṣṭhāmi sarvagaḥ

anyatra daśabhirvarṣaistapasāvāpyate phalam /
tadatra divasaikena bhavadbhiḥ prāpyate sadā

sthānasya darśanaṃ tasya ye kurvaṃti narottamāḥ /
jīvanmuktāstadā teṣu pāpaṃ naivāvatiṣṭhate

sūta uvāca-
evaṃ devāndevadevastaduktvā tatraivāṃtarddhānamāgātsa vedhāḥ /
devāḥ sarve'pyaṃśakaistatra tasthuścāṃtarddhānaṃ prāpuriṃdrādayaste

imāṃ ca gāthāṃ śṛṇuyānnarottamo yaḥ śrāvayedvāpi viśuddhacittaḥ /
sa tīrtharājaṃ badarīvanaṃ yatkṛtvā phalaṃ māṃ samavāpnuyācca

iti śrīpādme mahāpurāṇe uttarakhaṃḍe paṃcapaṃcāśatsahasrasaṃhitāyāṃ kārtikamāhātmye śrīkṛṣṇasatyabhāmāsaṃvāde śaṃkhāsuravadho vedāgame prayāgamāhātmyaṃ nāmaikanavati-tamo'dhyāyaḥ