પદ્મ પુરાણ · અધ્યાય 6.87

મહેશ્વર ઉવાચ-
ચૈત્રે તુ ચંપકેનૈવ જાતીપુષ્પેણ વા પુનઃ ।
પૂજનીયઃ પ્રયત્નેન કેશવઃ ક્લેશનાશનઃ

દમનકૈર્મરુકૈશ્ચૈવ બિલ્વપુષ્પૈરથાપિ વા ।
પૂજયેજ્જગતામીશં વિષ્ણું સર્વેશ્વરેશ્વરમ્

શતપત્રૈસ્તથાદિવ્યૈ રક્તૈર્વા સુસમાહિતઃ ।
પૂજયંતિ નરા વિષ્ણું ચૈત્રમાસે સુરેશ્વરિ

વૈશાખે તુ સદા દેવિ હ્યર્ચનીયો મહત્પ્રભુઃ ।
કેતકીપત્રમાદાય વૃષસ્થે ચ દિવાકરે

યેનાર્ચિતો હરિર્ભક્ત્યા પ્રીતો મન્વંતરં શતમ્ ।
જ્યેષ્ઠે માસે તુ સંપ્રાપ્તે નાનાપુષ્પૈઃ પ્રપૂજયેત્

પૂજિતે દેવદેવેશે સર્વે દેવાઃ સુપૂજિતાઃ ।
કૃત્વા પાપસહસ્રાણિ મહાપાપશતાનિ ચ

તેપિ યાસ્યંતિ ભો દેવિ યત્ર વિષ્ણુઃ શ્રિયા સહ ।
આષાઢે માસિ સંપ્રાપ્તે પૂજાં કુર્યાદ્વિશેષતઃ

કરવીરૈરક્તપુષ્પૈસ્તથાબ્જૈર્વા સદા નરાઃ ।
પૂજાં કુર્વંતિ યે વિષ્ણોસ્તે જ્ઞેયાઃ પુણ્યભાગિનઃ

જાતરૂપનિભૈર્વિષ્ણું કદંબકુસુમૈસ્તથા ।
યેઽર્ચયિષ્યંતિ ગોવિંદં ન તેષાં સૌરિજં ભયમ્

ઘનાગમે ઘનશ્યામઃ કદંબકુસુમાર્ચિતઃ ।
દદાતિ વાંછિતાન્કામાન્યાવદિંદ્રાશ્ચતુર્દશ

યથા પદ્માલયાં પ્રાપ્ય પ્રીતો ભવતિ માધવઃ ।
કદંબકુસુમં લબ્ધ્વા પ્રીતો ભવતિ લોકકૃત્

તુલસી કૃષ્ણતુલસી વંજુલૈર્વા સુરેશ્વરિ ।
સર્વદા પૂજિતો વિષ્ણુઃ કષ્ટં હરતિ નિત્યશઃ

શ્રાવણે માસિ સંપ્રાપ્તે યેઽર્ચયંતિ જનાર્દનમ્ ।
અતસીપુષ્પમાદાય તથા દૂર્વાદલેન તુ

નાનાપુષ્પૈર્વિશેષેણ પૂજનીયઃ પ્રયત્નતઃ ।
દદાતિ વિપુલાન્કામાન્યાવદાભૂતસંપ્લવમ્

ભાદ્ર માસે તુ સંપ્રાપ્તે શૃણુ ત્વં નગનંદિનિ ।
ચંપકૈર્વા શ્વેતપુષ્પૈરક્તસિંદૂરકૈસ્તથા

કહ્લારૈર્વા મહાદેવિ સર્વકામફલં લભેત્ ।
આશ્વિને વૈ શુભેમાસે કર્ત્તવ્યં વિષ્ણુપૂજનમ્

યૂથિકાનવજાતીભિસ્તથા નાનાવિધૈઃ શુભૈઃ ।
પૂજનીયઃ પ્રયત્નેન ભક્તિપૂર્વં સદા જનૈઃ

પદ્માન્યેવ સમાનીય યેઽર્ચયંતિ જનાર્દનમ્ ।
ધર્માર્થકામમોક્ષાંસ્તે લભંતે માનવા ભુવિ

કાર્તિકેમાસિ સંપ્રાપ્તે પૂજનીયો મહેશ્વરઃ ।
યાવંતિ ઋતુપુષ્પાણિ દેયાનિ માધવસ્ય ચ

તિલાનિ તિલપુષ્પાણિ તૈર્વા હ્યર્ચનકં ચરેત્ ।
પૂજિતે સતિ દેવેશિ અનંતફલમશ્નુતે

બકુલપુષ્પૈઃ પુન્નાગૈશ્ચંપકૈર્વા જનાર્દનમ્ ।
કાર્તિકે પૂજયિષ્યંતિ તે દેવા ન હિ માનવાઃ

માર્ગશીર્ષે પ્રયત્નેન પૂજનીયઃ સદા પ્રભુઃ ।
નાનાપુષ્પૈઃ સનૈવેદ્યૈર્ધૂપૈર્નીરાજનૈસ્તથા

માર્ગશીર્ષે વિશેષેણ દિવ્યૈઃ પુષ્પૈઃ પ્રપૂજયેત્ ।
પૌષમાસે મહાદેવિ સ્વર્ચનં શુભદં સ્મૃતમ્

નાનાતુલસિપત્રૈશ્ચ મૃગનાભિજલૈસ્તથા ।
માઘમાસે તુ સંપ્રાપ્તે નાનાપુષ્પૈઃ પ્રપૂજયેત્

પૂજિતે દેવદેવેશે વાંછિતં લભતે ધ્રુવમ્ ।
કર્પૂરજા તથા પૂજા નાનાનૈવેદ્યમોદકૈઃ

ફાલ્ગુને ચૈવ સંપ્રાપ્તે હ્યર્ચનં માધવસ્ય ચ ।
કૃત્વા વાસંતિકીં પૂજાં પુષ્પાણ્યાદાય સર્વશઃ

નવીનૈર્વાથ દેવેશિ સર્વૈર્વા પૂજયેત્તતઃ ।
પૂજિતે તુ જગન્નાથે વૈકુંઠપદમવ્યયમ્ ।
પ્રાપ્નોતિ પુરુષો નિત્યં શ્રીવિષ્ણોશ્ચ પ્રસાદતઃ

ઇતિ શ્રીપાદ્મે મહાપુરાણેપંચપંચાશત્સહસ્રસંહિતાયામુત્તરખંડે ઉમામહેશ્વરસંવાદે માસિકપુષ્પોનામ સપ્તાશીતિતમોઽધ્યાયઃ