પદ્મ પુરાણ · અધ્યાય 6.8

યુધિષ્ઠિર ઉવાચ-
દેવાન્વિક્લાવ્ય સમરે વિષ્ણું સ્થાપ્યાત્મમંદિરે ।
જાલંધરેણાબ્ધિજેન યત્કૃતં બ્રૂહિ નારદ

નારદ ઉવાચ-।
શુંભાદીનાં તુ વીરાણાં દત્ત્વા દાનં પ્રસાદજમ્ ।
જાલંધરો જગામાથ સ્વર્ગં પ્રાપ્યાવલોકયત્

હિરણ્યવર્ષેણ જનાન્ભૂષયંતં દિનેદિને ।
ફલંતિ તરવોઽજસ્રં વાજિમેધક્રતોઃ ફલમ્

ગજવસ્ત્રસુવર્ણાનિ ધેનુ કન્યા તિલાનિ ચ ।
પુષ્પકર્પૂરતાંબૂલ કસ્તૂરી કુંકુમાનિ ચ

યે યચ્છંતિ મહાત્માનસ્તે પશ્યંત્યમરાવતીમ્ ।
વર્ષાસુ ગૃહદાનેન શિશિરેઽગ્નિપ્રદાનતઃ

વાદિત્રાણિ ચ સર્વાણિ વાદયંતિ શિવાલયે ।
પ્રપાં કુર્વંતિ યે ચૈત્રે દધ્યોદનસમન્વિતામ્

યત્ર હિંદોલપર્યંકં સ્વયમાંદોલયંતિ ચ ।
સારિકાશુકહંસાશ્ચ ભ્રમદ્ભ્રમરકોકિલાઃ

કુર્વંતો દૂતકાર્યાણિ યચ્છંતે પ્રિયસંગમમ્ ।
રંભા યત્ર પુરે રામ મેનકા ચ તિલોત્તમા

સુષમા સુંદરી યત્ર ઘૃતાચી પુંજિકસ્થલી ।
સુકેશી સુમુખી રામા મંજુઘોષા ચ માલિની

મૃગોદ્ભવા ચ સુખદા ધનદંષ્ટ્રા તિલપ્રભા ।
વાજિમેધફલગ્રાહા રાજસૂયફલંતિ યાઃ

કોટિશો યત્ર નિઃષ્પાપાઃ ક્રીડંત્યપ્સરસો નૃપ ।
એવં ભૂરિસુખે સ્વર્ગે સ્થાપયામાસ સિંધુજઃ

શુંભં પ્રાણસમં દૈત્યં નિશુંભં યુવરાજકે ।
સ્વયં જાલંધરે પીઠે સ્વર્ગાદાગત્ય સિંધુરાટ્ ।
વર્ષાર્બુદદ્વયં રાજ્યં ચકારાત્મબલેન ચ

યુધિષ્ઠિર ઉવાચ-।
યુયુધેઽસુર સંગ્રામે સસુરૈરપરાજિતઃ

તતઃ કિમકરોદ્રાજા સિંધુસૂનુઃ પ્રતાપવાન્ ।
તન્મમાચક્ષ્વ દેવર્ષે શ્રોતુકામસ્ય વિસ્તરાત્

નારદ ઉવાચ-।
શૃણુ રાજન્યથાતથ્યં કૃતસાગરસૂનુના ।
સ દેવાન્સમરે જિત્વા રાજ્યં ચક્રે હ્યકંટકમ્

ગંધર્વાશ્ચિત્રસેનાદ્યાઃ સેવંતે ચાસુરેશ્વરમ્ ।
યજ્ઞભાગાંશ્ચ યો ભુંક્તે સર્વેષામસુરેશ્વરઃ

ક્ષીરસાગરતો દેવૈર્હૃતં રત્નાદિકં ચ યત્ ।
તત્સર્વં ચ તથાન્યચ્ચ નિર્જિત્ય હૃતવાન્બલી

સમુદ્રતનયે રાજ્યં ભુવો રાજન્પ્રશાસતિ ।
ન કશ્ચિન્મ્રિયતે મર્ત્યો નરકં કોઽપિ ન વ્રજેત્

ન કલિપ્રણયાદન્યો ન ભોગાદપરઃ ક્ષયઃ ।
ન વંધ્યા દુર્ભગા નારી નાલંકારૈર્વિવર્જિતા

કુરૂપા દુર્ગતા દુષ્ટાઽયશસ્યા ન ચ દૃશ્યતે ।
ન તત્ર વિધવા નારી ન કશ્ચિન્નિર્દ્ધનો જનઃ

દાતારઃ સંતિ સર્વત્ર ન પ્રતિગ્રાહિણઃ ક્વચિત્ ।
પુણ્યા જનાઃ પ્રયચ્છંતિ દ્વિજેભ્યો હ્યાત્મનો ધનમ્

રૂપયૌવનશાલિન્યઃ સીમંતિન્યો ગૃહે ગૃહે ।
ગોક્ષીરં દધિસર્પિશ્ચ યત્ર નિર્જરસો જનાઃ

મંગલં તત્ર સર્વેષાં ન ક્વચિદ્વધબંધનમ્ ।
શરેણ ન ચ હિંસાસ્તિ ન કશ્ચિત્કેન બાધ્યતે

ઋણં ન દૃશ્યતે રાજન્ધનિનઃ સંતિ સર્વતઃ ।
સંતુષ્ટાઃ સર્વસસ્યાઢ્યાઃ પ્રજાઃ સર્વત્રપાર્થિવ

કેલીક્ષુદંડપ્રભવશ્ચ દુગ્ધરસોઽતિ સુસ્વાદુતરો ગૃહે નૃણામ્ ।
શુશ્રાવ નારીનરયોર્હિતં વચો ન ચાપહર્તાધ્વનિ ગચ્છતાં સદા

પતંત્યખંડા નભસો યતસ્તતો ધારાશ્ચ કર્મારવિમિશ્રસર્પિષઃ ।
સંમિશ્રિતાઃ શર્કરયા પરિશ્રુતાઃ સમુદ્રસૂનોઃ સ્મરણાન્મુખે નૃણામ્

ઇતિ શ્રીપાદ્મે મહાપુરાણે ઉત્તરખંડે પંચપંચાશત્સહસ્ર-।
સંહિતાયાં યુધિષ્ઠિરનારદસમ્વાદે જાલંધરસૌરાજ્યવર્ણનંનામાષ્ટમોઽધ્યાયઃ