પદ્મ પુરાણ · અધ્યાય 6.76

મહાદેવ ઉવાચ-
શૃણુ સુંદરિ વક્ષ્યામિ સ્તોત્રં ચાભ્યુદયં તતઃ ।
યચ્છ્રુત્વા મુચ્યતે પાપી બ્રહ્મહા નાત્ર સંશયઃ

ધાતા વૈ નારદં પ્રાહ તદહં તુ બ્રવીમિ તે ।
તમુવાચ તતો દેવઃ સ્વયંભૂરમિતદ્યુતિઃ

પ્રગૃહ્ય રુચિરં બાહું સ્મારયેચ્ચૌર્ધ્વદેહિકમ્ ।
ભગવાન્નારાયણઃ શ્રીમાન્દેવશ્ચક્રાયુધોહરિઃ

શાર્ઙ્ગધારી હૃષીકેશઃ પુરાણપુરુષોત્તમઃ ।
અજિતઃ ખડ્ગભૃજ્જિષ્ણુઃ કૃષ્ણશ્ચૈવ સનાતનઃ

એકશૃંગો વરાહસ્ત્વં ભૂતભવ્યભવાત્મકઃ ।
અક્ષરં બ્રહ્મ સત્યં તુ આદૌ ચાંતે ચ રાઘવઃ

લોકાનાં તુ પરો ધર્મો વિષ્વક્સેનશ્ચતુર્ભુજઃ ।
સેનાની રક્ષણસ્ત્વં ચ વૈકુંઠસ્ત્વં જગત્પ્રભુઃ

પ્રભવશ્ચાવ્યયસ્ત્વં ચ ઉપેંદ્રો મધુસૂદનઃ ।
પૃશ્નિગર્ભો ધૃતાર્ચિસ્ત્વં પદ્મનાભો રણાંતકૃત્

શરણ્યં શરણં ચ ત્વામાહુઃ સેન્દ્રા મહર્ષયઃ ।
ઋક્સામશ્રેષ્ઠો વેદાત્મા શતજિહ્વો મહર્ષયઃ

ત્વં યજ્ઞસ્ત્વં વષટ્કારસ્ત્વમોંકારઃ પરંતપઃ ।
શતધન્વા વસુઃ પૂર્વં વસૂનાં ત્વં પ્રજાપતિઃ

ત્રયાણામપિ લોકાનાં આદિકર્તા સ્વયંપ્રભુઃ ।
રુદ્રાણામષ્ટમો રુદ્રઃ સાધ્યાનામપિ પંચમઃ

આશ્વિનૌ ચાપિ કર્ણૌ તે સૂર્યચંદ્રૌ ચ ચક્ષુષી ।
અંતે ચાદૌ ચ મધ્યે ચ દૃશ્યસે ત્વં પરંતપઃ

પ્રભવો નિધનં ચાસ્ય ન વિદુઃ કો ભવાનિતિ ।
દૃશ્યસે સર્વલોકેષુ ગોષુ ચ બ્રહ્મણેષુ ચ

દિક્ષુ સર્વાસુ ગગને પર્વતેષુ ગુહાસુ ચ ।
સહસ્રનયનઃ શ્રીમાઞ્છતશીર્ષઃ સહસ્રપાત્

ત્વં ધારયસિ ભૂતાનિ વસુધાં ચ સપર્વતામ્ ।
અંતઃપૃથિવ્યાં સલિલે સર્વસત્વમહોરગઃ

ત્રીંલ્લોકાન્ધારયન્નાસ્તે દેવગંધર્વદાનવાન્ ।
અહં તે હૃદયં રામ જિહ્વા દેવી સરસ્વતી

દેવા રોમાણિ ગાત્રેષુ નિર્મિતાસ્તે સ્વમાયયા ।
નિમિષસ્તે સ્મૃતા રાત્રિરુન્મેષો દિવસસ્તથા

સંસ્કારસ્તે ભવેદ્દેહો ન તદસ્તિ વિના ત્વયા ।
જગત્સર્વં શરીરે તત્સ્થૈર્યં ચ વસુધાતલમ્

અગ્નિઃ કોપઃ પ્રસાદસ્તે શેષઃ શ્રીમાંશ્ચ લક્ષ્મણઃ ।
ત્વયા લોકાસ્ત્રયઃ ક્રાંતાઃ પુરાણૈર્વિક્રમૈસ્ત્રિભિઃ

ત્વયેંદ્રશ્ચ કૃતો રાજા બલિર્બદ્ધો મહાસુરઃ ।
લોકાન્સંહૃત્ય કાલસ્ત્વં નિવેશ્યાત્મનિ કેવલમ્

કરોષ્યેકાર્ણવં ઘોરં દૃશ્યાદૃશ્યે ચ નાન્યથા ।
ત્વયા સિંહવપુઃ કૃત્વા પરમં દિવ્યમુત્તમમ્

ભયદઃ સર્વભૂતાનાં હિરણ્યકશિપુર્હતઃ ।
ત્વમશ્વવદનો ભૂત્વા પાતાલતલમાશ્રિતઃ

સંહૃતં પરમં હવ્યં રહસ્યં વૈ પુનઃ પુનઃ ।
યત્પરં શ્રૂયતે જ્યોતિર્યત્પરં શ્રૂયતે પરઃ

યત્પરં પરતશ્ચૈ વપરમાત્મેતિ કથ્યતે ।
પરો મંત્રઃ પરં તેજસ્તમેવ હિ નિગદ્યસે

હવ્યં કવ્યં પવિત્રં ચ પ્રાપ્તિઃ સ્વર્ગાપવર્ગયોઃ ।
સ્થિત્યુત્પત્તિવિનાશાંસ્તે ત્વામાહુઃ પ્રકૃતેઃ પરમ્

યજ્ઞશ્ચ યજમાનશ્ચ હોતા ચાધ્વર્યુરેવ ચ ।
ભોક્તા યજ્ઞફલાનાં ચ ત્વં વૈ વેદૈશ્ચ ગીયસે

સીતાલક્ષ્મીર્ભવાન્વિષ્ણુર્દેવઃ કૃષ્ણઃ પ્રજાપતિઃ ।
વધાર્થં રાવણસ્ય ત્વં પ્રવિષ્ટો માનુષીં તનુમ્

તદિદં ચ ત્વયા કાર્યં કૃતં ધર્મભૃતાં વર ।
નિહતો રાવણો રામ પ્રહૃષ્ટા દેવતાઃ કૃતાઃ

અમોઘં દેવવીર્યં તે ન તે મોઘઃ પરાક્રમઃ ।
અમોઘદર્શનં રામ ન ચ મોઘસ્તવ સ્તવઃ

અમોઘાસ્તે ભવિષ્યંતિ ભક્તિમંતો નરા ભુવિ ।
યે ચ ત્વાં દેવ સંભક્તાઃપુરાણં પુરુષોત્તમમ્

ઇમમાર્ષસ્તવં પુણ્યમિતિહાસં પુરાતનમ્ ।
યે નરાઃ કીર્તયિષ્યંતિ નાસ્તિ તેષાં પરાભવઃ

કથમિહ હિ પરાભવં વ્રજેયુઃ પુરુષવરાઃ પુરુષોત્તમે હિ ભક્તાઃ ।
નહિ જગતિ ચતુર્ભુજપ્રિયાણાં ત્રિદશ ઇહાસ્તિ વરપ્રદો વિશિષ્ટઃ

સ્તોત્રાણાં પ્રવરં સ્તોત્રં રાઘવસ્ય મહાત્મનઃ ।
ત્રિકાલે યઃ પઠેન્નિત્યં મહાપાતકવાનપિ

સંધ્યાકાલે દ્વિજશ્રેષ્ઠૈઃ શ્રાદ્ધકાલે વિશેષતઃ ।
પઠનીયં પ્રયત્નેન ભક્તિભાવેન ચેતસા

ઇદં ગોપ્યં હિ પરમં નાખ્યેયં કર્હિચિત્ક્વચિત્ ।
પઠનાન્મુક્તિમાપ્નોતિ સાત્ત્વતઃ સ ભવેદ્ધ્રુવમ્

પ્રથમં પિંડપૂજાંતે બ્રાહ્મણૈર્દ્વિજસત્તમૈઃ ।
પઠિતવ્યમિદં સ્તોત્રં શ્રાદ્ધમક્ષયમાપ્નુયાત્

ઇદં પવિત્રં પરમં જનાનાં મુક્તિદાયકમ્ ।
લિખિત્વા વૈ ગૃહે યસ્તુ ધારયેત્સુસમાધિના

આયુઃ શ્રીશ્ચ બલં તસ્ય વૃદ્ધિં યાતિ દિનેદિને ।
લિખિત્વા બ્રાહ્મણે દદ્યાદ્ધીમાન્યો વૈ કદાચન

વિમુક્તાઃ પૂર્વજાસ્તસ્ય યાંતિ વિષ્ણોઃ પરં પદમ્ ।
ચતુર્ણાં ચૈવ વેદાનાં પાઠે ચૈવ તુ યત્ફલમ્

સમવાપ્નોતિ જાપેન નરઃ સ્તોત્રં પઠન્જપન્ ।
ધૃત્વા વૈ શંખચક્રાદિ બ્રાહ્મણૈર્વેદતત્પરૈઃ

શ્રાદ્ધકાલે મહાદેવિ અક્ષયં તદ્ભવેદ્ધ્રુવમ્ ।
કંઠે પદ્માક્ષમાલાં ચ શંખચક્રાદિધારણમ્

તતઃ શ્રાદ્ધં પ્રકુર્વીત ઇદં સ્તોત્રં પઠન્જપન્ ।
વિધિના ભક્તિભાવેન પૂર્ણં ભવતિ નાન્યથા

અતો ભક્તિમતા પુંસા પઠનીયં પ્રયત્નતઃ ।
પઠનાત્સર્વમાપ્નોતિ સ નરઃ સુખમેધતે

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખંડે ઉમામહેશ્વરસંવાદે આભ્યુદયિકમૂર્ધ્વદૈહિકસ્તોત્રં નામ ષટ્સપ્તતિતમોઽધ્યાયઃ