પદ્મ પુરાણ · અધ્યાય 6.73

મહાદેવ ઉવાચ-
ૐરામરક્ષાસ્તોત્રસ્ય શ્રીમહર્ષિર્વિશ્વામિત્રઋષિઃ ।
શ્રીરામો દેવતા અનુષ્ટુપ્છંદઃ ।
વિષ્ણુપ્રીત્યર્થે જપે વિનિયોગઃ

અતસીપુષ્પસંકાશં પીતવાસસમચ્યુતમ્ ।
ધ્યાત્વા વૈ પુંડરીકાક્ષં શ્રીરામં વિષ્ણુમવ્યયમ્

પાતુ વો હૃદયં રામઃ શ્રીકંઠઃ કંઠમેવ ચ ।
નાભિં પાતુ મખત્રાતા કટિં મે વિશ્વરક્ષકઃ

કરૌ પાતુ દાશરથિઃ પાદૌ મે વિશ્વરૂપધૃક્ ।
ચક્ષુષી પાતુ વૈ દેવ સીતાપતિરનુત્તમઃ

શિખાં મે પાતુ વિશ્વાત્મા કર્ણૌ મે પાતુ કામદઃ ।
પાર્શ્વયોસ્તુ સુરત્રાતા કાલકોટિદુરાસદઃ

અનંતઃ સર્વદા પાતુ શરીરં વિશ્વનાયકઃ ।
જિહ્વાં મે પાતુ પાપઘ્નો લોકશિક્ષાપ્રવર્ત્તકઃ

રાઘવઃ પાતુ મે દંતાન્કેશાન્રક્ષતુ કેશવઃ ।
સક્થિની પાતુ મે દત્ત વિજયો નામ વિશ્વસૃક્

એતાં રામબલોપેતાં રક્ષાં યો વૈ પુમાન્પઠેત્ ।
સ ચિરાયુઃ સુખી વિદ્વાન્લભતે દિવ્યસંપદમ્

રક્ષાં કરોતિ ભૂતેભ્યઃ સદા રક્ષા તુ વૈષ્ણવી ।
રામેતિ રામભદ્રેતિ રામચંદ્રેતિ યઃ સ્મરેત્

વિમુક્તઃ સ નરઃ પાપાન્મુક્તિં પ્રાપ્નોતિ શાશ્વતીમ્ ।
વસિષ્ઠેન ઇદં પ્રોક્તં ગુરવે વિષ્ણુરૂપિણે

તતો મે બ્રહ્મણઃ પ્રાપ્તં મયોક્તં નારદં પ્રતિ ।
નારદેન તુ ભૂર્લોકે પ્રાપિતં સુજનેષ્વિહ

સુપ્ત્વાવાથ ગૃહે વાપિ માર્ગે ગચ્છંત એવ વા ।
યે પઠંતિ નરશ્રેષ્ઠાસ્તે નરાઃ પુણ્યભાગિનઃ

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખંડે ઉમાપતિનારદસંવાદે રામક્ષાસ્તોત્રંનામ ત્રિસપ્તતિતમોઽધ્યાયઃ