પદ્મ પુરાણ · અધ્યાય 6.72

શ્રીમહાદેવ ઉવાચ-
બ્રાહ્મણા વા ક્ષત્રિયા વા વૈશ્યા વા ગિરિકન્યકે ।
શૂદ્રા વાથ વિશેષેણ પઠંત્યનુદિનં યદિ

ધનધાન્યસમાયુક્તા યાંતિ વિષ્ણોઃ પરં પદમ્ ।
શ્લોકં વા શ્લોકમર્દ્ધં વા પાદં પાદાર્દ્ધમેવ વા

પઠનાન્મોક્ષમાપ્નોતિ યાવદાભૂતસંપ્લવમ્ ।
વિન્યાસેન યુતં દેવિ વિષ્ણોર્નામસહસ્રકમ્

યે પઠંતિ નરશ્રેષ્ઠાસ્તે યાંતિ પદમવ્યયમ્ ।
એકકાલં દ્વિકાલં વા ત્રિકાલં વાથ યઃ પઠેત્

ધનાયુર્વર્ધતે તસ્ય યાવદિંદ્રાશ્ચતુર્દશ ।
પુત્રાન્પૌત્રાંસ્તથાલક્ષ્મી સંપદં વિપુલાં લભેત્

કિમન્યદ્બહુનોક્તેન ભૂયો ભૂયો વરાનને ।
વિષ્ણોર્નામસહસ્રં તુ પરં નિર્વાણદાયકમ્

પૂજનં પ્રથમં તસ્ય કૃતં યેન નરેણ તુ ।
સંપૂર્ણં પૂજિતે વિષ્ણૌ તસ્ય પૂજા ચ વાર્ષિકી

વ્યગ્રત્વં ચ ન કર્ત્તવ્યં પઠને તુ વિશેષતઃ ।
યદિ ચેત્ક્રિયતે પાઠે હ્યાયુર્વિત્તં ચ નશ્યતિ

યાવંતિ ભુવિ તીર્થાનિ જંબુદ્વીપેષુ સર્વદા ।
તાનિ તીર્થાનિ તત્રૈવ વિષ્ણોર્નામસહસ્રકમ્

તત્રૈવ ગંગા યમુના ચ વેણી ગોદાવરી તત્ર સરસ્વતી ચ ।
સર્વાણિ તીર્થાનિ વસંતિ તત્ર યત્ર સ્થિતં નામસહસ્રકં તત્

ઇદં પવિત્રં પરમં ભક્તાનાં વલ્લભં સદા ।
ધ્યેયં હિ દાસભાવેન ભક્તિભાવેન ચેતસા

પરં સહસ્રનામાખ્યં યે પઠંતિ મનીષિણઃ ।
સર્વપાપવિનિર્મુક્તાસ્તે યાંતિ હરિસંનિધૌ

અરુણોદયકાલે તુ યે પઠંતિ જપંતિ ચ ।
આયુર્બલં ચ તેષાં શ્રીર્વર્દ્ધતે ચ દિનેદિને

રાત્રૌ જાગરણે પ્રાપ્તે કલૌ ભાગવતો નરઃ ।
પઠનાન્મુક્તિમાપ્નોતિ યાવદિંદ્રાશ્ચતુર્દશ

એકૈકેન તુ નામ્ના વૈ હરૌ તુલસિકારણાત્ ।
પૂજા સા ચૈવ વિજ્ઞેયા કોટિયજ્ઞફલાધિકા

માર્ગે ચ ગચ્છમાનાસ્તુ યે પઠંતિ દ્વિજાતયઃ ।
ન દોષા માર્ગજાસ્તેષાં ભવંતિ કિલ પાર્વતિ

શૃણુ દેવિ પ્રવક્ષ્યામિ માહાત્મ્યં કેશવસ્ય તુ ।
યે શૃણ્વંતિ નરશ્રેષ્ઠાસ્તે પુણ્યાઃ પુણ્યરૂપિણઃ

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખંડે ઉમાપતિનારદસંવાદે સહસ્રનામમહિમાનામ દ્વિસપ્તતિતમોઽધ્યાયઃ