પદ્મ પુરાણ · અધ્યાય 6.71

ઋષય ઊચુઃ -
સૂત જીવ ચિરં સાધો ત્વયાતિકરુણાત્મના ।
સંવાદો હ્યદ્ભુતઃ પ્રોક્તો યશ્ચાસીન્નારદેશયોઃ

ભગવન્નામમહિમા નારદેન મહાત્મના ।
કીદૃક્શ્રુતઃ સમાખ્યાહિ શ્રદ્ધયા શૃણ્વતાં ગુરો

સૂત ઉવાચ-
શૃણુધ્વં મુનયઃ સર્વે પુરાવૃત્તં વદામ્યહમ્ ।
યસ્મિઞ્છ્રુતે દ્વિજશ્રેષ્ઠાઃ કૃષ્ણે ભક્તિર્વિવર્દ્ધતે

એકદા નારદો દ્રષ્ટું પિતરં સુસમાહિતઃ ।
જગામ મેરુશિખરં સિદ્ધચારણસેવિતમ્

તત્ર દેવં સમાસીનં બ્રહ્માણં જગતાં પતિમ્ ।
નમસ્કૃત્યાબ્રવીદ્વિપ્રા નારદો મુનિસત્તમઃ

નારદ ઉવાચ-
નામ્નોઽસ્ય યાવતીશક્તિર્વદ વિશ્વેશ્વર પ્રભો ।
કીદૃક્તુ નામમહિમા અવ્યયસ્ય મહાત્મનઃ

યોઽયં વિશ્વેશ્વરઃ સાક્ષાદયં નારાયણો હરિઃ ।
પરમાત્મા હૃષીકેશઃ સર્વજીવેષુ સંગતઃ

માયાવિમોહિતાઃ સર્વે ભગવંતમધોક્ષજમ્ ।
નૈવ જાનંત્યસારેઽસ્મિન્નરા મૂઢાઃ કલૌ યુગે

બ્રહ્મોવાચ-
અસ્મિન્કલૌ વિશેષેણ નામોચ્ચારણપૂર્વકમ્ ।
ભક્તિઃ કાર્યા યથા વત્સ તથા ત્વં શ્રોતુમર્હસિ

દૃષ્ટં પરેષાં પાપાનામનુક્તાનાં વિશોધનમ્ ।
વિષ્ણોર્જિષ્ણોઃ પ્રયત્નેન સ્મરણં પાપનાશનમ્

મિથ્યા જ્ઞાત્વા તતઃ સર્વં હરેર્નામપઠન્જપન્ ।
સર્વપાપવિનિર્મુક્તો યાતિ વિષ્ણોઃ પરંપદમ્

યે વદંતિ નરા નિત્યં હરિરિત્યક્ષરદ્વયમ્ ।
તસ્યોચ્ચારણમાત્રેણ વિમુક્તાસ્તે ન સંશયઃ

પ્રાયશ્ચિત્તાનિ સર્વાણિ કૃષ્ણાનુસ્મરણં પરમ્ ।
પ્રાતર્નિશિ તથા સાયં મધ્યાહ્નાદિષુ સંસ્મરન્

નારાયણમવાપ્નોતિ સદ્યઃ પાપક્ષયં નરઃ ।
વિષ્ણુસંસ્મરતા દેવ સમસ્તક્લેશસંક્ષયે

મુક્તિં પ્રયાતિ સ્વર્ગાપ્તિસ્તસ્ય વિષ્ણોસ્તુ કીર્ત્તનાત્ ।
વાસુદેવે મનો યસ્ય જપહોમાર્ચનાદિષુ

તદક્ષયં વિજાનીયાદ્યાવદિંદ્રાશ્ચતુર્દશ ।
ક્વ નાકપૃષ્ઠગમનં પુનરાવૃત્તિલક્ષણમ્

ક્વ જપો વાસુદેવસ્ય મુક્તિબીજમનુત્તમમ્ ।
તન્મુખં પરમં તીર્થં યત્રાવર્ત્તં વિતન્વતી

નમો નારાયણાયેતિ ભાતિ પ્રાચી સરસ્વતી ।
તસ્માદહર્નિશં વિષ્ણુસ્મરણાત્પુરુષોત્તમઃ

ન યાતિ નરકં પુત્ર સંક્ષીણકલિકલ્મષઃ ।
સત્યં સત્યં પુનઃ સત્યં ભાષિતં મમ સુવ્રત

નામોચ્ચારણમાત્રેણ મહાપાપાત્પ્રમુચ્યતે ।
રામરામેતિ રામેતિ રામેતિ ચ પુનર્જપન્

સ ચાંડાલોઽપિ પૂતાત્મા જાયતે નાત્ર સંશયઃ ।
કુરુક્ષેત્રં તથા કાશી ગયા વૈ દ્વારિકા તથા

સર્વં તીર્થં કૃતં તેન નામોચ્ચારણમાત્રતઃ ।
કૃષ્ણકૃષ્ણેતિ કૃષ્ણેતિ ઇતિ વાયો જપન્પઠન્

ઇહલોકં પરિત્યજ્ય મોદતે વિષ્ણુસંનિધૌ ।
નૃસિંહેતિ મુદા વિપ્ર સતતં પ્રજપન્પઠન્

મહાપાપાત્પ્રમુચ્યેત કલૌ ભાગવતો નરઃ ।
ધ્યાયન્કૃતે યજન્યજ્ઞૈસ્ત્રેતાયાં દ્વાપરેઽર્ચયન્

યદાપ્નોતિ તદાપ્નોતિ કલૌ સંકીર્ત્ય કેશવમ્ ।
એતજ્જ્ઞાત્વા નિમગ્નાશ્ચ જગદાત્મનિ કેશવે

સર્વપાપપરિક્ષીણા યાંતિ વિષ્ણોઃ પરં પદમ્ ।
મત્સ્યઃ કૂર્મો વરાહશ્ચ નૃસિંહો વામનસ્તથા

રામો રામશ્ચ કૃષ્ણશ્ચ બુદ્ધઃ કલ્કી તતઃ સ્મૃતઃ ।
એતે દશાવતારાશ્ચ પૃથિવ્યાં પરિકીર્તિતાઃ

એતેષાં નામમાત્રેણ બ્રહ્મહા શુધ્યતે સદા ।
પ્રાતઃ પઠન્જપન્ધ્યાયન્વિષ્ણોર્નામ યથા તથા

મુચ્યતે નાત્ર સંદેહઃ સ વૈ નારાયણો ભવેત્ ।
સૂત ઉવાચ-
શ્રુત્વા વૈ નારદો હ્યેતદ્વિસ્મયં પરમં ગતઃ

ઉવાચ પિતરં તત્ર કિમુક્તં દેવસત્તમ ।
દેવાઃ સહસ્રશઃ સંતિ રુદ્રાઃ સંતિ સહસ્રશઃ

પિતરઃ સંતિ શતશઃ યક્ષાશ્ચ કિન્નરાસ્તથા ।
ભૂતાઃ પ્રેતાઃ પિશાચાશ્ચ યે કેચિદ્દેવયોનયઃ

તેષાં નામ્ના ચ માહાત્મ્યં શ્રુતં દૃષ્ટં તથા ન ચ ।
શ્રીવિષ્ણોર્નામમાહાત્મ્યં યાદૃશં ચ શ્રુતં મયા

યસ્ય વૈ નામમાત્રેણ મુચ્યતે નાત્ર સંશયઃ ।
કિં વૈ તીર્થકૃતે દેવ પૃથિવ્યામટને કૃતે

યસ્ય વૈ નામમહિમા શ્રુત્વા મોક્ષમવાપ્નુયાત્ ।
તન્મુખં તુ મહત્તીર્થં તન્મુખં ક્ષેત્રમેવ ચ

યન્મુખે રામરામેતિ તન્મુખં સર્વકામિકમ્ ।
કાનિ વૈ તસ્ય નામાનિ કતિ વીર્યાણિ સુવ્રત

તત્સર્વં ચ વિશેષેણ મમ બ્રૂહિ પિતામહ ।
બ્રહ્મોવાચ-
વ્યાપકોઽયં સદા વિષ્ણુઃ પરમાત્મા સનાતનઃ

અનાદિનિધનઃ શ્રીમાન્ભૂતાત્મા ભૂતભાવનઃ ।
યસ્માદહં હિ સંજાતો સોઽયં વિષ્ણુઃ સદાવતુ

સોઽયં કાલસ્ય કાલો વૈ સોઽયં મમ તુ પૂર્વજઃ ।
અક્ષયઃ પુંડરીકાક્ષો મતિમાનવ્યયઃ પુમાન્

શેષશાયી સદા વિષ્ણુઃ સહસ્રશીર્ષા મહત્પ્રભુઃ ।
સર્વભૂતમયઃ સાક્ષાદ્વિશ્વરૂપો જનાર્દનઃ

કૈટભારિરયં વિષ્ણુર્ધાતા દેવો જગત્પતિઃ ।
તસ્યાહં નામગોત્રં ચ ન વેદ્મિ પુરુષર્ષભ

વેદવાદ્યપ્યહં તાત નાહં જ્ઞાતા કદાચન ।
અતસ્ત્વં ગચ્છ દેવર્ષે યત્રાસ્તિ કિલ વિશ્વરાટ્

સ ચ તત્ત્વં મુનિશ્રેષ્ઠ સર્વં તે કથયિષ્યતિ ।
સ એવ પુરુષઃ શ્રીમાન્કૈલાસાધિપતિઃ સદા

સર્વેષાં વિષ્ણુભક્તાનામયં શ્રેષ્ઠઃ પરાત્પરઃ ।
પંચવક્ત્રો હ્યુમાકાંતઃ સર્વદુઃખનિબર્હણઃ

વિશ્વેશ્વરો વિશ્વનાથઃ સર્વદા ભક્તવત્સલઃ ।
તત્ર ગચ્છ સુરશ્રેષ્ઠ તત્સર્વં કથયિષ્યતિ

પિતુર્વચનમાકર્ણ્ય તત્ર ગંતું પ્રચક્રમે ।
વિજ્ઞાતું નામમાહાત્મ્યં કૈલાસભવનં પ્રતિ

યત્ર વિશ્વેશ્વરો દેવો નિત્યં તિષ્ઠતિ ભૂતિદઃ ।
દદર્શ નારદસ્તત્ર દેવં તં સુરપૂજિતમ્

કૈલાસશિખરાસીનં દેવદેવં જગદ્ગુરુમ્ ।
પંચવક્ત્રં દશભુજં ત્રિનેત્રં શૂલપાણિનમ્

કપાલિનં સખટ્વાંગં તીક્ષ્ણં શૂલાસિધારિણમ્ ।
પિનાકધારિણં ભીમં વરદં વૃષવાહનમ્

ભસ્માંગં વ્યાલશોભાઢ્યં શશાંકકૃતશેખરમ્ ।
નીલજીમૂતસંકાશં સૂર્યકોટિસમપ્રભમ્

ક્રીડંતં તત્ર દેવેશં સાષ્ટાંગં દંડવત્પુનઃ ।
તં દૃષ્ટ્વા તુ મહાદેવો વિસ્મયોત્ફુલ્લલોચનઃ

વૈષ્ણવાનાં પરઃ શ્રેષ્ઠઃ પ્રાહ વાડવસત્તમમ્ ।
કસ્માદિહ સમાયાતો વદ દેવર્ષિસત્તમ

નારદ ઉવાચ-
એકસ્મિન્નેવ કાલે તુ ગતોઽહં બ્રહ્મણોંતિકમ્ ।
શ્રુતં તત્ર મયા દેવ વિષ્ણોર્માહાત્મ્યમુત્તમમ્

બ્રહ્મણા કથિતં તત્ર મમાગ્રે દેવસત્તમ ।
નામ્નોઽસ્ય યાવતી શક્તિઃ સા શ્રુતા બ્રહ્મણો મુખાત્

તત્ર પૃષ્ટં મયા પૂર્વં વિષ્ણોર્નામસહસ્રકમ્ ।
તદાહં બ્રહ્મણા ચોક્તં નાહં જાનામિ નારદ

જાનાત્યયં મહારુદ્રસ્તત્સર્વં કથયિષ્યતિ ।
મહાશ્ચર્યં તુ સંપ્રાપ્ય હ્યાગતસ્તવ સન્નિધૌ

અસ્મિન્કલિયુગે ઘોરેઽલ્પાયુષશ્ચૈવ માનવાઃ ।
વિધર્મેષુ રતા નિત્યં નામનિષ્ઠા ન વૈ પુનઃ

પાખંડિનસ્તથા વિપ્રા ધર્મેષુ વિરતાઃ સદા ।
સંધ્યાહીન વ્રતભ્રષ્ટા દુષ્ટા મલિનરૂપિણઃ

યથા વિપ્રાસ્તથા ક્ષત્રા વૈશ્યાશ્ચૈવ પુનઃ પુનઃ ।
એવં શૂદ્રાસ્તથાન્યે ચ ન વૈ ભાગવતા નરાઃ

શૂદ્રા દ્વિજાતિબાહ્યાશ્ચ કલૌ વિશ્વેશ્વર પ્રભો ।
ધર્માધર્મૌ ન જાનંતિ હિતં વાઽહિતમેવ વા

એવં જ્ઞાત્વા હ્યહં સ્વામિન્નાગતઃ સંનિધૌ તવ ।
પુનશ્ચ નામમાહાત્મ્યં શ્રુતં વૈ બ્રહ્મણો મુખાત્

ત્વં દેવઃ સર્વદેવાનાં ત્વં નાથો મમ સર્વદા ।
ત્રિપુરારિશ્ચ વિશ્વાત્મા ધાતા ત્વં ચ પુનઃ પુનઃ

કથયસ્વ પ્રસાદેન વિષ્ણોર્નામસહસ્રકમ્ ।
સૌભાગ્યજનનં પુંસાં પરં ભક્તિકરં સદા

બ્રાહ્મણાનાં બ્રહ્મદં ચ ક્ષત્રિયાણાં જયપ્રદમ્ ।
વૈશ્યાનાં ધનદં નિત્યં શૂદ્રાણાં સુખદાયકમ્

તદહં શ્રોતુમિચ્છામિ ત્વત્સકાશાન્મહેશ્વર ।
ત્વં સમર્થોઽસિ ભક્તાનાં સર્વદા કેશવં પ્રતિ

કથયસ્વ પ્રસાદેન યદિ ગોપ્યં ન સુવ્રત ।
ઇદં પવિત્રં પરમં સર્વતીર્થમયં સદા

અતો વૈ શ્રોતુમિચ્છામિ વદ વિશ્વેશ્વર પ્રભો ।
શ્રુત્વા નારદવાક્યાનિ વિસ્મયોત્ફુલ્લલોચનઃ

રોમાંચિતસ્તતો જાતો વિષ્ણોર્નામાનિ સંસ્મરન્ ।
ઈશ્વર ઉવાચ-
એતદ્ગોપ્યં પરં બ્રહ્મન્વિષ્ણોર્નામસહસ્રકમ્

એતચ્છ્રુત્વા નરો વત્સ ન લભેદ્દુર્ગતિં ક્વચિત્ ।
કદાચિચ્ચ ગતે કાલે પાર્વતી મામુવાચ હ

પાર્વત્યુવાચ -
કૈલાસાધિપતે મહ્યં કથયસ્વ યથાતથમ્ ।
ત્વં કિં જપસિ દેવેશ પરૈશ્વર્યસમાહિતઃ

સદા ત્વં ભસ્મલિપ્તાંગઃ કૃત્તિવાસાઃ સદા કથમ્ ।
જટાધરઃ કથં જાતો વદ વિશ્વેશ્વર પ્રભો

ત્વં દેવઃ સર્વદેવાનાં ત્વં ગુરુઃ સર્વકર્મણામ્ ।
ત્વં પતિર્મમ વિશ્વેશ વિશ્વનાથ જગત્પ્રભો

મહાદેવ ઉવાચ-
ઇતિ પૃષ્ટં મમ બ્રહ્મન્પાર્વત્યા ચ પુનઃ પુનઃ ।
તદા સર્વં મયા ખ્યાતં તસ્યાશ્ચાગ્રે વિશેષતઃ

શૃણુ નારદ વક્ષ્યામિ યદુક્તં પાર્વતીં પ્રતિ ।
યેન પ્રસન્નો ભગવાન્મુક્તિદાતા ન સંશયઃ

મમાયં તુ પિતા સાક્ષાદ્બન્ધુશ્ચૈવ તુ સર્વદા ।
તસ્યાહં સર્વદા ભક્તો હ્યયં મમ પતિઃ સદા

તદહં સંપ્રવક્ષ્યામિ શૃણુષ્વ ગદતો મમ ।
સૂત ઉવાચ-
એવમુક્ત્વા નારદાય કથયામાસ વૈ દ્વિજાઃ

ઉમાયૈ યત્પુરા પ્રોક્તં વિષ્ણોર્નામસહસ્રકમ્ ।
મહેશાચ્ચૈવ તત્પ્રાપ્તં કૈલાસે નારદેન વૈ

કદાચિદ્દૈવયોગેન કૈલાસાત્સ સમાગતઃ ।
નૈમિષારણ્યસંજ્ઞં તુ તીર્થં વૈ પરમાદ્ભુતમ્

તત્રસ્થા ઋષયઃ સર્વે દૃષ્ટ્વા તં ઋષિસત્તમમ્ ।
પૂજાં ચક્રુર્વિશેષેણ નારદાય મહાત્મને

આગતં નારદં જ્ઞાત્વા વિસ્મયોત્ફુલ્લલોચનાઃ ।
પુષ્પવૃષ્ટિં પ્રચક્રુસ્તે વૈષ્ણવા દ્વિજસત્તમાઃ

પાદ્યમર્ઘ્યં તતઃ કૃત્વા કૃત્વા ચારાર્તિકં તતઃ ।
નિવેદ્ય ફલમૂલાનિ દંડવત્પતિતા ભુવિ

ઊચુશ્ચ કૃતકૃત્યાઃ સ્મ દેશે હ્યસ્મિન્મહામુને ।
ભવતો દર્શનં જાતં પવિત્રં પાપનાશનમ્

ત્વત્પ્રસાદાચ્ચ દેવેશ પુરાણાનિ શ્રુતાનિ ચ ।
બ્રહ્મન્કેન પ્રકારેણ સર્વપાપક્ષયો ભવેત્

વિના દાનેન તપસા વિના તીર્થ તપો મખૈઃ ।
વિના દાનૈર્વિના ધ્યાનૈર્વિના ચેંદ્રિયનિગ્રહૈઃ ।
વિના શાસ્ત્રસમૂહૈશ્ચ કથં મુક્તિરવાપ્યતે

નારદ ઉવાચ-
કૈલાસશિખરાસીનં દેવદેવં જગદ્ગુરુમ્ ।
પ્રણિપત્ય મહાદેવં પર્યપૃચ્છદુમાપ્રિયમ્

પાર્વત્યુવાચ-
ભગવંસ્ત્વં પરો દેવઃ સર્વજ્ઞઃ સર્વપૂજિતઃ ।
સ ત્વમત્ત્યર્ચ્યતે દેવૈરિંદ્રસૂર્યાદિકૈરપિ

લભંતેઽભિમતાં સિદ્ધિં સર્વેઽભ્યર્ચ્ય વરપ્રદમ્ ।
ત્વં જન્મમૃત્યુરહિતઃ સ્વયંભૂઃ સર્વશક્તિમાન્

સદા ધ્યાયસિ કિં સ્વામિન્દિગ્વાસા મદનાંતકઃ ।
તપશ્ચરસિ કસ્માત્ત્વં જટિલો ભસ્મધૂસરઃ

કિં વા જપસિ દેવેશ પરં કૌતૂહલં હિ મે ।
અનુગ્રાહ્યા યદા તેઽસ્મિ તત્ત્વં કથય સુવ્રતમ્

મહાદેવ ઉવાચ-
નેદં કસ્યાપિ કથિતં ગોપનીયમિદં મમ ।
કિંતુ વક્ષ્યામિ તે ભદ્રે ત્વં ભક્તાસિ પ્રિયાસિ મે

પુરા સત્યયુગે દેવિ વિશુદ્ધમતયોઽખિલાઃ ।
યજંતિ વિષ્ણુમેવૈકં જ્ઞાત્વા સર્વેશ્વરેશ્વરમ્

પ્રયાંતિ પરમામૃદ્ધિમૈહિકામુષ્મિકીં પ્રિયે ।
યાં ન પ્રાપ્તાઃ સુરાઃ સર્વે ઋષયઃ ક્લેશસંયુતાઃ

તે તાં ગતિં પ્રપદ્યંતે યે નામકૃતનિશ્ચયાઃ ।
મન્મુખાદપિ સંશ્રુત્ય દેવા વિષ્ણુબહિર્મુખાઃ

વેદૈઃ પુરાણૈઃ સિદ્ધાંતૈર્ભિન્નૈર્વિભ્રાંતચેતસઃ ।
નિશ્ચયં નાધિગચ્છંતિ કિં તત્વં કિં પરં પદમ્

તુલાપુરુષદાનાદ્યૈરશ્વમેધાદિભિર્મખૈઃ ।
વારાણસીપ્રયાગાદિ તીર્થસ્નાનાદિભિઃ પ્રિયે

ગયાશ્રાદ્ધાદિભિઃ પિત્ર્યૈર્વેદપાઠાદિભિર્જપૈઃ ।
તપોભિરુગ્રૈર્નિયમૈર્યમૈર્ભૂતદયાદિભિઃ

ગુરુશુશ્રૂષણૈઃ સેવ્યૈર્ધર્મૈર્વર્ણાશ્રમાન્વિતૈઃ ।
જ્ઞાનધ્યાનાદિભિઃ સમ્યક્ચરિતૈર્જન્મકોટિભિઃ

ન યાંતિ તત્પરં શ્રેયો વિષ્ણું સર્વેશ્વરેશ્વરમ્ ।
સર્વભાવૈઃ સમાશ્રિત્ય પુરાણપુરુષોત્તમમ્

અનન્યગતયો મર્ત્યા ભોગિનોઽપિ પરંતપે ।
જ્ઞાનવૈરાગ્યરહિતા બ્રહ્મચર્યાદિવર્જિતાઃ

સર્વધર્મોજ્ઝિતા વિષ્ણોર્નામમાત્રૈકજલ્પિનઃ ।
સુખેન યાં ગતિં યાંતિ ન તાં સર્વેઽપિ ધાર્મિકાઃ

સ્મર્ત્તવ્યઃ સતતં વિષ્ણુર્વિસ્મર્તવ્યો ન જાતુચિત્ ।
સર્વે વિધિનિષેધાઃ સ્યુરેતસ્યૈવ વિધિં કરાઃ

કિંતુ બ્રહ્માદયો દેવા ઋષયશ્ચ નિરંહસઃ ।
નિર્ભયં વિષ્ણુનામ્નૈવ યથેષ્ટં પદમાગતાઃ

અલબ્ધ્વા ચાત્મનઃ પૂજાં સમ્યગારાધિતો હરિઃ ।
મયાસ્માદપિ ચ શ્રેષ્ઠં વાંચ્છતાહં કૃતાત્મના

તતઃ સાક્ષાજ્જગન્નાથ પ્રસન્નો ભક્તવત્સલઃ ।
અંશાંશેનાત્મનૈવૈતાન્પૂજયામાસ કેશવઃ

દેવાન્પિતૄન્દ્વિજાન્હવ્યકવ્યાદ્યૈઃ કરુણામયઃ ।
તતઃ પ્રભૃતિ પૂજ્યંતે ત્રૈલોક્યે સચરાચરે

બ્રહ્માદયઃ સુરાઃ સર્વે પ્રસાદાચ્છાર્ઙ્ગધન્વનઃ ।
માં ચોવાચ યથા મત્તઃ પૂજ્યઃ શ્રેષ્ઠો ભવિષ્યસિ

ત્વામારાધ્ય તથા શંભો ગૃહીષ્યામિ વરં સદા ।
દ્વાપરાદૌ યુગે ભૂત્વા કલયા માનુષાદિષુ

સ્વાગમૈઃ કલ્પિતૈસ્ત્વં ચ જનાન્મદ્વિમુખાન્કુરુ ।
માં ચ ગોપય યેન સ્યાત્સૃષ્ટિરેષોત્તરોત્તરા

એષ મોહં સૃજામ્યાશુ યોજનાન્મોહયિષ્યતિ ।
ત્વં ચ રુદ્ર મહાબાહો મોહશાસ્ત્રાણિ કારય

અતથ્યાનિ વિતથ્યાનિ દર્શયસ્વ મહાભુજ ।
પ્રકાશં કુરુ ચાત્માનમપ્રકાશં ચ માં કુરુ

તતસ્તં પ્રણિપત્યાહમવોચં પરમેશ્વરમ્ ।
બ્રહ્મહત્યા સહસ્રસ્ય પાપં શામ્યેત્કથંચન

ન પુનસ્ત્વદવિજ્ઞાનં કલ્પકોટિશતૈરપિ ।
તસ્માન્મયા કૃતા સ્પર્દ્ધા પવિત્રઃ સ્યાં કથં હરે

તન્મે કથય ગોવિંદ પાયશ્ચિત્તં યદિચ્છસિ ।
તતઃ પ્રસન્નો ભગવાનવોચત્તત્ત્વમાત્મનઃ

યેનાહમધિકસ્તસ્માદભવં નગનંદિનિ ।
તમેવ તપસા નિત્યં ભજામિ સ્તૌમિ ચિંતયે

પરમો વિષ્ણુરેવૈકસ્તજ્જ્ઞાનં મુક્તિસાધનમ્ ।
શાસ્ત્રાણાં નિર્ણયસ્ત્વેષસ્તદન્યન્મોહનાય ચ

દાનં વિના ચ યા મુક્તિઃ સામ્યં ચ મમ વિષ્ણુના ।
તીર્થાદિમાત્રતો જ્ઞાનં મમાધિક્યં ચ વિષ્ણુતઃ

અભેદશ્ચાસ્મદાદીનાં મુક્તાનાં હરિણા તથા ।
ઇત્યાદિ સર્વમોહાય કથ્યતે સતિ નાન્યથા ।
તેનાદ્વિતીય મહિમો જગત્પૂજ્યોઽસ્મિ પાર્વતિ

પાર્વત્યુવાચ -
તન્મે કથય દેવેશ યથાહમપિ શંકર ।
સર્વેશ્વરી નિરુપમા તવ સ્યાં સદૃશી પ્રભો

મહાદેવ ઉવાચ-
સાધુસાધુ ત્વયા પૃષ્ટં વિષ્ણોર્ભગવતઃ પ્રિયે ।
નામ્નાં સહસ્રં વક્ષ્યામિ મુખ્યં ત્રૈલોક્યમુક્તિદમ્

અસ્ય શ્રીવિષ્ણોર્નામસહસ્રસ્તોત્રસ્ય શ્રીમહાદેવ ઋષિરનુષ્ટુપચ્છંદઃ ।
હ્રીં બીજં શ્રીં શક્તિઃ ક્લીં કીલકં ચતુર્વર્ગધર્મકામાર્થમોક્ષાર્થે જપે વિનિયોગઃ ।
ૐવાસુદેવાય વિદ્મહે મહાહંસાય ધીમહિ ।
તન્નો વિષ્ણુઃ પ્રચોદયાત્ અંગન્યાસકરન્યાસૌ વિધિપૂર્વં યદા પઠેત્ ।
તત્ફલં કોટિગુણિતં ભવત્યેવ ન સંશયઃ

શ્રીવાસુદેવઃ પરંબ્રહ્મ ઇતિ હૃદયે ।
મૂલપ્રકૃતિરિતિ શિરઃ ।
મહાવરાહ ઇતિ શિખા ।
સૂર્યવંશધ્વજ ઇતિ કવચમ્ ।
બ્રહ્માદિકામ્યલલિત જગદાશ્ચર્ય શૈશવ ઇતિ નેત્રમ્ ।
યથાર્થખંડિતાશેષ ઇત્યસ્ત્રમ્ ।
નમોનારાયણાયેતિ ન્યાસં સર્વત્ર કારયેત્ ।
ૐનમોનારાયણાય પુરુષાય મહાત્મને ।
વિશુદ્ધસત્વધિષ્ણ્યાય મહાહંસાય ધીમહિ ।
ૐહ્રાં હ્રીં હ્રૂં હ્રૈં હ્રૌં હ્રઃ ।
ક્લીં કૃષ્ણાય વિષ્ણવે હ્રીં રામાય ધીમહિ તન્નો દેવઃ પ્રચોદયાત્ ।
ક્ષ્રૌં નૃસિંહાય વિદ્મહે શ્રીં શ્રીકંઠાય ધીમહિ તન્નો વિષ્ણુઃ પ્રચોદયાત્ ।
ૐવાસુદેવાય વિદ્મહે દેવકીસુતાય ધીમહિ તન્નઃ કૃષ્ણઃ પ્રચોદયાત્ ।
ૐ હ્રાં હ્રીં હ્રૂં હ્રૈં હ્રૌં હ્રઃ।
ક્લીં કૃષ્ણાય ગોવિંદાય ગોપીજનવલ્લભાય સ્વાહા ।
ઇતિ મંત્રમ્ સમુચ્ચાર્ય જપેદ્વા વિષ્ણુમવ્યયમ્ ।
શ્રીનિવાસં જગન્નાથં તસ્ય સ્તોત્રં પઠેત્સુધીઃ

ૐવાસુદેવઃ પરં બ્રહ્મ પરમાત્મા પરાત્પરઃ ।
પરંધામ પરંજ્યોતિઃ પરંતત્વં પરં પદમ્

પરઃ શિવઃ પરોધ્યેયઃ પરં જ્ઞાનં પરાગતિઃ ।
પરમાર્થઃ પરંશ્રેયઃ પરાનંદઃ પરોદયઃ

પરો વ્યક્તાત્પરં વ્યોમ પરમર્દ્ધિઃ પરેશ્વરઃ ।
નિરામયો નિર્વિકારો નિર્વિકલ્પો નિરાશ્રયઃ

નિરંજનો નિરાતંકો નિર્લેપો નિરવગ્રહઃ ।
નિર્ગુણો નિષ્કલોઽનંતોઽભયોઽચિંત્યોઽબલોચિતઃ

અતીન્દ્રિયો મિતો પારોઽનીશોઽનીહોઽવ્યયોઽક્ષયઃ ।
સર્વજ્ઞઃ સર્વગઃ સર્વઃ સર્વદઃ સર્વભાવનઃ

સર્વશાસ્તા સર્વસાક્ષી પૂજ્યઃ સર્વસ્ય સર્વદૃક્? ।
સર્વશક્તિઃ સર્વસારઃ સર્વાત્મા સર્વતોમુખઃ

સર્વાવાસઃ સર્વરૂપઃ સર્વાદિઃ સર્વદુઃખહા ।
સર્વાર્થઃ સર્વતોભદ્રઃ સર્વકારણકારણમ્

સર્વાતિશયિતઃ સર્વાધ્યક્ષઃ સર્વસુરેશ્વરઃ ।
ષડ્વિંશકો મહાવિષ્ણુર્મહાગુહ્યો મહાવિભુઃ

નિત્યોદિતો નિત્યયુક્તો નિત્યાનંદઃ સનાતનઃ ।
માયાપતિર્યોગપતિઃ કૈવલ્યપતિરાત્મભૂઃ

જન્મમૃત્યુજરાતીતઃ કાલાતીતો ભવાતિગઃ ।
પૂર્ણઃ સત્યઃ શુદ્ધબુદ્ધસ્વરૂપો નિત્યચિન્મયઃ

યોગપ્રિયો યોગગમ્યો ભવબંધૈકમોચકઃ ।
પુરાણપુરુષઃ પ્રત્યક્ચૈતન્યઃ પુરુષોત્તમઃ

વેદાંતવેદ્યો દુર્જ્ઞેયસ્તપત્રયવિવર્જિતઃ ।
બ્રહ્મવિદ્યાશ્રયો નાદ્યઃ સ્વપ્રકાશઃ સ્વયંપ્રભુઃ

સર્વોપેય ઉદાસીનઃ પ્રણવઃ સર્વતઃ સમઃ ।
સર્વાનવદ્યો દુષ્પ્રાપ્યસ્તુરીયસ્તમસઃ પરઃ

કૂટસ્થઃ સર્વસંશ્લિષ્ટો વાઙ્મનોગોચરાતિગઃ ।
સંકર્ષણઃ સર્વહરઃ કાલઃ સર્વભયંકરઃ

અનુલ્લંઘ્યશ્ચિત્રગતિર્મહારુદ્રો દુરાસદઃ ।
મૂલપ્રકૃતિરાનંદઃ પ્રદ્યુમ્નો વિશ્વમોહનઃ

મહામાયો વિશ્વબીજં પરશક્તિઃ સુખૈકભૂઃ ।
સર્વકામ્યોઽનતલીલઃ સર્વભૂતવશંકરઃ

અનિરુદ્ધઃ સર્વજીવો હૃષીકેશો મનઃપતિઃ ।
નિરુપાધિપ્રિયો હંસોક્ષરઃ સર્વનિયોજકઃ

બ્રહ્મપ્રાણેશ્વરઃ સર્વભૂતભૃદ્દેહનાયકઃ ।
ક્ષેત્રજ્ઞઃ પ્રકૃતિઃ સ્વામી પુરુષો વિશ્વસૂત્રધૃક્

અંતર્યામી ત્રિધામાંતઃ સાક્ષી ત્રિગુણ ઈશ્વરઃ ।
યોગિગમ્યઃ પદ્મનાભઃ શેષશાયી શ્રિયઃપતિઃ

શ્રીસદોપાસ્યપાદાબ્જો નિત્યશ્રીઃ શ્રીનિકેતનઃ ।
નિત્યં વક્ષઃસ્થલસ્થશ્રીઃ શ્રીનિધિઃ શ્રીધરો હરિઃ

વશ્યશ્રીર્નિશ્ચલઃ શ્રીદો વિષ્ણુઃ ક્ષીરાબ્ધિમંદિરઃ ।
કૌસ્તુભોદ્ભાસિતોરસ્કો માધવો જગદાર્તિહા

શ્રીવત્સવક્ષા નિઃસીમ કલ્યાણગુણભાજનઃ ।
પીતાંબરો જગન્નાથો જગત્ત્રાતા જગત્પિતા

જગદ્બંધુર્જર્ગત્સ્રષ્ટા જગદ્ધાતા જગન્નિધિઃ ।
જગદેકસ્ફુરદ્વીર્યોઽનહંવાદી જગન્મયઃ

સર્વાશ્ચર્યમયઃ સર્વસિદ્ધાર્થઃ સર્વરંજિતઃ ।
સર્વામોઘોદ્યમો બ્રહ્મરુદ્રાદ્યુત્કૃષ્ટચેતનાઃ

શંભોઃ પિતામહો બ્રહ્મપિતા શક્રાદ્યધીશ્વરઃ ।
સર્વદેવપ્રિયઃ સર્વદેવમૂર્તિરનુત્તમઃ

સર્વદેવૈકશરણં સર્વદેવૈકદૈવતમ્ ।
યજ્ઞભુગ્યજ્ઞફલદો યજ્ઞેશો યજ્ઞભાવનઃ

યજ્ઞત્રાતા યજ્ઞપુમાન્વનમાલી દ્વિજપ્રિયઃ ।
દ્વિજૈકમાનદો વિપ્ર કુલદેવો સુરાંતકઃ

સર્વદુષ્ટાંતકૃત્સર્વસજ્જનાનન્યપાલકઃ ।
સપ્તલોકૈકજઠરઃ સપ્તલોકૈકમંડનઃ

સૃષ્ટિસ્થિત્યંતકૃચ્ચક્રી શાર્ઙ્ગધન્વા ગદાધરઃ ।
શંખભૃન્નંદકી પદ્મપાણિર્ગરુડવાહનઃ

અનિર્દેશ્યવપુઃ સર્વપૂજ્યસ્ત્રૈલોક્યપાવનઃ ।
અનંતકીર્તિર્નિઃસીમ પૌરુષઃ સર્વમંગલઃ

સૂર્યકોટિપ્રતીકાશો યમકોટિદુરાસદઃ ।
મયકોટિજગત્સ્રષ્ટા વાયુકોટિમહાબલઃ

કોટીંદુ જગદાનંદી શંભુકોટિમહેશ્વરઃ ।
કંદર્પકોટિલાવણ્યો દુર્ગકોટ્યરિમર્દનઃ

સમુદ્રકોટિગંભીરસ્તીર્થકોટિ સમાહ્વયઃ ।
કુબેરકોટિ લક્ષ્મીવાઞ્છક્રકોટિ વિલાસવાન્

હિમવત્કોટિનિષ્કંપઃ કોટિબ્રહ્માંડવિગ્રહઃ ।
કોટ્યશ્વમેધપાપઘ્નો યજ્ઞકોટિસમાર્ચનઃ

સુધાકોટિસ્વાસ્થ્યહેતુઃ કામધુક્કોટિકામદઃ ।
બ્રહ્મવિદ્યાકોટિરૂપઃ શિપિવિષ્ટઃ શુચિશ્રવાઃ

વિશ્વંભરસ્તીર્થપાદઃ પુણ્યશ્રવણકીર્તનઃ ।
આદિદેવો જગજ્જૈત્રો મુકુંદઃ કાલનેમિહા

વૈકુંઠોઽનંતમાહાત્મ્યો મહાયોગેશ્વરોત્સવઃ ।
નિત્યતૃપ્તોલસદ્ભાવો નિઃશંકો નરકાંતકઃ

દીનાનાથૈકશરણં વિશ્વૈકવ્યસનાપહઃ ।
જગત્કૃપાક્ષમો નિત્યં કૃપાલુઃ સજ્જનાશ્રયઃ

યોગેશ્વરઃ સદોદીર્ણો વૃદ્ધિક્ષયવિવર્જિતઃ ।
અધોક્ષજો વિશ્વરેતાઃ પ્રજાપતિ શતાધિપઃ

શક્રબ્રહ્માર્ચિતપદઃ શંભુબ્રહ્મોર્ધ્વધામગઃ ।
સૂર્યસોમેક્ષણો વિશ્વભોક્તા સર્વસ્ય પારગઃ

જગત્સેતુર્ધર્મસેતુધરો વિશ્વધુરંધરઃ ।
નિર્મમોઽખિલલોકેશો નિઃસંગોઽદ્ભુતભોગવાન્

વશ્યમાયો વશ્યવિશ્વો વિષ્વક્સેનઃ સુરોત્તમઃ ।
સર્વશ્રેયઃ પતિર્દિવ્યાનર્ઘ્યભૂષણભૂષિતઃ

સર્વલક્ષણલક્ષણ્યઃ સર્વદૈત્યેંદ્રદર્પહા ।
સમસ્તદેવસર્વસ્વં સર્વદૈવત નાયકઃ

સમસ્તદેવકવચં સર્વદેવશિરોમણિઃ ।
સમસ્તદેવતાદુર્ગઃ પ્રપન્નાશનિપંજરઃ

સમસ્તભયહૃન્નામા ભગવાન્વિષ્ટરશ્રવાઃ ।
વિભુઃ સર્વહિતોદર્કો હતારિઃ સ્વર્ગતિપ્રદઃ

સર્વદૈવતજીવેશો બ્રાહ્મણાદિનિયોજકઃ ।
બ્રહ્મશંભુઃ પરાર્ધાયુર્બ્રહ્મજ્યેષ્ઠઃ શિશુઃ સ્વરાટ્

વિરાડ્ભક્તપરાધીનઃ સ્તુત્યઃ સ્તોત્રાર્થસાધકઃ ।
પરાર્થકર્ત્તાકૃત્યજ્ઞઃ સ્વાર્થકૃત્ય સદોજ્ઝિતઃ

સદાનંદઃ સદાભદ્રઃ સદાશાંતઃ સદાશિવઃ ।
સદાપ્રિયઃ સદાતુષ્ટઃ સદાપુષ્ટઃ સદાર્ચિતઃ

સદાપૂતો પાવનાગ્ર્યો વેદગુહ્યો વૃષાકપિઃ ।
સહસ્રનામા ત્રિયુગશ્ચતુર્મૂર્તિશ્ચતુર્ભુજઃ

ભૂતભવ્યભવન્નાથો મહાપુરુષપૂર્વજઃ ।
નારાયણો મુંજકેશઃ સર્વયોગવિનિઃસૃતઃ

વેદસારો યજ્ઞસારઃ સામસારસ્તપોનિધિઃ ।
સાધ્યઃ શ્રેષ્ઠઃ પુરાણર્ષિઃ નિષ્ઠા શાંતિઃ પરાયણઃ

શિવત્રિશૂલવિધ્વંસી શ્રીકંઠૈકવરપ્રદઃ ।
નરઃ કૃષ્ણો હરિર્ધર્મનંદનો ધર્મજીવનઃ

આદિકર્ત્તા સર્વસત્યઃ સર્વસ્ત્રીરત્નદર્પહા ।
ત્રિકાલજિત કંદર્પ્પ ઉર્વશીસૃઙ્મુનીશ્વરઃ

આદ્યઃ કવિર્હયગ્રીવઃ સર્વવાગીશ્વરેશ્વરઃ ।
સર્વદેવમયો બ્રહ્મા ગુરુર્વાગીશ્વરીપતિઃ

અનંતવિદ્યાપ્રભવો મૂલાવિદ્યાવિનાશકઃ ।
સર્વજ્ઞદો જગજ્જાડ્યનાશકો મધુસૂદનઃ

અનેકમંત્રકોટીશઃ શબ્દબ્રહ્મૈકપારગઃ ।
આદિવિદ્વાન્વેદકર્ત્તા વેદાત્મા શ્રુતિસાગરઃ

બ્રહ્માર્થવેદહરણઃ સર્વવિજ્ઞાનજન્મભૂઃ ।
વિદ્યારાજો જ્ઞાનમૂર્ત્તિર્જ્ઞાનસિંધુરખંડધીઃ

મત્સ્યદેવો મહાશૃંગો જગદ્બીજબહિત્રદૃક્ ।
લીલાવ્યાપ્તાખિલાંભોધિશ્ચતુર્વેદપ્રવર્ત્તકઃ

આદિકૂર્મોઽખિલાધારસ્તૃણીકૃતજગદ્ભરઃ ।
અમરીકૃતદેવૌઘઃ પીયૂષોત્પત્તિકારણમ્

આત્માધારો ધરાધારો યજ્ઞાંગો ધરણીધરઃ ।
હિરણ્યાક્ષહરઃ પૃથ્વીપતિઃ શ્રાદ્ધાદિકલ્પકઃ

સમસ્તપિતૃભીતિઘ્નઃ સમસ્તપિતૃજીવનમ્ ।
હવ્યકવ્યૈકભુખવ્યકવ્યૈકફલદાયકઃ

રોમાંતર્લીનજલધિઃ ક્ષોભિતાશેષસાગરઃ ।
મહાવરાહો યજ્ઞઘ્નધ્વંસકો યજ્ઞિકાશ્રયઃ

શ્રીનૃસિંહો દિવ્યસિંહઃ સર્વાનિષ્ટાર્થદુઃખહા ।
એકવીરોઽદ્ભુતબલો યંત્રમંત્રૈકભંજનઃ

બ્રહ્માદિદુઃસહજ્યોતિર્યુગાંતાગ્ર્યતિભીષણઃ ।
કોટિવજ્રાધિકનખો જગદ્દુષ્પ્રેક્ષ્યમૂર્તિધૃક્

માતૃચક્રપ્રમથનો મહામાતૃગણેશ્વરઃ ।
અચિંત્યામોઘવીર્યાઢ્યઃ સમસ્તાસુરઘસ્મરઃ

હિરણ્યકશિપુછેદી કાલઃ સંકર્ષણીપતિઃ ।
કૃતાંતવાહનાસહ્યઃ સમસ્તભયનાશનઃ

સર્વવિઘ્નાંતકઃ સર્વસિદ્ધિદઃ સર્વપૂરકઃ ।
સમસ્તપાતકધ્વંસી સિદ્ધમંત્રાધિકાહ્વયઃ

ભૈરવેશો હરાર્તિઘ્નઃ કાલકોટિદુરાસદઃ ।
દૈત્યગર્ભશ્રાવિનામાસ્ફુટદ્ર્ બ્રહ્માંડગર્જિતઃ

સ્મૃતમાત્રાખિલત્રાતાઽદ્ભુતરૂપો મહાહરિઃ ।
બ્રહ્મચર્યશિરઃ પિંડી દિક્પાલોઽર્દ્ધાંગભૂષણઃ

દ્વાદશાર્કશિરોદામા રુદ્રશીર્ષૈકનૂપુરઃ ।
યોગિનીગ્રસ્તગિરજા ત્રાતાભૈરવતર્જકઃ

વીરચક્રેશ્વરોઽત્યુગ્રોઽપમારિઃ કાલશંબરઃ ।
ક્રોધેશ્વરો રુદ્રચંડી પરિવારાદિદુષ્ટભુક્

સર્વાક્ષોભ્યો મૃત્યુમૃત્યુઃ કાલમૃત્યુનિવર્ત્તકઃ ।
અસાધ્યસર્વરોગઘ્નઃ સર્વદુર્ગ્રહસૌમ્યકૃત્

ગણેશકોટિદર્પઘ્નો દુઃસહાશેષગોત્રહા ।
દેવદાનવદુર્દર્શો જગદ્ભયદભીષણઃ

સમસ્તદુર્ગતિત્રાતા જગદ્ભક્ષકભક્ષકઃ ।
ઉગ્રશોંબરમાર્જારઃ કાલમૂષકભક્ષકઃ ।
અનંતાયુધદોર્દંડી નૃસિંહો વીરભદ્રજિત્

યોગિનીચક્રગુહ્યેશઃ શક્રારિ પશુમાંસભુક્ ।
રુદ્રો નારાયણો મેષરૂપ શંકરવાહનઃ

મેષરૂપશિવત્રાતા દુષ્ટશક્તિસહસ્રભુક્ ।
તુલસીવલ્લભો વીરો વામાચારોઽખિલેષ્ટદઃ

મહાશિવઃ શિવારૂઢો ભૈરવૈકકપાલધૃક્ ।
કિલ્લીચક્રેશ્વરઃ શક્ર દિવ્યમોહનરૂપદઃ

ગૌરીસૌભાગ્યદો માયાનિધીર્માયાભયાપહઃ ।
બ્રહ્મતેજોમયો બ્રહ્મશ્રીમયશ્ચ ત્રયીમયઃ

સુબ્રહ્મણ્યો બલિધ્વંસી વામનોઽદિતિદુઃખહા ।
ઉપેંદ્રો નૃપતિર્વિષ્ણુઃ કશ્યપાન્વયમંડનઃ

બલિસ્વરાજ્યદઃ સર્વદેવવિપ્રાન્નદોઽચ્યુતઃ ।
ઉરુક્રમસ્તીર્થપાદસ્ત્રિપદસ્થસ્ત્રિવિક્રમઃ

વ્યોમપાદઃ સ્વપાદાંભઃ પવિત્રિતજગત્ત્રયઃ ।
બ્રહ્મેશાદ્યભિવંદ્યાંઘ્રિર્દ્રુતધર્માંઘ્રિધાવનઃ

અચિંત્યાદ્ભુતવિસ્તારો વિશ્વવૃક્ષો મહાબલઃ ।
રાહુમૂર્ધાપરાંગચ્છિદ્ભૃગુપત્નીશિરોહરઃ

પાપત્રસ્તઃ સદાપુણ્યો દૈત્યાશાનિત્યખંડનઃ ।
પૂરિતાખિલદેવાશો વિશ્વાર્થૈકાવતારકૃત્

સ્વમાયાનિત્યગુપ્તાત્મા ભક્તચિન્તામણિઃ સદા ।
વરદઃ કાર્ત્તવીર્યાદિ રાજરાજ્યપ્રદોઽનઘઃ

વિશ્વશ્લાઘ્યામિતાચારો દત્તાત્રેયો મુનીશ્વરઃ ।
પરાશક્તિસદાશ્લિષ્ટો યોગાનંદઃ સદોન્મદઃ

સમસ્તેંદ્રારિતેજોહૃત્પરમામૃતપદ્મપઃ ।
અનુસૂયાગર્ભરત્નં ભોગમોક્ષસુખપ્રદઃ

જમદગ્નિકુલાદિત્યો રેણુકાદ્ભુતશક્તિકૃત્ ।
માતૃહત્યાદિનિર્લેપઃ સ્કંદજિદ્વિપ્રરાજ્યદઃ

સર્વક્ષત્રાંતકૃદ્વીરદર્પહા કાર્ત્તવીર્યજિત્ ।
સપ્તદ્વીપાવતીદાતા શિવાર્ચક યશપ્રદઃ

ભીમઃ પરશુરામશ્ચ શિવાચાર્યૈકવિશ્વભુક્ ।
શિવાખિલજ્ઞાનકોશો ભીષ્માચાર્યોઽગ્નિદૈવતઃ

દ્રોણાચાર્યગુરુર્વિશ્વજૈત્રધન્વાકૃતાંતજિત્ ।
અદ્વિતીયતપોમૂર્ત્તિર્બ્રહ્મચર્યૈકદક્ષિણઃ

મનુઃશ્રેષ્ઠઃ સતાંસેતુર્મહીયાન્વૃષભો વિરાટ્ ।
આદિરાજઃ ક્ષિતિપિતા સર્વરત્નૈકદોહકૃત્

પૃથુર્જન્માદ્યેકદક્ષો ગીઃ શ્રીઃ કીર્તિઃ સ્વયંવૃતઃ ।
જગદ્વૃત્તિપ્રદશ્ચક્રવર્ત્તિશ્રેષ્ઠોદ્વયાસ્ત્રધૃક્

સનકાદિમુનિપ્રાપ્ય ભગવદ્ભક્તિવર્દ્ધનઃ ।
વર્ણાશ્રમાદિધર્માણાં કર્ત્તા વક્તા પ્રવર્ત્તકઃ

સૂર્યવંશધ્વજો રામો રાઘવઃ સદ્ગુણાર્ણવઃ ।
કાકુત્સ્થો વીરરાડ્રાજા રાજધર્મધુરંધરઃ

નિત્યસ્વસ્થાશ્રયઃ સર્વભદ્ર ગ્રાહી શુભૈકદૃક્ ।
નરરત્નં રત્નગર્ભો ધર્માધ્યક્ષો મહાનિધિઃ ।
સર્વશ્રેષ્ઠાશ્રયઃ સર્વશાસ્ત્રાર્થગ્રામવીર્યવાન્

જગદ્વશો દાશરથિઃ સર્વરત્નાશ્રયો નૃપઃ ।
સમસ્તધર્મસૂઃ સર્વધર્મદ્રષ્ટાઽખિલાઘહા

અતીંદ્રો જ્ઞાનવિજ્ઞાનપારદશ્ચ ક્ષમાંબુધિઃ ।
સર્વપ્રકૃષ્ટશિષ્ટેષ્ટો હર્ષશોકાદ્યનાકુલઃ ।
પિત્રાજ્ઞાત્યક્તસામ્રાજ્યઃ સપન્નોદયનિર્ભયઃ

ગુહદેશાર્પિતૈશ્વર્યઃ શિવસ્પર્દ્ધાજટાધરઃ ।
ચિત્રકૂટાપ્તરત્નાદ્રિર્જગદીશો વનેચરઃ

યથેષ્ટામોઘસર્વાસ્ત્રો દેવેંદ્રતનયાક્ષિહા ।
બ્રહ્મેંદ્રદિનતૈષીકો મારીચઘ્નો વિરાધહા

બ્રહ્મશાપહતાશેષ દંડકારણ્યપાવનઃ ।
ચતુર્દશસહસ્રોગ્ર રક્ષોઘ્નૈકશરૈકધૃક્

ખરારિસ્ત્રિશિરોહંતા દૂષણઘ્નો જનાર્દનઃ ।
જટાયુષોઽગ્નિગતિદોઽગસ્ત્યસર્વસ્વ મંત્રરાટ્

લીલાધનુઃ કોટ્યપાસ્તદુંદુભ્યસ્થિમહાચયઃ ।
સપ્તતાલવ્યધાકૃષ્ટ ધ્વસ્તપાતાલદાનવઃ

સુગ્રીવરાજ્યદો હીનમનસૈવાભયપ્રદઃ ।
હનુમદ્રુદ્રમુખ્યેશ સમસ્તકપિદેહભૃત્

સનાગદૈત્યબાણૈકવ્યાકુલીકૃતસાગરઃ ।
સમ્લેચ્છકોટિબાણૈકશુષ્કનિર્દગ્ધસાગરઃ

સમુદ્રાદ્ભુતપૂર્વૈક બંધસેતુર્યશોનિધિઃ ।
અસાધ્યસાધકો લંકાસમૂલોત્કર્ષદક્ષિણઃ

વરદૃપ્તજગચ્છલ્ય પૌલસ્ત્યકુલકૃંતનઃ ।
રાવણિઘ્નઃ પ્રહસ્તચ્છિત્કુંભકર્ણભિદુગ્રહા

રાવણૈકશિરશ્ચ્છેત્તા નિઃશંકેંદ્રૈકરાજ્યદઃ ।
સ્વર્ગાસ્વર્ગત્વવિચ્છેદી દેવેંદ્રાનિંદ્રતાહરઃ

રક્ષો દેવત્વહૃદ્ધર્મા ધર્મત્વઘ્નઃ પુરુષ્ટુતઃ ।
નતિમાત્રદશાસ્યારિર્દત્તરાજ્યવિભીષણઃ

સુધાવૃષ્ટિમૃતાશેષ સ્વસૈન્યોજ્જીવનૈકકૃત્ ।
દેવબ્રાહ્મણનામૈક ધાતા સર્વામરાર્ચિતઃ

બ્રહ્મસૂર્યેંદ્રરુદ્રાદિ વૃંદાર્પિતસતીપ્રિયઃ ।
અયોધ્યાખિલરાજન્યઃ સર્વભૂતમનોહરઃ

સ્વામિતુલ્યકૃપાદંડો હીનોત્કૃષ્ટૈકસત્પ્રિયઃ ।
સ્વપક્ષાદિન્યાયદર્શી હીનાર્થાધિકસાધકઃ

વ્યાધવ્યાજાનુચિતકૃત્તારકોખિલતુલ્યકૃત્ ।
પાર્વત્યાધિક્યમુક્તાત્મા પ્રિયાત્યક્તઃ સ્મરારિજિત્

સાક્ષાત્કુશલવચ્છદ્મેંદ્રાદિતાતોઽપરાજિતઃ ।
કોશલેંદ્રો વીરબાહુઃ સત્યાર્થ ત્યક્તસોદરઃ

શરસંધાનનિર્ધૂત ધરણીમંડલોદયઃ ।
બ્રહ્માદિકામ્યસાંનિધ્યસનાથીકૃતદૈવતઃ

બ્રહ્મલોકાપ્તચાંડાલાદ્યશેષપ્રાણિસાર્થકઃ ।
સ્વનીતગર્દભાશ્વાદિશ્ચિરાયોધ્યાવનૈકકૃત્

રામદ્વિતીયઃ સૌમિત્રિર્લક્ષ્મણઃ પ્રહતેંદ્રજિત્ ।
વિષ્ણુભક્તાપ્તરામાંઘ્રિપાદુકારાજ્યનિર્વૃતઃ

ભરતોઽસહ્યગંધર્વકોટિઘ્નો લવણાંતકઃ ।
શત્રુઘ્નો વૈદ્યરાજાયુર્વેદગર્ભૌષધીપતિઃ

નિત્યામૃતકરો ધન્વંતરિર્યજ્ઞો જગદ્ધરઃ ।
સૂર્યારિઘ્નઃ સુરાજીવો દક્ષિણેશો દ્વિજપ્રિયઃ

છિન્નમૂર્ધાયદેશાર્કઃ શેષાંગસ્થાપિતામરઃ ।
વિશ્વાર્થાશેષકદ્રાસ્ત્ર શિરચ્છેદાક્ષતાકૃતિઃ

વાજપેયાદિનામાગ્નિર્વેદધર્મપરાયણઃ ।
શ્વેતદ્વીપપતિઃ સાંખ્યપ્રણેતા સર્વસિદ્ધિરાટ્

વિશ્વપ્રકાશિતજ્ઞાનયોગમોહતમિસ્રહા ।
દેવહૂત્યાત્મજઃ સિદ્ધઃ કપિલઃ કર્દમાત્મજઃ

યોગસ્વામી ધ્યાનભંગ સગરાત્મજભસ્મકૃત્ ।
ધર્મો વૃષેન્દ્રઃ સુરભીપતિઃ શુદ્ધાત્મભાવિતઃ

શંભુસ્ત્રિપુરદાહૈકસ્થૈર્થવિશ્વરથોદ્વહઃ ।
ભક્તશંભુજિતો દૈત્યામૃતવાપીસમસ્તપઃ

મહાપ્રલયવિશ્વૈકદ્વિતીયાખિલનાગરાટ્ ।
શેષદેવઃ સહસ્રાક્ષઃ સહસ્રાસ્ય શિરોભુજઃ

ફણામણિકણાકારયોજિતાબ્ધ્યંબુદક્ષિતિઃ ।
કાલાગ્નિરુદ્રજનકો મુશલાસ્ત્રો હલાયુધઃ

નીલાંબરો વારુણીશો મનોવાક્કાયદોષહા ।
અસંતોષો દૃષ્ટિમાત્રપાતિતૈકદશાનનઃ

બલિસંયમનો ઘોરો રૌહિણેયઃ પ્રલંબહા ।
મુષ્ટિકઘ્નો દ્વિવિદહા કાલિંદીકર્ષણો બલઃ

રેવતીરમણઃ પૂર્વભક્તિખેદાચ્યુતાગ્રજઃ ।
દેવકીવસુદેવાહ્વ કશ્યપાદિતિનંદનઃ

વાર્ષ્ણેયઃ સાત્વતાં શ્રેષ્ઠઃ શૌરિર્યદુકુલોદ્વહઃ ।
નરાકૃતિઃ પરંબ્રહ્મ સવ્યસાચી વરપ્રદઃ

બ્રહ્માદિકામ્યલાલિત્ય જગદાશ્ચર્ય શૈશવઃ ।
પૂતનાઘ્નઃ શકટભિદ્યમલાર્જુનભંજનઃ

વાતાસુરારિઃ કેશિઘ્નો ધેનુકારિર્ગવીશ્વરઃ ।
દામોદરો ગોપદેવો યશોદાનંદદાયકઃ

કાલીયમર્દનઃ સર્વગોપગોપીજનપ્રિયઃ ।
લીલાગોવર્દ્ધનધરો ગોવિંદો ગોકુલોત્સવઃ

અરિષ્ટમથનઃ કામોન્મત્તગોપીવિમુક્તિદઃ ।
સદ્યઃ કુવલયાપીડઘાતી ચાણૂરમર્દનઃ

કંસારિરુગ્રસેનાદિરાજ્યવ્યાપારિતાપરઃ ।
સુધર્માંકિતભૂર્લોકો જરાસંધબલાંતકઃ

ત્યક્તભગ્નજરાસંધો ભીમસેનયશઃપ્રદઃ ।
સાંદીપનમૃતાપત્યદાતા કાલાંતકાદિજિત્

સમસ્તનારકિત્રાતા સર્વભૂપતિકોટિજિત્ ।
રુક્મિણીરમણો રુક્મિશાસનો નરકાંતકઃ

સમસ્તસુંદરીકાંતો મુરારિર્ગરુડધ્વજઃ ।
એકાકીજિતરુદ્રાર્ક મરુદાદ્યખિલેશ્વરઃ

દેવેંદ્રદર્પહા કલ્પદ્રુમાલંકૃતભૂતલઃ ।
બાણબાહુસહચ્છિન્નં નદ્યાદિગણકોટિજિત્

લીલાજિત મહાદેવો મહાદેવૈકપૂજિતઃ ।
ઇંદ્રાર્થાર્જુનનિર્ભંગ જયદઃ પાંડવૈકધૃક્

કાશિરાજશિરશ્છેત્તા રુદ્રશક્ત્યૈકમર્દનઃ ।
વિશ્વેશ્વરપ્રસાદાક્ષઃ કાશીરાજસુતાર્દનઃ

શંભુપ્રતિજ્ઞાવિધ્વંસી કાશીનિર્દગ્ધનાયકઃ ।
કાશીશગતકોટિઘ્નો લોકશિક્ષાદ્વિજાર્ચકઃ

યુવતીવ્રતયોવશ્યઃ પુરાશિવવરપ્રદઃ ।
શંકરૈકપ્રતિષ્ઠાધૃક્સ્વાંશ શંકરપૂજકઃ

શિવકન્યાવ્રતપતિઃ કૃષ્ણરૂપ શિવારિહા ।
મહાલક્ષ્મીવપુર્ગૌરીત્રાતા વૈદલવૃત્રહા

સ્વધામમુચુકુંદૈકનિષ્કાલયવનેષ્ટકૃત્ ।
યમુનાપતિરાનીત પરિલીનદ્વિજાત્મજઃ

શ્રીદામરંકભક્તાર્થભૂમ્યાનીતેંદ્રવૈભવઃ ।
દુર્વૃત્તશિશુપાલૈકમુક્તિદો દ્વારકેશ્વરઃ

આચાંડાલદિકપ્રાપ્ય દ્વારકાનિધિકોટિકૃત્ ।
અક્રૂરોદ્ધવમુખ્યૈકભક્તસ્વચ્છંદમુક્તિદઃ

સબાલસ્ત્રીજલક્રીડામૃતવાપીકૃતાર્ણવઃ ।
બ્રહ્માસ્ત્રદગ્ધગર્ભસ્થ પરીક્ષિજ્જીવનૈકકૃત્

પરિલીનદ્વિજસુતાનેતાઽર્જુનમદાપહઃ ।
ગૂઢમુદ્રાકૃતિગ્રસ્ત ભીષ્માદ્યખિલકૌરવઃ

યથાર્થખંડિતાશેષ દિવ્યાસ્ત્રપાર્થમોહહૃત્ ।
ગર્ભશાપછલધ્વસ્તયાદેવોર્વી ભયાપહઃ

જરાવ્યાધારિગતિદઃ સ્મૃતિમાત્રાખિલેષ્ટદઃ ।
કામદેવો રતિપતિર્મન્મથઃ શંબરાંતકઃ

અનંગો જિતગૌરીશો રતિકાંતઃ સદેપ્સિતઃ ।
પુષ્પેષુર્વિશ્વવિજયિ સ્મરઃ કામેશ્વરીપ્રિયઃ

ઉષાપતિર્વિશ્વકેતુર્વિશ્વદૃપ્તોઽધિપૂરુષઃ ।
ચતુરાત્મા ચતુર્વ્યૂહશ્ચતુર્યુગવિધાયકઃ

ચતુર્વેદૈકવિશ્વાત્મા સર્વોત્કૃષ્ટાંશકોટિશઃ ।
આશ્રમાત્મા પુરાણર્ષિર્વ્યાસઃ શાખાસહસ્રકૃત્

મહાભારતનિર્માતા કવીંદ્રો બાદરાયણઃ ।
કૃષ્ણદ્વૈપાયનઃ સર્વપુરુષાર્થૈકબોધકઃ

વેદાંતકર્તા બ્રહ્મૈકવ્યંજકઃ પુરુવંશકૃત્ ।
બુદ્ધો ધ્યાનજિતાશેષ દેવદેવો જગત્પ્રિયઃ

નિરાયુધો જગજ્જૈત્રઃ શ્રીધરો દુષ્ટમોહનઃ ।
દૈત્યવેદબહિઃકર્ત્તા વેદાર્થશ્રુતિગોપકઃ

શૌદ્ધોદનિર્દષ્ટદૃષ્ટિઃ સુખદઃ સદસસ્પતિઃ ।
યથાયોગ્યાખિલકૃપઃ સર્વશૂન્યોઽખિલેષ્ટદઃ

ચતુષ્કોટિપૃથક્તત્વં પ્રજ્ઞાપારમિતેશ્વરઃ ।
પાખંડવેદમાર્ગેશઃ પાખંડશ્રુતિગોપકઃ

કલ્કી વિષ્ણુયશઃપુત્રઃ કલિકાલવિલોપકઃ ।
સમસ્તમ્લેચ્છદુષ્ટઘ્નઃ સર્વશિષ્ટદ્વિજાતિકૃત્

સત્યપ્રવર્ત્તકો દેવ દ્વિજદીર્ઘક્ષુધાપહઃ ।
અશ્વવારાદિ રેવંતઃ પૃથ્વીદુર્ગતિનાશનઃ

સદ્યઃ ક્ષ્માઽનંતલક્ષ્મીકૃન્નષ્ટનિઃશેષધર્મવિત્ ।
અનંતસ્વર્ણયોગૈક હેમપૂર્ણાખિલદ્વિજઃ

અસાધ્યૈકજગચ્છાસ્તા વિશ્વવંદ્યો જયધ્વજઃ ।
આત્મતત્વાધિપઃ કર્તૃશ્રેષ્ઠો વિધિરુમાપતિઃ

ભર્તૃશ્રેષ્ઠઃ પ્રજેશાગ્ર્યો મરીચિર્જનકાગ્રણીઃ ।
કશ્યપો દેવરાજેંદ્રઃ પ્રહ્લાદો દૈત્યરાટ્શશી

નક્ષત્રેશો રવિસ્તેજઃ શ્રેષ્ઠઃ શુક્રઃ કવીશ્વરઃ ।
મહર્ષિરાટ્ભૃગુર્વિષ્ણુરાદિત્યેશો બલિસ્વરાટ્

વાયુર્વહ્નિઃ શુચિઃ શ્રેષ્ઠઃ શંકરો રુદ્રરાટ્ગુરુઃ ।
વિદ્વત્તમશ્ચિત્રરથો ગંધર્વાગ્ર્યોક્ષરોત્તમઃ

વર્ણાદિરગ્ર્યસ્ત્રીગૌરીશક્ત્યાગ્ર્યાશીશ્ચ નારદઃ ।
દેવર્ષિરાટ્પાંડવાગ્ર્યોઽર્જુનોવાદઃ પ્રવાદરાટ્

પવનઃ પવનેશાનો વરુણો યાદસાં પતિઃ ।
ગંગાતીર્થોત્તમોદ્યૂતં છલકાગ્ર્યં વરૌષધમ્

અન્નં સુદર્શનોઽસ્ત્રાગ્ર્યં વજ્રં પ્રહરણોત્તમમ્ ।
ઉચ્ચૈઃશ્રવાવાજિરાજ ઐરાવતૈભેશ્વરઃ

અરુંધત્યેકપત્નીશો હ્યશ્વત્થોઽશેષવૃક્ષરાટ્ ।
અધ્યાત્મવિદ્યાવિદ્યાગ્ર્યઃ પ્રણવચ્છંદસાં વરઃ

મેરુર્ગિરિપતિર્માર્ગો માસાગ્ર્યઃ કાલસત્તમઃ ।
દિનાદ્યાત્મા પૂર્વસિદ્ધઃ કપિલઃ સામવેદરાટ્

તાર્ક્ષ્યઃ ખગેંદ્ર ઋત્વગ્ર્યો વસંતઃ કલ્પપાદપઃ ।
દાતૃશ્રેષ્ઠઃ કામધેનુરાર્તિઘ્નાગ્ર્ય સુહૃત્તમઃ

ચિંતામણિર્ગુરુશ્રેષ્ઠો માતા હિતતમઃ પિતા ।
સિંહો મૃગેંદ્રો નાગેંદ્રો વાસુકિર્નૃવરો નૃપ

વર્ણેશો બ્રાહ્મણશ્ચેતઃ કરુણાગ્ર્યં નમોનમઃ ।
ઇત્યેતદ્વાસુદેવસ્ય વિષ્ણોર્નામસહસ્રકમ્

સર્વાપરાધશમનં પરં ભક્તિવિવર્દ્ધનમ્ ।
અક્ષયં બ્રહ્મલોકાદિ સર્વસ્વર્ગૈકસાધનમ્

વિષ્ણુલોકૈકસોપાનં સર્વદુઃખવિનાશનમ્ ।
સમસ્તસુખદં સદ્યઃ પરં નિર્વાણદાયકમ્

કામક્રોધાદિનિઃશેષમનોમલવિશોધનમ્ ।
શાંતિદં પાવનં નૄણાં મહાપાતકિનામપિ

સર્વેષાં પ્રાણિનામાશુ સર્વાભીષ્ટફલપ્રદમ્ ।
સમસ્તવિઘ્નશમનં સર્વારિષ્ટવિનાશનમ્

ઘોરદુઃખપ્રશમનં તીવ્રદારિદ્ર્યનાશનમ્ ।
ઋણત્રયાપહં ગુહ્યં ધનધાન્યયશસ્કરમ્

સર્વૈશ્વર્યપ્રદં સર્વસિદ્ધિદં સર્વધર્મદમ્ ।
તીર્થયજ્ઞતપોદાનવ્રતકોટિફલપ્રદમ્

જગજ્જાડ્યપ્રશમનં સર્વવિદ્યાપવર્ત્તકમ્ ।
રાજ્યદં ભ્રષ્ટરાજ્યાનાં રોગિણાં સર્વરોગહૃત્

વંધ્યાનાં સુતદં ચાયુઃક્ષીણાનાં જીવિતપ્રદમ્ ।
ભૂતગ્રહવિષધ્વંસિ ગ્રહપીડાવિનાશનમ્

માંગલ્યં પુણ્યમાયુષ્યં શ્રવણાત્પઠનાજ્જપાત્ ।
સકૃદસ્યાખિલાવેદાઃ સાંગા મંત્રાશ્ચ કોટિશઃ

પુરાણશાસ્ત્રસ્મૃતયઃ શ્રુતા સ્યુઃ પઠિતાસ્તથા ।
જપ્ત્વા ચૈકાક્ષરં શ્લોકં પાદં વા પઠતિ પ્રિયે

નિત્યં સિધ્યતિ સર્વેષ્ટમચિરાત્કિમુતાખિલમ્ ।
નાનેન સદૃશં સદ્યઃ પ્રત્યયં સર્વકર્મસુ

ઇદં ભદ્રે ત્વયા ગોપ્યં પાઠ્યં સ્વાર્થૈકસિદ્ધયે ।
નાવૈષ્ણવાય દાતવ્યં વિકલ્પોપહતાત્મને

ભક્તિશ્રદ્ધાવિહીનાય વિષ્ણુસામાન્યદર્શિને ।
દેયં પુત્રાય શિષ્યાય સુહૃદે હિતકામ્યયા

મત્પ્રસાદાદૃતેનેદં ગ્રહીષ્યંત્યલ્પમેધસઃ ।
કલૌ સદ્યઃ ફલં કલ્પગ્રામં નેષ્યતિ નારદઃ

લોકાનાં ભાગ્યહીનાનાં યેન દુઃખં વિનશ્યતિ ।
દ્વિત્રેષુ વૈષ્ણવેષ્વેતદાર્યાવર્તે ભવિષ્યતિ

નાસ્તિ વિષ્ણોઃ પરં ધામ નાસ્તિ વિષ્ણોઃ પરં તપઃ ।
નાસ્તિ વિષ્ણોઃ પરો ધર્મો નાસ્તિ મંત્રો હ્યવૈષ્ણવઃ

નાસ્તિ વિષ્ણોઃ પરં સત્યં નાસ્તિ વિષ્ણોઃ પરો મખઃ ।
નાસ્તિ વિષ્ણોઃ પરં ધ્યાનં નાસ્તિ વિષ્ણોઃ પરા ગતિઃ

કિં તસ્ય બહુભિર્મંત્રૈઃ શાસ્ત્રૈર્વા ર્બહુવિસ્તરૈઃ ।
વાજપેયસહસ્રૈર્વા ભક્તિર્યસ્ય જનાર્દને

સર્વતીર્થમયો વિષ્ણુઃ સર્વશાસ્ત્રમયઃ પ્રભુઃ ।
સર્વક્રતુમયો વિષ્ણુઃ સત્યં સત્યં વદામ્યહમ્ ।
આબ્રહ્મસારસર્વસ્વં સર્વમેતન્મયોદિતમ્

પાર્વત્યુવાચ-
ધન્યાસ્મ્યનુગૃહીતાસ્મિ કૃતાર્થાસ્મિ જગત્પતે ।
યન્મયેદં શ્રુતં સ્તોત્રં ત્વદ્રહસ્યં સુદુર્લભમ્

અહો બત મહત્કષ્ટં સમસ્તદુઃખહે હરૌ ।
વિદ્યમાનેઽપિ દેવેશે મૂઢાઃ ક્લિશ્યંતિ સંસૃતૌ

યમુદ્દિશ્ય સદા નાથં મહેશોઽપિ દિગંબરઃ ।
જટિલો ભસ્મલિપ્તાંગો તપસ્વી વીક્ષ્યતે જનૈઃ

તતોઽધિકોઽસ્તિ દેવઃ કો લક્ષ્મીકાંતાન્મધુદ્વિષઃ ।
યત્તત્ત્વં ચિંત્યતે નિત્યં ત્વયા યોગેશ્વરેણ હિ

તતઃ પરં કિમધિકં પદં શ્રીપુરુષોત્તમાત્ ।
તમવિજ્ઞાય કં મૂઢાઃ યજંતે જ્ઞાનમાનિનઃ

મુષિતાસ્મિ ત્વયા નાથ ચિરં યદયમીશ્વરઃ ।
પ્રકાશિતો ન મે યસ્માત્ત્વદાદ્યા દિવ્યશક્તયઃ

અહો સર્વેશ્વરો વિષ્ણુઃ સર્વદેવોત્તમોત્તમઃ ।
ભવદાદિગુરુર્મૂઢૈઃ સામાન્ય ઇવ વીક્ષ્યતે

મહીયસાં હિ માહાત્મ્યં ભજમાનાન્ભજંતિ તે ।
દ્વિષતોઽપિ વૃથા પાપાનુપેક્ષ્યંતે ક્ષમાન્વિતાઃ

મયાપિ બાલ્યે સ્વપિતુઃ પ્રજા દૃષ્ટા બુભુક્ષિતાઃ ।
દુઃખાદશક્તયા પોષ્ટું શ્રિયમારાધ્ય વૈ ભૃતાઃ

તયા સંનિહિતાભ્યશ્ચ પ્રજાભ્યો ભવદાદયઃ ।
વિલસંતિ સ શક્રાદ્યાઃ સસુહૃન્મિત્રબાંધવાઃ

તયા વિના ક્વ દેવત્વં ક્વૈશ્વર્યં ક્વ પરિગ્રહઃ ।
સર્વે ભવંતિ જીવંતો યાતનાસ્વેવ સંસ્થિતાઃ

તામૃતેનૈવ ધર્મોઽથ કામો મોક્ષોઽપિ દૂરતઃ ।
ક્ષુધિતાનાં દુર્ગતાનાં કુતો યોગસમાધયઃ

સ ચ સંસારસારૈકઃ સર્વલોકૈકનાયકઃ ।
વશગા કમલા યસ્ય ત્યક્ત્વા તામપિ શંકરઃ

અનૌદ્ધત્યેન શૌચેન રૂપેણાર્જવસંપદા ।
સર્વાતિશયવીર્યેણ સંપૂર્ણસ્ય મહાત્મનઃ

કસ્તેન તુલ્યતામેતિ દેવદેવેન વિષ્ણુના ।
યસ્યાંશાંશાવતારેણ વિના સર્વં વિલીયતે

જગદેતત્તથાપ્યાહુર્દોષાયૈતદ્વિમોહિતાઃ ।
નાસ્ય જન્મ ન વા મૃત્યુર્નાપ્રાપ્યં સ્વાર્થમેવ ચ

કામાદ્યાસક્તચિત્તત્વાત્કિં તુ સર્વેશ્વરપ્રભો ।
ત્વન્મયત્વાત્પ્રમાદાદ્વા શક્નોમિ પઠિતું ન ચેત્

વિષ્ણોઃ સહસ્રનામૈતત્પ્રત્યહં વૃષભધ્વજ ।
નામ્નૈકેન તુ યેન સ્યાત્તત્ફલં બ્રૂહિ મે પ્રભો

મહાદેવ ઉવાચ-
રામરામેતિ રામેતિ રમે રામે મનોરમે ।
સહસ્રનામતત્તુલ્યં રામનામ વરાનને

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખંડે ઉમાપતિનારદસંવાદે વિષ્ણોર્નામસહસ્રં સંપૂર્ણં નામૈકસપ્તતિતમોઽધ્યાયઃ