પદ્મ પુરાણ · અધ્યાય 6.68

મહેશ્વર ઉવાચ-
શૃણુ નારદ! વક્ષ્યામિ વૈષ્ણવાનાં ચ લક્ષણમ્।
યચ્છ્રુત્વા મુચ્યતે લોકો બ્રહત્યાદિપાતકાત્

તેષાં વૈ લક્ષણં યાદૃક્સ્વરૂપં યાદૃશં ભવેત્।
તાદૃશં મુનિશાર્દૂલ શૃણુ ત્વં વચ્મિ સામ્પ્રતમ્

વિષ્ણોરયં યતો હ્યાસીત્તસ્માદ્વૈષ્ણવ ઉચ્યતે।
સર્વેષાં ચૈવ વર્ણાનાં વૈષ્ણવઃ શ્રેષ્ઠ ઉચ્યતે

યેષાં પુણ્યતમાહારસ્તેષાં વંશે તુ વૈષ્ણવઃ।
ક્ષમા દયા તપઃ સત્યં યેષાં વૈ તિષ્ઠતિ દ્વિજ

તેષાં દર્શનમાત્રેણ પાપં નશ્યતિ તૂલવત્।
હિંસાધર્માદ્વિનિર્મુક્તા યસ્ય વિષ્ણૌ સ્થિતામતિ:

શંખચક્રગદાપદ્મં નિત્યં વૈ ધારયેત્તુ યઃ।
તુલસીકાષ્ઠજાં માલાં કંઠે વૈ ધારયેદ્યતઃ

તિલકાનિ દ્વાદશધા નિત્યં વૈ ધારયેદ્બુધઃ।
ધર્માધર્મં તુ જાનાતિ યઃ સ વૈષ્ણવ ઉચ્યતે

વેદશાસ્ત્રરતો નિત્યં નિત્યં વૈ યજ્ઞયાજકઃ।
ઉત્સવાંશ્ચ ચતુર્વિંશત્કુર્વંતિ ચ પુનઃ પુનઃ

તેષાં કુલં ધન્યતમં તેષાં વૈ યશ ઉચ્યતે।
તે વૈ લોકે ધન્યતમા જાતા ભાગવતા નરાઃ

એક એવ કુલે યસ્ય જાતો ભાગવતો નરઃ।
તત્કુલં તારિતં તેન ભૂયોભૂયશ્ચ વાડવ

અણ્ડજા ઉદ્ભિજાશ્ચૈવ યે જરાયુજ યોનયઃ।
તે તુ સર્વેઽપિ વિજ્ઞેયાઃ શંખચક્રગદાધરાઃ

યેષાં દર્શનમાત્રેણ બ્રહ્મહા શુદ્ધ્યતે સદા।
કિન્તુ વક્ષ્યામિ દેવર્ષે તેભ્યો ધન્યતમા ભુવિ

વૈષ્ણવા યે તુ દૃશ્યન્તે ભુવનેઽસ્મિન્મહામુને।
તે વૈ વિષ્ણુસમાશ્ચૈવ જ્ઞાતવ્યાસ્તત્વકોવિદૈઃ

કલૌ ધન્યતમા લોકે શ્રુતા મે નાત્ર સંશયઃ।
વિષ્ણોઃ પૂજા કૃતા તેન સર્વેષાં પૂજનં કૃતમ્

મહાદાનં કૃતં તેન પૂજિતા યેન વૈષ્ણવાઃ।
ફલં પત્રં તથા શાકમન્નં વા વસ્ત્રમેવ ચ

વૈષ્ણવેભ્યઃ પ્રયચ્છન્તિ તે ધન્યા ભુવિ સર્વદા।
અર્ચિતો વૈષ્ણવો યૈસ્તુ સર્વેષાં ચૈવ પૂજનમ્

કૃતં યૈરર્ચિતો વિષ્ણુસ્તે વૈ ધન્યતમા મતાઃ।
તેષાં દર્શનમાત્રેણ શુદ્ધ્યતે પાતકાન્નરઃ

કિમન્યદ્બહુનોક્તેન ભૂયોભૂયશ્ચ વાડવ।
અતો વૈ દર્શનં તેષાં સ્પર્શને સુખદાયકમ્

યથા વિષ્ણુસ્તથા ચાયં નાન્તરં વર્તતે ક્વચિત્।
ઇતિ જ્ઞાત્વા તુ ભો વત્સ સર્વદા પૂજયેદ્બુધઃ

એક એવ તુ યૈર્વિપ્રો વૈષ્ણવો ભુવિ ભોજ્યતે।
સહસ્રં ભોજિતં તેન દ્વિજાનાં નાત્ર સંશયઃ

ઇતિ શ્રીપાદ્મે મહાપુરાણે પઞ્ચપઞ્ચાશત્સાહસ્ર્યાં સંહિતાયામુત્તરખંડે ઉમાપતિનારદસંવાદે વૈષ્ણવમાહાત્મ્યંનામ અષ્ટષષ્ટિતમોઽધ્યાયઃ