પદ્મ પુરાણ · અધ્યાય 6.65

નારદ ઉવાચ-
ચાતુર્માસ્યવ્રતાનાં ચ પ્રબ્રૂહ્યુદ્યાપનં વિભો ।
ઉદ્યાપને કૃતે સર્વં સંપૂર્ણં ભવતિ ધ્રુવમ્

મહાદેવ ઉવાચ-
વ્રતં કૃત્વા મહાભાગ યદિ નોદ્યાપનં ચરેત્ ।
યસ્તુ કર્ત્તા કર્મણાં સ ન સમ્યક્ફલભાક્ભવેત્

વ્રતવૈકલ્યમાસાદ્ય કુષ્ઠી ચાંધઃ પ્રજાયતે ।
એતસ્માત્કારણાચ્ચૈવ કુર્યાદુદ્યાપનં દ્વિજ

ગૃહીત્વા નિયમાનેતાન્પાલયિત્વા યથાવિધિ ।
સુપ્તોત્થિતે જગન્નાથે ગત્વા બ્રાહ્મણસંનિધૌ

ક્ષમાપયેદ્દેવદેવં યથાવિધિ ચ વિસ્તરાત્ ।
તૈલત્યાગે ઘૃતં દદ્યાદ્ઘૃતત્યાગે પયઃ સ્મૃતમ્

મૌને પિંડાસ્તિલા દેયાઃ સહિરણ્યા દ્વિજાતયે ।
ભોજને ભોજનં દદ્યાદ્દધ્યોદનસમન્વિતમ્

અન્નં દદ્યાદ્વિશેષેણ હિરણ્યેન સમન્વિતમ્ ।
અન્નદાનાન્મુનિશ્રેષ્ઠ વિષ્ણુલોકે મહીયતે

પાલાશપાત્રે યો ભુંક્તે નરો માસચતુષ્ટયમ્ ।
ભાજનં ઘૃતપૂર્ણં તુ દદ્યાદુદ્યાપને દ્વિજ

ષડ્રસં ભોજનં દદ્યાદ્બ્રાહ્મણે નક્તભોજને ।
અયાચિતે હ્યનડ્વાહં સહિરણ્યં પ્રદાપયેત્

માષં ત્યજન્મુનિશ્રેષ્ઠ ગાં ચ દદ્યાત્સવત્સકામ્ ।
ધાત્રીસ્નાને નરો દદ્યાત્સ્વર્ણં માષિકમેવચ

ફલાનાં નિયમે ચૈવ ફલાનિ ચ પ્રદાપયેત્ ।
ધાન્યાનાં નિયમે ધાન્યમથવા શાલયઃ સ્મૃતાઃ

તદ્વદ્ભૂશયને શય્યાં સતૂલાં ગેંદુકાન્વિતામ્ ।
બ્રહ્મચર્યં કૃતં યેન ચાતુર્માસ્યે દ્વિજોત્તમ

દંપત્યોર્ભોજનં દેયમુભયોર્ભક્તિપૂર્વકમ્ ।
સભોગં દક્ષિણોપેતં સશાકં લવણં તથા

નિત્યસ્નાને નરો દદ્યાન્નિસ્નેહે સર્પિઃ સક્તવઃ ।
નખકેશવ્રતે ચૈવ પ્રાદેશં પરિકલ્પયેત્

ઉપાનહૌ પ્રદાતવ્યૌ ઉપાનહવિવર્જનાત્ ।
આમિષસ્ય પરિત્યાગાત્સવત્સા કપિલા સ્મૃતા

નિત્યં દીપપ્રદો યસ્તુ સૌવર્ણં દીપમાવહેત્ ।
તં દીપં ઘૃતસંયુક્તં દદ્યાચ્ચૈવ દ્વિજન્મને

વિષ્ણુભક્તાય વિપ્રાય પરિપૂર્ણવ્રતેપ્સયા ।
શાકસ્ય નિયમે શાકં માષે સૌવર્ણમાષકમ્

મૈથુનાનાં તુ નિયમે રૌપ્યં દદ્યાદ્દિવજાતયે ।
નાગવલ્લ્યાસ્તુ નિયમે કર્પૂરં સહરિણ્યકમ્

કાલેકાલે દ્વિજશ્રેષ્ઠ યત્કૃતં નિયમેન તુ ।
તત્તદ્દેયં વિશેષેણ પરલોકગતીપ્સયા

આદૌ સ્નાનાદિકં કૃત્વા વિષ્ણોરગ્રે પ્રકાશયેત્ ।
અનાદિનિધનો દેવઃ શંખચક્રગદાધરઃ ।
તસ્યાગ્રે કે ન કુર્વંતિ યતો વિષ્ણુસ્તુ પાપહા

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખંડે ઉમાપતિનારદસંવાદે ચાતુર્માસ્યોદ્યાપનંનામ પંચષષ્ટિતમોઽધ્યાયઃ