પદ્મ પુરાણ · અધ્યાય 6.56

યુધિષ્ઠિર ઉવાચ-
ભાદ્રસ્ય કૃષ્ણપક્ષે તુ કિંનામૈકાદશીભવેત્ ।
એતદિચ્છામ્યહં શ્રોતું કથયસ્વ જનાર્દન

શ્રીકૃષ્ણ ઉવાચ-
શૃણુષ્વૈકમના રાજન્કથયિષ્યામિ વિસ્તરાત્ ।
અજેતિ નામતઃ પ્રોક્તા સર્વપાપપ્રણાશિની

પૂજયિત્વા હૃષીકેશં વ્રતમસ્યાં કરોતિ યઃ ।
પાપાનિ તસ્ય નશ્યંતિ વ્રતસ્ય શ્રવણાદપિ

નાતઃ પરતરા રાજન્લોકદ્વયહિતાય વૈ ।
સત્યમુક્તં મયા હ્યેતન્નાસત્યં મમ ભાષિતમ્

હરિશ્ચન્દ્ર ઇતિ ખ્યાતો બભૂવ નૃપતિઃ પુરા ।
ચક્રવર્તી સત્યસંધઃ સમસ્તાયા ભુવઃ પતિઃ

કસ્યાપિ કર્મણઃ પ્રાપ્તૌ રાજ્યભ્રષ્ટો બભૂવ સઃ ।
વિક્રીતૌ વનિતાપુત્રૌ સ ચકારાત્મવિક્રયમ્

પુલ્કસસ્ય ચ દાસત્વં ગતો રાજા સ પુણ્યકૃત્ ।
સત્યમાલંબ્ય રાજેંદ્ર મૃતચૈલાપહારકઃ

સોઽભવન્નૃપતિશ્રેષ્ઠો ન સત્યાચ્ચલિતસ્તથા ।
એવં ચ તસ્ય નૃપતેર્બહવો વત્સરા ગતાઃ

તતશ્ચિંતાપરો રાજા સ બભૂવાતિદુઃખિતઃ ।
કિં કરોમિ ક્વ ગચ્છામિ નિષ્કૃતિર્મે કથં ભવેત્

ઇતિ ચિંતયતસ્તસ્ય મગ્નસ્ય વૃજિનાર્ણવે ।
આજગામ મુનિઃ કશ્ચિજ્જ્ઞાત્વા રાજાનમાતુરમ્

પરોપકારણાર્થાય નિર્મિતા બ્રહ્મણા દ્વિજાઃ ।
સ તં દૃષ્ટ્વા દ્વિજવરં નનામ નૃપસત્તમઃ

કૃતાંજલિપુટો ભૂત્વા ગૌતમસ્યાગ્રતઃ સ્થિતઃ ।
કથયામાસ વૃત્તાંતમાત્મનો દુઃખસંયુતમ્

શ્રુત્વા નૃપતિવાક્યાનિ ગૌતમો વિસ્મયાન્વિતઃ ।
ઉપદેશં નૃપતયે વ્રતસ્યાસ્ય દદૌ મુનિઃ

માસિ ભાદ્રપદે રાજન્કૃષ્ણપક્ષેતિ શોભના ।
એકાદશી સમાયાતા અજા નામેતિ પુણ્યદા

અસ્યાઃ કુરુ વ્રતં રાજન્પાપસ્યાંતો ભવિષ્યતિ ।
તવ ભાગ્યવશાદેષા સપ્તમેઽહ્નિ સમાગતા

ઉપવાસપરો ભૂત્વા રાત્રૌ જાગરણં કુરુ ।
એવમસ્યા વ્રતે ચીર્ણે તવ પાપક્ષયો ધ્રુવમ્

તવ પુણ્યપ્રભાવેણ ચાગતોઽહં નૃપોત્તમ ।
ઇત્યેવં કથયિત્વા ચ મુનિરંતરધીયત

મુનિવાક્યં નૃપઃ શ્રુત્વા ચકાર વ્રતમુત્તમમ્ ।
કૃતે તસ્મિન્વ્રતે રાજ્ઞઃ પાપસ્યાંતોઽભવત્ક્ષણાત્

શ્રૂયતાં રાજશાર્દૂલ પ્રભાવોઽસ્ય વ્રતસ્ય ચ ।
યદ્દુઃખંબહુભિર્વર્ષૈર્ભોક્તવ્યંતત્ક્ષયોભવેત્

નિસ્તીર્ણદુઃખો રાજાસીદ્વ્રતસ્યાસ્ય પ્રભાવતઃ ।
પત્ન્યા સહ સમાયોગં પુત્રજીવનમાપ સઃ

દિવિ દુંદુભયો નેદુઃ પુષ્પવર્ષમભૂદ્દિવઃ ।
એકાદશ્યાઃ પ્રભાવેન પ્રાપ્યરાજ્યમકંટકમ્

સ્વર્ગં લેભે હરિશ્ચંદ્રઃ સપુરઃ સપરિચ્છદઃ ।
ઈદૃગ્વિધં વ્રતંરાજન્યે કુર્વંતિ ચ માનવાઃ

સર્વપાપવિનિર્મુક્તાસ્ત્રિદિવં યાંતિ તે નૃપ ।
પઠનાચ્છ્રવણાદ્વાપિ અશ્વમેધફલં લભેત્

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખંડે ઉમાપતિનારદસંવાદે ભાદ્રપદકૃષ્ણાજૈકાદશીનામ ષટ્પંચાશત્તમોઽધ્યાયઃ