Scripture Library

Padma Purana · Chapter 6.56

6.56.1

yudhiṣṭhira uvāca-
bhādrasya kṛṣṇapakṣe tu kiṃnāmaikādaśībhavet /
etadicchāmyahaṃ śrotuṃ kathayasva janārdana

6.56.2

śrīkṛṣṇa uvāca-
śṛṇuṣvaikamanā rājankathayiṣyāmi vistarāt /
ajeti nāmataḥ proktā sarvapāpapraṇāśinī

6.56.3

pūjayitvā hṛṣīkeśaṃ vratamasyāṃ karoti yaḥ /
pāpāni tasya naśyaṃti vratasya śravaṇādapi

6.56.4

nātaḥ paratarā rājanlokadvayahitāya vai /
satyamuktaṃ mayā hyetannāsatyaṃ mama bhāṣitam

6.56.5

hariścandra iti khyāto babhūva nṛpatiḥ purā /
cakravartī satyasaṃdhaḥ samastāyā bhuvaḥ patiḥ

6.56.6

kasyāpi karmaṇaḥ prāptau rājyabhraṣṭo babhūva saḥ /
vikrītau vanitāputrau sa cakārātmavikrayam

6.56.7

pulkasasya ca dāsatvaṃ gato rājā sa puṇyakṛt /
satyamālaṃbya rājeṃdra mṛtacailāpahārakaḥ

6.56.8

so'bhavannṛpatiśreṣṭho na satyāccalitastathā /
evaṃ ca tasya nṛpaterbahavo vatsarā gatāḥ

6.56.9

tataściṃtāparo rājā sa babhūvātiduḥkhitaḥ /
kiṃ karomi kva gacchāmi niṣkṛtirme kathaṃ bhavet

6.56.10

iti ciṃtayatastasya magnasya vṛjinārṇave /
ājagāma muniḥ kaścijjñātvā rājānamāturam

6.56.11

paropakāraṇārthāya nirmitā brahmaṇā dvijāḥ /
sa taṃ dṛṣṭvā dvijavaraṃ nanāma nṛpasattamaḥ

6.56.12

kṛtāṃjalipuṭo bhūtvā gautamasyāgrataḥ sthitaḥ /
kathayāmāsa vṛttāṃtamātmano duḥkhasaṃyutam

6.56.13

śrutvā nṛpativākyāni gautamo vismayānvitaḥ /
upadeśaṃ nṛpataye vratasyāsya dadau muniḥ

6.56.14

māsi bhādrapade rājankṛṣṇapakṣeti śobhanā /
ekādaśī samāyātā ajā nāmeti puṇyadā

6.56.15

asyāḥ kuru vrataṃ rājanpāpasyāṃto bhaviṣyati /
tava bhāgyavaśādeṣā saptame'hni samāgatā

6.56.16

upavāsaparo bhūtvā rātrau jāgaraṇaṃ kuru /
evamasyā vrate cīrṇe tava pāpakṣayo dhruvam

6.56.17

tava puṇyaprabhāveṇa cāgato'haṃ nṛpottama /
ityevaṃ kathayitvā ca muniraṃtaradhīyata

6.56.18

munivākyaṃ nṛpaḥ śrutvā cakāra vratamuttamam /
kṛte tasminvrate rājñaḥ pāpasyāṃto'bhavatkṣaṇāt

6.56.19

śrūyatāṃ rājaśārdūla prabhāvo'sya vratasya ca /
yadduḥkhaṃbahubhirvarṣairbhoktavyaṃtatkṣayobhavet

6.56.20

nistīrṇaduḥkho rājāsīdvratasyāsya prabhāvataḥ /
patnyā saha samāyogaṃ putrajīvanamāpa saḥ

6.56.21

divi duṃdubhayo neduḥ puṣpavarṣamabhūddivaḥ /
ekādaśyāḥ prabhāvena prāpyarājyamakaṃṭakam

6.56.22

svargaṃ lebhe hariścaṃdraḥ sapuraḥ saparicchadaḥ /
īdṛgvidhaṃ vrataṃrājanye kurvaṃti ca mānavāḥ

6.56.23

sarvapāpavinirmuktāstridivaṃ yāṃti te nṛpa /
paṭhanācchravaṇādvāpi aśvamedhaphalaṃ labhet

6.56.56

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāpatināradasaṃvāde bhādrapadakṛṣṇājaikādaśīnāma ṣaṭpaṃcāśattamo'dhyāyaḥ

Original text: padmapurāṇam · Sanskrit Wikisource contributors · Sanskrit Wikisource · CC BY-SA 4.0