પદ્મ પુરાણ · અધ્યાય 6.54

યુધિષ્ઠિર ઉવાચ-
શ્રાવણસ્ય સિતે પક્ષે કિંનામૈકાદશીભવેત્ ।
તન્નઃ કથય ગોવિંદ વાસુદેવ નમોઽસ્તુ તે

શ્રીકૃષ્ણ ઉવાચ-
શૃણુ રાજન્પ્રવક્ષ્યામિ આખ્યાનં પાપનાશનમ્ ।
યત્પ્રોક્તં બ્રહ્મણા પૂર્વં પૃચ્છતે નારદાય વૈ

નારદ ઉવાચ-
ભગવન્શ્રોતુમિચ્છામિ ત્વત્તોઽહં કમલાસન ।
શ્રાવણસ્યાસિતે પક્ષે કિં નામૈકાદશી ભવેત્

કો દેવઃ કો વિધિસ્તસ્યાઃ કિં પુણ્યં કથય પ્રભો ।
ઇતિ તસ્ય વચઃ શ્રુત્વા બ્રહ્મા વચનમબ્રવીત્

બ્રહ્મોવાચ-
શૃણુ નારદ તે વચ્મિ લોકાનાં હિતકામ્યયા ।
શ્રાવણૈકાદશી કૃષ્ણા કામિકા નામ નામતઃ

અસ્યાઃ શ્રવણમાત્રેણ વાજપેયફલં લભેત્ ।
અસ્યાં યજતિ દેવેશં શંખચક્રગદાધરમ્

શ્રીધરાખ્યં હરિં વિષ્ણું માધવં મધુસૂદનમ્ ।
પૂજયેદ્ધ્યાયતે યો વૈ તસ્ય પુણ્યંફલં શૃણુ

ન ગંગાયાં ન કાશ્યાં ચ નૈમિષે ન ચ પુષ્કરે ।
તત્ફલં સમવાપ્નોતિ યત્ફલં કૃષ્ણપૂજનાત્

ગોદાવર્યાં ગુરૌ સિંહે વ્યતીપાતે ચ દંડકે ।
યત્ફલં સમવાપ્નોતિ તત્ફલં કૃષ્ણપૂજનાત્

સસાગરવનોપેતાં યો દદાતિ વસુંધરામ્ ।
કામિકાવ્રતકારી ચ હ્યુભૌ સમફલૌ સ્મૃતૌ

પ્રસૂયમાનાં યો ધેનું દદ્યાત્સોપસ્કરાં નરઃ ।
તત્ફલં સમવાપ્નોતિ કામિકાવ્રતકારકઃ

શ્રાવણે શ્રીધરં દેવં પૂજયેદ્યો નરોત્તમઃ ।
તેનૈવ પૂજિતા દેવા ગંધર્વોરગપન્નગાઃ

તસ્માત્સર્વપ્રયત્નેન કામિકાદિવસે હરિઃ ।
પૂજનીયો યથાશક્તિ માનુષૈઃ પાપભીરુભિઃ

યે સંસારાર્ણવે મગ્નાઃ પાપપંકસમાકુલે ।
તેષામુદ્ધરણાર્થાય કામિકાવ્રતમુત્તમમ્

નાતઃ પરતરા કાચિત્પવિત્રા પાપહારિણી ।
એવં નારદ જાનીહિ સ્વયમાહ પરો હરિઃ

અધ્યાત્મવિદ્યા નિરતૈર્યત્ફલં પ્રાપ્યતે નરૈઃ ।
તતો બહુતરં વિદ્ધિ કામિકાવ્રતસેવિનામ્

રાત્રૌ જાગરણં કૃત્વા કામિકાવ્રતકૃન્નરઃ ।
ન પશ્યતિ યમં રૌદ્રં નૈવ ગચ્છતિ દુર્ગતિમ્

ન પશ્યતિ કુયોનિં ચ કામિકાવ્રતસેવનાત્ ।
કામિકાયા વ્રતે ચીર્ણે કૈવલ્યં યોગિનો ગતાઃ

તસ્માત્સર્વપ્રયત્નેન કર્તવ્યા નિયતાત્મભિઃ ।
તુલસીપ્રભવૈઃ પત્રૈઃ યો નરઃ પૂજયેદ્ધરિમ્

ન લિપ્યતે સ પાપેન પદ્મપત્રમિવાંભસા ।
સુવર્ણભારમેકં તુ રજતં ચ ચતુર્ગુણમ્

તત્ફલં સમવાપ્નોતિ તુલસીદલપૂજનાત્ ।
રત્ન મૌક્તિક વૈડૂર્ય પ્રવાલાદિભિરર્ચિતઃ

ન તુષ્યતિ તથા વિષ્ણુસ્તુલસીદલતો યથા ।
તુલસીમંજરીભિશ્ચ પૂજિતો યેન કેશવઃ

યા દૃષ્ટા નિખિલાઘસંઘશમની સ્પૃષ્ટા વપુઃ પાવની।
રોગાણામભિવંદિતાનિ રસિની સિક્તાંતકત્રાસિની ।
પ્રત્યાસત્તિવિધાયિની ભગવતઃ કૃષ્ણસ્ય સંરોપિતા।
ન્યસ્તા તચ્ચરણે વિમુક્તિફલદા તસ્યૈ તુલસ્યૈ નમઃ

દીપં દદાતિ યો મર્ત્યો દિવારાત્રં હરેર્દિને ।
તસ્ય પુણ્યસ્ય સંખ્યાતું ચિત્રગુપ્તો ન વેત્ત્યલમ્

કૃષ્ણાગ્રે દીપકો યસ્ય જ્વલત્યેકાદશીદિને ।
પિતરસ્તસ્ય તૃપ્યંતિ અમૃતેન દિવિ સ્થિતાઃ

ઘૃતેન દીપં પ્રજ્વાલ્ય તિલતૈલેન વા પુનઃ ।
પ્રયાતિ સૂર્યલોકં ચ દીપકોટિશતાર્ચિતઃ

અયં તવાગ્રે કથિતઃ કામિકામહિમા મયા ।
અતો નરૈઃ પ્રકર્ત્તવ્યા સર્વપાતકહારિણી

બ્રહ્મહત્યાપહરણી ભ્રૂણહત્યાવિનાશિની ।
વૈષ્ણવસ્થાનદાત્રી ચ મહાપુણ્યફલપ્રદા

શ્રુત્વા માહાત્મ્યમેતસ્યા નરઃ શ્રદ્ધાસમન્વિતઃ ।
વિષ્ણુલોકમવાપ્નોતિ સર્વપાપૈઃ પ્રમુચ્યતે

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખંડે ઉમામહેશ્વરસંવાદે શ્રાવણકૃષ્ણૈકાદશીનામ ચતુષ્પંચાશત્તમોઽધ્યાયઃ