પદ્મ પુરાણ · અધ્યાય 6.53

યુધિષ્ઠિર ઉવાચ-
આષાઢસ્ય સિતે પક્ષે કા ચ એકાદશી ભવેત્ ।
કિં નામ કો વિધિસ્તસ્યા એતદ્વિસ્તરતો વદ

શ્રીકૃષ્ણ ઉવાચ-
કથયામિ મહાપુણ્યાં સ્વર્ગમોક્ષપ્રદાયિનીમ્ ।
શયનીં નામનામેતિ સર્વપાપહરાં પરામ્

યસ્યાઃ શ્રવણમાત્રેણ વાજપેયફલં લભેત્ ।
સત્યં સત્યં મયા પ્રોક્તં નાતઃ પરતરં નૃણામ્

પાપિનાં પાપનાશાય સૃષ્ટા ધાત્રા મહોત્તમા ।
અતઃ પરા ન રાજેંદ્ર વર્ત્તતે મોક્ષદાયિની

એતસ્માત્કારણાદ્રાજન્શ્રૂયતાં ગતિરુત્તમા ।
ભવેન્નરાણાં શ્રોતૄણાં કથાયાઃ શ્રવણાદપિ

તે સદા વૈષ્ણવા રાજન્મમ ભક્તિપરાયણાઃ ।
આષાઢે વામનશ્ચૈવ પૂજ્યતે પરમેશ્વરઃ

વામનઃ પૂજિતો યેન કમલૈઃ કમલેક્ષણઃ ।
આષાઢસ્ય સિતે પક્ષે કામિકાયા દિને તથા

તેનાર્ચિતં જગત્સર્વં ત્રયો દેવાઃ સનાતનાઃ ।
કૃતા ચૈકાદશી યેન હરિવાસરમુત્તમમ્

યુધિષ્ઠિર ઉવાચ-
સંશયોઽસ્તિ મહાન્મેઽત્ર શ્રૂયતાં પુરુષોત્તમ ।
કથં સુપ્તોઽસિ દેવેશ કથં ચ બલિમાશ્રિતઃ

કથં ચ ભૂમૌ સંવેશઃ કિં કુર્વંતિ જનાઃ પરે ।
એતદ્વદ મહાપ્રાજ્ઞ સંશયોઽસ્તિ મહાન્મમ

શ્રીકૃષ્ણ ઉવાચ -
શ્રૂયતાં રાજશાર્દૂલ કથાં પાપહરાં પરામ્ ।
યસ્યાઃ શ્રવણમાત્રેણ સર્વપાપક્ષયો ભવેત્

બલિનામા પૂર્વમાસીદ્દૈત્યસ્ત્રેતાયુગે નૃપ ।
પૂજયંશ્ચૈવ માં નિત્યં મદ્ભક્તો મત્પરાયણઃ

યજ્ઞૈસ્તુ વિધિવદ્દૈત્યો યજતે માં સનાતનમ્ ।
ભક્ત્યા ચ પરયા રાજન્યજ્ઞકૃદ્વ્રતકૃત્તથા

પરં વિચાર્ય બહુધા મઘોના ચૈવ સૂક્તિભિઃ ।
ગુરુણા દૈવતૈઃ સાર્દ્ધં બહુધા પૂજિતોઽપ્યહમ્

તતો વામનરૂપેણ અવતારે ચ પંચમે ।
અત્યુગ્રરૂપેણ તદા સર્વબ્રહ્માંડરૂપિણા

વાક્છલેન જિતા દૈત્યાઃ સત્યમાશ્રિત્ય સંસ્થિતઃ ।
શુક્રસ્તં વારયામાસ યન્નારાયણ ઇત્યયમ્

યાચિતા વસુધા રાજન્સાર્દ્ધત્રયપદી મયા ।
સંકલ્પોદકમાત્રે તુ કરે તેનૈવ ચાર્પિતે

રૂપમીદૃગ્વિધં રાજંસ્તદા શૃણુ મયા કૃતમ્ ।
ભૂર્લોકે ચરણૌ ન્યસ્ય ભુવર્લોકે તુ જાનુની

સ્વર્લોકે ચ કટિં ન્યસ્ય મહર્લોકે તથોદરમ્ ।
જનલોકે ચ હૃદયં તપોલોકે તુ કંઠકમ્

સત્યલોકે મુખં સ્થાપ્ય મસ્તકં ચ તદૂર્દ્ધ્વકમ્ ।
ચંદ્રસૂર્યગ્રહાશ્ચૈવ નક્ષત્રાણિ તથૈવ ચ

દેવાઃ સેંદ્રાશ્ચ નાગાશ્ચ યક્ષગંધર્વકિન્નરાઃ ।
સ્તુવંતો વેદસંભૂતૈઃ સૂક્તૈશ્ચ વિવિધૈસ્તથા

કરે ગૃહીત્વા ચ બલિં ત્રિપદૈઃ પૂરિતા મહી ।
અર્દ્ધં ચ તસ્ય પૃષ્ઠે ચ પદં ન્યસ્તં મયા તદા

ગતો રસાતલં રાજન્દાનવો મમ પૂજકઃ ।
ક્ષિપ્તોઽધો દાનવશ્ચૈવ કિમકુર્વં તતઃ પરમ્

વિનયેનાનતોસૌ વૈ સુપ્રસન્નો જનાર્દનઃ ।
આષાઢશુક્લપક્ષે તુ કામિકા હરિવાસરઃ

તસ્યામેકા ચ મૂર્તિર્મે બલિમાશ્રિત્ય તિષ્ઠતિ ।
દ્વિતીયા શેષપૃષ્ઠે વૈ ક્ષીરસાગરમધ્યતઃ

સ્વપિત્યેવ મહારાજ યાવદાગામિ કાર્તિકી ।
તાવદ્ભવેત્સુધર્માત્મા સર્વધર્મોત્તમોત્તમઃ

વ્રતં ચ કુરુતે મર્ત્યઃ સ યાતિ પરમાં ગતિમ્ ।
એતસ્માત્કારણાદ્રાજન્કર્ત્તવ્યા ચ પ્રયત્નતઃ

નાતઃ પરતરા કાચિત્પવિત્રા પાપનાશિની ।
યસ્યાં સ્વપિતિ દેવેશઃ શંખચક્રગદાધરઃ

તસ્યાં ચ પૂજયેદ્દેવં શંખચક્રગદાધરમ્ ।
રાત્રૌ જાગરણં કૃત્વા ભક્ત્યા ચૈવ વિશેષતઃ

નાસ્યાઃ પુણ્યસ્ય સંખ્યાનં કર્તું શક્તશ્ચતુર્મુખઃ ।
એવં યઃ કુરુતે રાજન્નેકાદશ્યા વ્રતોત્તમમ્

સર્વપાપહરં ચૈવ ભુક્તિમુક્તિપ્રદાયકમ્ ।
સ ચ લોકે મમ સદા શ્વપચોઽપિ પ્રિયંકરઃ

દીપદાનેન પાલાશપત્રે ભુક્ત્યા વ્રતેન ચ ।
ચાતુર્માસ્યં નયંતીહ તે નરા મમ વલ્લભાઃ

ચાતુર્માસ્યે હરૌ સુપ્તે ભૂમિશાયી ભવેન્નરઃ ।
શ્રાવણે વર્જયેચ્છાકં દધિ ભાદ્રપદે તથા

દુગ્ધમાશ્વયુજિ ત્યાજ્યં કાર્તિકે દ્વિદલં ત્યજેત્ ।
અથવા બ્રહ્મચર્યસ્થઃ સ યાતિ પરમાં ગતિમ્

એકાદશ્યા વ્રતેનૈવ પુમાન્પાપૈર્વિમુચ્યતે ।
કર્તવ્યા સર્વદા રાજન્વિસ્મર્તવ્યા ન કર્હિચિત્

શયની બોધિની મધ્યે યા કૃષ્ણૈકાદશીભવેત્ ।
સૈવોપોષ્યા ગૃહસ્થસ્ય નાન્યા કૃષ્ણા કદાચન

શૃણુયાચ્ચૈવ યો રાજન્કથાં પાપહરાં પરામ્ ।
અશ્વમેધસ્ય યજ્ઞસ્ય ફલં પ્રાપ્નોતિ માનવઃ

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખંડે ઉમામહેશ્વરસંવાદે દેવશયન્યેકાદશીનામ ત્રિપંચાશત્તમોઽધ્યાયઃ