પદ્મ પુરાણ · અધ્યાય 6.47

યુધિષ્ઠિર ઉવાચ-
વાસુદેવ નમસ્તુભ્યં કથયસ્વ મમાગ્રતઃ ।
ચૈત્રસ્ય શુક્લપક્ષે તુ કિં નામૈકાદશી ભવેત્

શ્રીકૃષ્ણ ઉવાચ-
શૃણુષ્વૈકમના રાજન્કથાં પુણ્યાં પુરાતનીમ્ ।
વસિષ્ઠો યામકથયત્પ્રાગ્દિલીપાય પૃચ્છતે

દિલીપ ઉવાચ-
ભગવઞ્છ્રોતુમિચ્છામિ કથયસ્વ પ્રસાદતઃ ।
ચૈત્રમાસિ સિતે પક્ષે કિંનામૈકાદશી ભવેત્

વસિષ્ઠ ઉવાચ-
સાધુ પૃષ્ટં ત્વયા રાજન્કથયામિ તવાગ્રતઃ ।
ચૈત્રસ્ય શુક્લપક્ષે તુ કામદા નામ નામતઃ

એકાદશી પુણ્યતમા પાપેંધનદવાનલઃ ।
શૃણુ રાજન્કથામેતાં પાપઘ્નીં પુણ્યદાયિનીમ્

પુરા નાગપુરે રમ્યે હેમરત્નવિભૂષિતે ।
પુંડરીકમુખા નાગા નિવસંતિ મહોત્કટાઃ

તસ્મિન્પુરે પુંડરીકો રાજા રાજ્યં ચકાર સઃ ।
ગન્ધર્વૈઃ કિન્નરૈશ્ચૈવ અપ્સરોભિશ્ચ સેવ્યતે

વરાપ્સરાસ્તુ લલિતા ગંધર્વો લલિતસ્તથા ।
ઉભૌ રાગેણ સંરક્તૌ દંપતી કામપીડિતૌ

રેમાતે સ્વગૃહે રમ્યે ધનધાન્યયુતે તદા ।
લલિતાયાશ્ચ હૃદયે પતિર્વસતિ સર્વદા

હૃદયે તસ્ય લલિતા નિત્યં વસતિ ભામિની ।
એકદા પુંડરીકોઽથ ક્રીડતે સદસિ સ્થિતઃ

ગીતં ગાનં પ્રકુરુતે લલિતો દયિતાં વિના ।
પદબંધસ્ખલજ્જિહ્વો બભૂવ લલિતાં સ્મરન્

મનોભાવં વિદિત્વાસ્ય કર્કટો નાગસત્તમઃ ।
પદબંધચ્યુતિં તસ્ય પુંડરીકે ન્યવેદયત્

શ્રુત્વા કર્કોટકવચઃ પુંડરીકો ભુજંગરાટ્ ।
ક્રોધસંરક્તનયનો બભૂવાતિભયંકરઃ

શશાપ લલિતં તત્ર ગાયંતં મદનાતુરમ્ ।
રાક્ષસો ભવ દુર્બુદ્ધે ક્રવ્યાદઃ પુરુષાદકઃ

યતઃ પત્નીવશોપેતો ગાયમાનો મમાગ્રતઃ ।
વચનાત્તસ્ય રાજેંદ્ર રક્ષોરૂપો બભૂવ સઃ

રૌદ્રાનનો વિરૂપાક્ષો દૃષ્ટમાત્રો ભયંકરઃ ।
બાહૂયોજનવિસ્તીર્ણૌ મુખં કંદરસન્નિભમ્

ચંદ્રસૂર્યનિભે નેત્રે ગ્રીવાપર્વતસંનિભા ।
નાસારંધ્રે તુ વિવરે અધરૌ યોજનાયતૌ

શરીરં તસ્ય રાજેંદ્ર ઉત્થિતં યોજનાષ્ટકમ્ ।
ઈદૃશો રાક્ષસો ભૂત્વા ભુંજાનઃ કર્મણઃ ફલમ્

લલિતા તુ તથાલોક્ય સ્વપતિં વિકૃતાકૃતિમ્ ।
ચિંતયામાસ મનસા દુઃખેન મહતાર્દિતા

કિં કરોમિ ક્વ ગચ્છામિ પતિઃ શાપેન પીડિતઃ ।
ઇતિ સંસ્મૃત્ય સંસ્મૃત્ય મનસા શર્મ નાલભત્

ચચાર પતિના સાર્દ્ધં લલિતા ગહને વને ।
બભ્રામ વિપિને દુર્ગે કામરૂપી સ રાક્ષસઃ

નિર્ઘૃણઃ પાપનિરતો વિરૂપઃ પુરુષાદકઃ ।
ન સુખં લભતે રાત્રૌ ન દિવા પાપપીડિતઃ

લલિતા દુઃખિતાતીવ પતિં દૃષ્ટ્વા તથાવિધમ્ ।
બભ્રામ તેન સાર્દ્ધં સા રુદતી ગહને વને

દૃષ્ટ્વાશ્રમપદં રમ્યં મુનિં સંશાંતવિગ્રહમ્ ।
શીઘ્રં જગામ લલિતા નમસ્કૃત્યાગ્રતઃ સ્થિતા

તાં દૃષ્ટ્વા સ મુનિઃ પ્રાહ દુઃખિતાં હિ દયાપરઃ ।
કા ત્વં કસ્માદિહાયાતા સત્યં વદ મમાગ્રતઃ

લલિતોવાચ-
વીરધન્વેતિ ગંધર્વઃ સુતા તસ્ય મહાત્મનઃ ।
લલિતાં નામ માં વિદ્ધિ પત્યર્થમિહ ચાગતામ્

ભર્તા મે પાપદોષેણ રાક્ષસોઽભૂન્મહામુને ।
રૌદ્રરૂપો દુરાચારસ્તં દૃષ્ટ્વા નાસ્તિ મે સુખમ્

સાંપ્રતં શાધિ માં બ્રહ્મન્યત્કૃત્યં તદ્વદ પ્રભો ।
કુરુષ્વ તદ્ વ્રતં ભદ્રે વિધિપૂર્વં મયોદિતમ્

ઋષિરુવાચ-
ચૈત્રમાસસ્ય રંભોરુ શુક્લપક્ષોઽસ્તિ સાંપ્રતમ્ ।
કામદૈકાદશીનામ પાપઘ્ની લલિતે પરા

કુરુષ્વ તદ્વ્રતં ભદ્રે વિધિપૂર્વં મયોદિતમ્ ।
અસ્ય વ્રતસ્ય યત્પુણ્યં તત્સ્વભર્ત્રે પ્રદીયતામ્

દત્તે પુણ્યેક્ષણાત્તસ્ય શાપદોષઃ પ્રયાસ્યતિ ।
ઇતિ શ્રુત્વા મુનેર્વાક્યં લલિતા હર્ષિતાભવત્

ઉપોષ્યૈકાદશીં રાજન્દ્વાદશીદિવસે તથા ।
વિપ્રસ્યૈવ સમીપે તદ્વાસુદેવસ્ય ચાગ્રતઃ

વાક્યમુવાચ લલિતા સ્વપત્યુસ્તારણાય વૈ ।
મયા તુ તદ્વ્રતં ચીર્ણં કામદાયા ઉપોષણમ્

તસ્ય પુણ્યપ્રભાવેન ગચ્છત્વસ્ય પિશાચતા ।
લલિતાવચનાદેવ વર્ત્તમાનોઽપિ તત્ક્ષણે

ગતપાપઃ સ લલિતો દિવ્યદેહો બભૂવ હ ।
રાક્ષસત્વં ગતં તસ્ય પ્રાપ્તા ગંધર્વતા પુનઃ

હેમરત્નસમાકીર્ણો રેમે લલિતયા સહ ।
વિમાનવરમારૂઢૌ પૂર્વરૂપાધિકૌ ચ તૌ

દંપતી અત્યશોભેતાં કામદાયાઃ પ્રભાવતઃ ।
ઇતિ જ્ઞાત્વા નૃપશ્રેષ્ઠ કર્તવ્યૈષા પ્રયત્નતઃ

લોકાનાં તુ હિતાર્થાય તવાગ્રે કથિતા મયા ।
બ્રહ્મહત્યાદિ પાપઘ્ની પિશાચત્વવિનાશની

નાતઃ પરતરા કાચિત્ત્રૈલોક્યે સચરાચરે ।
પઠનાચ્છ્રવણાદ્રાજન્વાજપેયફલં લભેત્

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખંડે ઉમાપતિનારદસંવાદે ચૈત્રશુક્લા કામદાનામ સપ્તચત્વારિંશોઽધ્યાયઃ