Padma Purana · Chapter 6.47

yudhiṣṭhira uvāca-
vāsudeva namastubhyaṃ kathayasva mamāgrataḥ /
caitrasya śuklapakṣe tu kiṃ nāmaikādaśī bhavet

śrīkṛṣṇa uvāca-
śṛṇuṣvaikamanā rājankathāṃ puṇyāṃ purātanīm /
vasiṣṭho yāmakathayatprāgdilīpāya pṛcchate

dilīpa uvāca-
bhagavañchrotumicchāmi kathayasva prasādataḥ /
caitramāsi site pakṣe kiṃnāmaikādaśī bhavet

vasiṣṭha uvāca-
sādhu pṛṣṭaṃ tvayā rājankathayāmi tavāgrataḥ /
caitrasya śuklapakṣe tu kāmadā nāma nāmataḥ

ekādaśī puṇyatamā pāpeṃdhanadavānalaḥ /
śṛṇu rājankathāmetāṃ pāpaghnīṃ puṇyadāyinīm

purā nāgapure ramye hemaratnavibhūṣite /
puṃḍarīkamukhā nāgā nivasaṃti mahotkaṭāḥ

tasminpure puṃḍarīko rājā rājyaṃ cakāra saḥ /
gandharvaiḥ kinnaraiścaiva apsarobhiśca sevyate

varāpsarāstu lalitā gaṃdharvo lalitastathā /
ubhau rāgeṇa saṃraktau daṃpatī kāmapīḍitau

remāte svagṛhe ramye dhanadhānyayute tadā /
lalitāyāśca hṛdaye patirvasati sarvadā

hṛdaye tasya lalitā nityaṃ vasati bhāminī /
ekadā puṃḍarīko'tha krīḍate sadasi sthitaḥ

gītaṃ gānaṃ prakurute lalito dayitāṃ vinā /
padabaṃdhaskhalajjihvo babhūva lalitāṃ smaran

manobhāvaṃ viditvāsya karkaṭo nāgasattamaḥ /
padabaṃdhacyutiṃ tasya puṃḍarīke nyavedayat

śrutvā karkoṭakavacaḥ puṃḍarīko bhujaṃgarāṭ /
krodhasaṃraktanayano babhūvātibhayaṃkaraḥ

śaśāpa lalitaṃ tatra gāyaṃtaṃ madanāturam /
rākṣaso bhava durbuddhe kravyādaḥ puruṣādakaḥ

yataḥ patnīvaśopeto gāyamāno mamāgrataḥ /
vacanāttasya rājeṃdra rakṣorūpo babhūva saḥ

raudrānano virūpākṣo dṛṣṭamātro bhayaṃkaraḥ /
bāhūyojanavistīrṇau mukhaṃ kaṃdarasannibham

caṃdrasūryanibhe netre grīvāparvatasaṃnibhā /
nāsāraṃdhre tu vivare adharau yojanāyatau

śarīraṃ tasya rājeṃdra utthitaṃ yojanāṣṭakam /
īdṛśo rākṣaso bhūtvā bhuṃjānaḥ karmaṇaḥ phalam

lalitā tu tathālokya svapatiṃ vikṛtākṛtim /
ciṃtayāmāsa manasā duḥkhena mahatārditā

kiṃ karomi kva gacchāmi patiḥ śāpena pīḍitaḥ /
iti saṃsmṛtya saṃsmṛtya manasā śarma nālabhat

cacāra patinā sārddhaṃ lalitā gahane vane /
babhrāma vipine durge kāmarūpī sa rākṣasaḥ

nirghṛṇaḥ pāpanirato virūpaḥ puruṣādakaḥ /
na sukhaṃ labhate rātrau na divā pāpapīḍitaḥ

lalitā duḥkhitātīva patiṃ dṛṣṭvā tathāvidham /
babhrāma tena sārddhaṃ sā rudatī gahane vane

dṛṣṭvāśramapadaṃ ramyaṃ muniṃ saṃśāṃtavigraham /
śīghraṃ jagāma lalitā namaskṛtyāgrataḥ sthitā

tāṃ dṛṣṭvā sa muniḥ prāha duḥkhitāṃ hi dayāparaḥ /
kā tvaṃ kasmādihāyātā satyaṃ vada mamāgrataḥ

lalitovāca-
vīradhanveti gaṃdharvaḥ sutā tasya mahātmanaḥ /
lalitāṃ nāma māṃ viddhi patyarthamiha cāgatām

bhartā me pāpadoṣeṇa rākṣaso'bhūnmahāmune /
raudrarūpo durācārastaṃ dṛṣṭvā nāsti me sukham

sāṃprataṃ śādhi māṃ brahmanyatkṛtyaṃ tadvada prabho /
kuruṣva tad vrataṃ bhadre vidhipūrvaṃ mayoditam

ṛṣiruvāca-
caitramāsasya raṃbhoru śuklapakṣo'sti sāṃpratam /
kāmadaikādaśīnāma pāpaghnī lalite parā

kuruṣva tadvrataṃ bhadre vidhipūrvaṃ mayoditam /
asya vratasya yatpuṇyaṃ tatsvabhartre pradīyatām

datte puṇyekṣaṇāttasya śāpadoṣaḥ prayāsyati /
iti śrutvā munervākyaṃ lalitā harṣitābhavat

upoṣyaikādaśīṃ rājandvādaśīdivase tathā /
viprasyaiva samīpe tadvāsudevasya cāgrataḥ

vākyamuvāca lalitā svapatyustāraṇāya vai /
mayā tu tadvrataṃ cīrṇaṃ kāmadāyā upoṣaṇam

tasya puṇyaprabhāvena gacchatvasya piśācatā /
lalitāvacanādeva varttamāno'pi tatkṣaṇe

gatapāpaḥ sa lalito divyadeho babhūva ha /
rākṣasatvaṃ gataṃ tasya prāptā gaṃdharvatā punaḥ

hemaratnasamākīrṇo reme lalitayā saha /
vimānavaramārūḍhau pūrvarūpādhikau ca tau

daṃpatī atyaśobhetāṃ kāmadāyāḥ prabhāvataḥ /
iti jñātvā nṛpaśreṣṭha kartavyaiṣā prayatnataḥ

lokānāṃ tu hitārthāya tavāgre kathitā mayā /
brahmahatyādi pāpaghnī piśācatvavināśanī

nātaḥ paratarā kācittrailokye sacarācare /
paṭhanācchravaṇādrājanvājapeyaphalaṃ labhet

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāpatināradasaṃvāde caitraśuklā kāmadānāma saptacatvāriṃśo'dhyāyaḥ