પદ્મ પુરાણ · અધ્યાય 6.38

મહાદેવ ઉવાચ-
એકસ્મિન્સમયે પુત્ર ગતોઽહં વિષ્ણુસન્નિધૌ ।
તત્ર પૃષ્ટં મયા પૂર્વં માહાત્મ્યં દ્વાદશીભવમ્

નારદ ઉવાચ
કીદૃશી સ્યાન્મહાદેવ મહાદ્વાદશિકા પરા ।
તસ્યા વ્રતે ફલં કીદૃગ્વદ સર્વેશ્વર પ્રભો

શિવ ઉવાચ-
ઇયમેકાદશી બ્રહ્મન્મહાપુણ્યફલપ્રદા ।
ઋક્ષયોગૈશ્ચ સંયુક્તા કર્ત્તવ્યા મુનિસત્તમૈઃ

જયા ચ વિજયા ચૈવ જયંતી પાપનાશિની ।
સર્વપાપહરાશ્ચૈતાઃ કર્ત્તવ્યાઃ ફલકાંક્ષિભિઃ

એકાદશ્યાં યદા ઋક્ષં શુક્લપક્ષે પુનર્વસુઃ ।
નામ્ના સા ચ જયા ખ્યાતા તિથીનામુત્તમા તિથિઃ

તામુપોષ્ય નરઃ પાપાન્મુચ્યતે નાત્ર સંશયઃ ।
યદા ચ શુક્લદ્વાદશ્યાં નક્ષત્રં શ્રવણં ભવેત્

વિજયા સા સમાખ્યાતા તિથીનામુત્તમા તિથિઃ ।
સહસ્રગુણિતં દાનં યસ્યાં વૈ વિપ્ર ભોજનમ્

હોમસ્તથોપવાસશ્ચ સહસ્રાધિફલપ્રદઃ ।
યદા ચ શુક્લદ્વાદશ્યાં પ્રાજાપત્યં હિ જાયતે

જયંતી નામ સા પ્રોક્તા સર્વપાપહરા તિથિઃ ।
સપ્તજન્મકૃતં પાપં સ્વલ્પં વા યદિ વા બહુ

પ્રક્ષાલયતિ ગોવિંદસ્તસ્યામભ્યર્ચિતો ધ્રુવમ્ ।
યદા વૈ શુક્લદ્વાદશ્યાં પુષ્યં ભવતિ કર્હિચિત્

તદા તુ સા મહાપુણ્યા ભવિતા પાપનાશિની ।
યો દદાતિ તિલપ્રસ્થં નિત્યં સંવત્સરં પ્રતિ

ઉપવાસં ચ યસ્તસ્યાં કરોત્યેતત્સમં સ્મૃતમ્ ।
તસ્યાં જગત્પતિર્દેવસ્તુષ્ટઃ સર્વેશ્વરો હરિઃ

પ્રત્યક્ષતાં પ્રયાત્યેવ તત્રાનંતફલં સ્મૃતમ્ ।
સગરેણ કકુત્સ્થેન નહુષેણ ચ સાધિતઃ

તસ્યામારાધિતઃ કૃષ્ણો દત્તવાનખિલં ભુવિ ।
વાચિકાન્માનસાદ્વાપિ કાયજાચ્ચ વિશેષતઃ

સપ્તજન્મકૃતાત્પાપાન્મુચ્યતે નાત્ર સંશયઃ ।
તામેકાં સમુપોષ્યાથ પુણ્યનક્ષત્રસંયુતામ્

એકાદશીસહસ્રસ્ય ફલં પ્રાપ્નોતિ માનવઃ ।
સ્નાનં દાનં જપો હોમઃ સ્વાધ્યાયો દેવતાર્ચનમ્

યત્તસ્યાં ક્રિયતે કિંચિત્તદક્ષયફલં સ્મૃતમ્ ।
તસ્માદેષા પ્રકર્તવ્યા યત્નેન ફલકાંક્ષિભિઃ

પંચમેનાશ્વમેધેન યદિ સ્નાતો યુધિષ્ઠિરઃ ।
પર્યપૃચ્છત ધર્માત્મા કૃષ્ણં યદુકુલોદ્વહમ્

યુધિષ્ઠિર ઉવાચ-
ઉપવાસસ્ય નક્તસ્ય ત્વેકભુક્તસ્ય મે પ્રભો ।
કિં પુણ્યં કિં ફલં તસ્ય બ્રૂહિ સર્વં જનાર્દન

શ્રીભગવાનુવાચ-
હેમંતે ચૈવ સંપ્રાપ્તે માસે માર્ગે ચ શોભને ।
કૃષ્ણપક્ષે ચ યા પાર્થ દ્વાદશી તામુપોષયેત્ ।
દશમ્યાં ચૈકભક્તશ્ચ શુદ્ધચિત્તો દૃઢવ્રતઃ

નક્તં ચૈવ તથા જ્ઞાત્વા દશમ્યાં નિયતઃ સદા ।
દિવસસ્યાષ્ટમે ભાગે મંદીભૂતે દિવાકરે

નક્તં ચ તદ્વિજાનીયાન્ન નક્તં નિશિભોજનમ્ ।
નક્ષત્રદર્શનાન્નક્તં ગૃહસ્થસ્ય વિધીયતે

યતેર્દિનાષ્ટમે ભાગે રાત્રૌ તસ્ય નિષેધનમ્ ।
તતઃ પ્રભાતસમયે કૃત્વા ચ નિયમં વ્રતી

મધ્યાહ્ને ચ તથા પાર્થ સ્નાનં શુચિઃ સમાચરેત્ ।
અધમં કૂપકે સ્નાનં વાપ્યાં સ્નાનં ચ મધ્યમમ્

તડાગે ચોત્તમં સ્નાનં નદ્યાં સ્નાનં તતઃ પરમ્ ।
પીડ્યંતે જંતવો યત્ર જલમધ્યે વ્યવસ્થિતે

તત્ર સ્નાને કૃતે પાર્થ પાપં પુણ્યં સમં ભવેત્ ।
ગૃહે ચૈવોત્તમં સ્નાનં જલં ચૈવ વિશોધયેત્

તસ્માત્તુ પાંડવશ્રેષ્ઠ ગૃહે સ્નાનં સમાચરેત્ ।
અશ્વક્રાંતે રથક્રાંતે વિષ્ણુક્રાંતે વસુંધરે

મૃત્તિકે હર મે પાપં યન્મયા પૂર્વસંચિતમ્ ।
ક્રોધલોભૌ પરિત્યજ્ય ચૈકચિત્તો દૃઢવ્રતઃ

નાલાપેતાંત્યજં ચૈવ તથા પાખંડિનો નરાન્ ।
મિથ્યાવાદરતાંશ્ચૈવ તથા બ્રાહ્મણનિંદકાન્

અન્યાંશ્ચૈવ દુરાચારાનગમ્યાગમનેરતાન્ ।
પરદ્રવ્યાપહારાંશ્ચ પરદારાભિગામિનઃ

કેશવં પૂજયિત્વા તુ નૈવેદ્યં તત્ર કારયેત્ ।
દીપં દદ્યાદ્ગૃહે તત્ર ભક્તિયુક્તેન ચેતસા

તદ્દિને વર્જયેત્પાર્થ નિદ્રાં ચૈવ તુ મૈથુનમ્ ।
ધર્મશાસ્ત્રવિનોદેન દિનં સર્વં નિવારયેત્

રાત્રૌ જાગરણં કૃત્વા ભક્તિયુક્તો નૃપોત્તમ ।
વિપ્રેભ્યો દક્ષિણાં દદ્યાત્પ્રણિપત્ય ક્ષમાપયેત્

યથા કૃષ્ણા તથા શુક્લા વિધિનૈવં પ્રકારયેત્ ।
એકાદશીં દ્વિજઃ પાર્થ વિભેદં નૈવ કારયેત્

એવં હિ કુરુતે યસ્તુ શૃણુ તસ્ય હિ યત્ફલમ્ ।
શંખોદ્ધારે નરઃ સ્નાત્વા દૃષ્ટ્વા દેવં ગદાધરમ્

એકાદશ્યુપવાસસ્ય કલાં નાર્હતિ ષોડશીમ્ ।
સંક્રાંતિષુ ચતુર્લક્ષં યો દદાતિ નૃપોત્તમ

એકાદશ્યુપવાસસ્ય કલાં નાર્હતિ ષોડશીમ્ ।
પ્રભાસક્ષેત્રે યત્પુણ્યં ગ્રહણે ચંદ્ર સૂર્યયોઃ

તત્ફલં જાયતે નૂનમેકાદશ્યુપવાસિનઃ ।
કેદારે ચોદકં પીત્વા પુનર્જન્મ ન વિદ્યતે

તથા ચૈકાદશી પાર્થ ગર્ભવાસક્ષયંકરી ।
અશ્વમેધસ્ય યજ્ઞસ્ય પૃથિવ્યાં યત્ફલં લભેત્

તસ્માચ્છતગુણં પુણ્યમેકાદશ્યુપવાસિનઃ ।
તપસ્વિનો ગૃહે યસ્ય ભુંજતે ચ દ્વિજોત્તમાઃ

તત્ફલં જાયતે નૂનમેકાદશ્યુપવાસિનઃ ।
ગોસહસ્રેણ યત્પુણ્યં દત્વા વેદાંતપારગે

તસ્માચ્છતગુણં પુણ્યમેકાદશ્યુપવાસિનઃ ।
યેષાં દેહે ત્રયો દેવા બ્રહ્મવિષ્ણુમહેશ્વરાઃ

વસંતિ તેષાં તે તુલ્યા એકાદશ્યુપવાસિનઃ ।
તે નરાઃ પુણ્યકર્માણો યે ભક્તા હરિપૂજકાઃ

એકાદશીવ્રતસ્યાપિ પુણ્યસંખ્યા ન વિદ્યતે ।
એતત્પુણ્યં ભવેત્તસ્ય યત્સુરૈરપિ દુર્લ્લભમ્

એતસ્માદર્દ્ધપુણ્યં તુ પ્રાપ્યતે નક્તભોજનાત્ ।
નક્તસ્યાર્દ્ધં ભવેત્પુણ્યમેકભક્તેન દેહિનામ્

તાવદ્ગર્જંતિ તીર્થાનિ દાનાનિ નિયમાનિ ચ ।
યાવન્નોપોષયેજ્જંતુર્વાસરં વિષ્ણુવલ્લભમ્

તસ્માત્ત્વં પાંડવશ્રેષ્ઠ વ્રતમેતત્સમાચર ।
પુણ્યસંખ્યાં ન જાનામિ યત્ત્વં પૃચ્છસિ પાંડવ

એતદ્ધિ કથિતં પાર્થ યદ્ગોપ્યં વ્રતમુત્તમમ્ ।
એકાદશીસમં નાસ્તિ કૃત્વા યજ્ઞસહસ્રકમ્

યુધિષ્ઠિર ઉવાચ-
ઉત્પન્ના સા કથં દેવ પુણ્યા ચૈકાદશી તિથિઃ ।
કથં પવિત્રા વિશ્વેઽસ્મિન્કથં વૈ દેવતાપ્રિયા

શ્રીભગવાનુવાચ -
પુરા કૃતયુગે પાર્થ મુરનામેતિ દાનવઃ ।
અત્યદ્ભુતો મહારૌદ્ર સર્વદેવભયંકરઃ

ઇંદ્રોઽપિ નિર્જિતસ્તેન સર્વદેવાસ્તથા નૃપ ।
મહાસુરેણ તેનૈવ મૃત્યુના ચ દુરાત્મના

સ્વર્ગાન્નિરાકૃતાસ્તેન વિચરંતિ મહીતલે ।
સશંકા ભયભીતાશ્ચ સર્વે ગત્વા મહેશ્વરમ્

ઇંદ્રેણ કથિતં સર્વમીશ્વરસ્યાપિ ચાગ્રતઃ ।
સ્વર્ગલોકપરિભ્રષ્ટા વિચરંતિ મહીતલે

મર્ત્યેષુ સંસ્થિતા દેવા ન શોભંતે મહેશ્વર ।
ઉપાયં બ્રૂહિ મે દેવ હ્યમરા યાંતિ કાં ગતિમ્

મહાદેવ ઉવાચ-
દેવરાજસુરશ્રેષ્ઠયત્રાસ્તેગરુડધ્વજઃ ।
શરણ્યશ્ચ જગન્નાથઃ પરિત્રાતા પરાયણઃ

તત્ર ગચ્છ સુરશ્રેષ્ઠ સ વો રક્ષાં વિધાસ્યતિ ।
ઈશ્વરસ્ય વચઃ શ્રુત્વા દેવરાજો મહામતિઃ

ત્રિદશૈઃ સહિતો યત્ર ગતસ્તત્ર યુધિષ્ઠિર ।
જલમધ્યે પ્રસુપ્તં તં દૃષ્ટ્વા દેવં ગદાધરમ્

કૃતાંજલિપુટો ભૂત્વા ઇંદ્રઃ સ્તોત્રમુદીરયત્

ઇંદ્ર ઉવાચ-
ૐનમો દેવદેવેશ દેવદાનવવંદિત ।
દૈત્યારે પુંડરીકાક્ષ ત્રાહિ નો મધુસૂદન

સુરાઃ સર્વે સમાયાતા ભયભીતાશ્ચ દાનવાત્ ।
શરણં ત્વાં જગન્નાથ ત્રાહિ માં ભક્તવત્સલ

ત્રાહિ નો દેવદેવેશ ત્રાહિ ત્રાહિ જનાર્દન ।
ત્રાહિ વૈ પુંડરીકાક્ષ દાનવાનાં વિનાશક

ત્વત્સમીપં ગતાઃ સર્વે ત્વમેવ શરણં પ્રભો ।
ચશરણાગતાનાં દેવાનાં સહાયં કુરુ વૈ પ્રભો

ત્વં પતિસ્ત્વં મતિર્દેવ ત્વં કર્તા ત્વં ચ કારણમ્ ।
ત્વં માતા સર્વલોકાનાં ત્વમેવ જગતઃ પિતા

ભગવન્દેવદેવેશ શરણાગતવત્સલ ।
શરણં તવ ચાયાતા ભયભીતાશ્ચ દેવતાઃ

દેવતા નિર્જિતાઃ સર્વાઃ સ્વર્ગભ્રષ્ટાઃ કૃતાઃ પ્રભો ।
અત્યુગ્રેણ હિ દૈત્યેન મુરનામ્ના મહૌજસા ।
ઇંદ્રસ્ય વચનં શ્રુત્વા વિષ્ણુર્વચનમબ્રવીત્

શ્રીભગવાનુવાચ-
કીદૃશો દાનવઃ શક્ર કિં રૂપં કીદૃશં બલમ્ ।
ક્વ સ્થાનં તસ્ય દુષ્ટસ્ય કિં વીર્યં કઃ પરાક્રમઃ ।
કિં વરં તસ્ય દુષ્ટસ્ય મમાખ્યાહિ મહામતે

ઇંદ્ર ઉવાચ-
પૂર્વં બભૂવ દેવેશ બ્રહ્મવંશસમુદ્ભવઃ ।
તાલજંઘસ્તુ નામ્ના ચ અત્યુગ્રોઽપિ મહાસુરઃ

તસ્ય પુત્રો હિ વિખ્યાતો મુરનામેતિ દાનવઃ ।
અત્યુત્કટો મહાવીર્યો દેવતાનાં ભયંકરઃ

પુરી ચંદ્રાવતી નામ્ના તત્ર સ્થાને વસત્યસૌ ।
નિર્જિતા દેવતાઃ સર્વા સ્વર્ગાત્તેન વિવાસિતાઃ

ઇંદ્રોઽન્યો રોપિતસ્તેન વાતશ્ચૈવ હુતાશનઃ ।
ચંદ્રસૂર્યો કૃતૌ ચાન્યૌ વાયુર્વરુણ એવ ચ

સર્વમાત્મકૃતં તેન સત્યં સત્યં જનાર્દન ।
દેવલોકઃ કૃતસ્તેન સર્વસ્થાનવિવર્જિતઃ

તસ્ય તદ્વચનં શ્રુત્વા કોપમાનો જનાર્દનઃ ।
હનિષ્યે દાનવં દુષ્ટં દેવતાનાં ભયંકરમ્

ત્રિદશૈઃ સહિતો દેવો ગતશ્ચંદ્રાવતીં પુરીમ્ ।
દૃષ્ટો દેવૈસ્તુ દૈત્યેંદ્રો ગર્જમાનઃ પુનઃ પુનઃ

તેન સર્વે જિતા દેવ ગતાશ્ચૈવ દિશો દશ ।
હરિં નિરીક્ષ્ય પ્રોવાચ તિષ્ઠતિષ્ઠેતિ દાનવઃ

ભગવાનબ્રવીત્તં ચ ક્રોધસંરક્તલોચનઃ ।
શ્રીભગવાનુવાચ-
રે દાનવ દુરાચાર મમ બાહું નિરીક્ષય

તતસ્તે સમ્મુખાઃ સર્વે વિષ્ણુના દુષ્ટદાનવાઃ ।
હતા બાણૈઃ પુનર્દિવ્યૈર્જાતાશ્ચ ભયવિહ્વલાઃ

ચક્રં મુક્તં ચ કૃષ્ણેન દૈત્યસૈન્યેષુ પાંડવ ।
તેનચ્છિન્નાસ્તુ શતશો બહવો નિધનં ગતાઃ

એકોપિ દાનવસ્તત્ર યુધ્યમાનો મુહુર્મુહુઃ ।
નષ્ટાઃ સર્વે સુરાસ્તેન નિર્જિતો મધુસૂદનઃ

નિર્જિતં તેન દૈત્યેન બાહુયુદ્ધમજાયત ।
બાહુયુદ્ધં કૃતં તેન દિવ્યં વર્ષસહસ્રકમ્

વિષ્ણુશ્ચિંતાં પ્રપન્નશ્ચ નષ્ટાઃ સર્વાશ્ચ દેવતાઃ ।
વિષ્ણુશ્ચ નિર્જિતસ્તેન ગતો બદરિકાશ્રમમ્

ગુહા સિંહાવતી નામ તત્ર સુપ્તો જનાર્દનઃ ।
યોજનદ્વાદશવતી એકદ્વારા ચ પાંડવ

તસ્યાં વિષ્ટઃ પ્રસુપ્તશ્ચ દાનવો હંતુમુદ્યતઃ ।
મહાયુદ્ધેન તેનૈવ શ્રાંતોઽસૌ યોગમાયયા

દાનવઃ પૃષ્ઠતો લગ્નો પ્રવિષ્ટઃ સ તદા ગુહામ્ ।
પ્રસુપ્તં તત્ર માં દૃષ્ટ્વા દાનવો હર્ષમાગતઃ

ઇત્થં માં નિર્જિતં મત્વા પ્રવિષ્ટં શંકયા હરિમ્ ।
નિઃસંદેહં હનિષ્યામિ દાનવાનાં ભયંકરમ્

નિર્ગતા કન્યકા તત્ર વિષ્ણુદેહાદ્યુધિષ્ઠિર ।
રૂપવતી સુસૌભાગ્યા દિવ્યપ્રહરણાયુધા

તસ્ય તેજોંઽશસંભૂતા મહાબલપરાક્રમા ।
દૃષ્ટા સા દાનવેંદ્રેણ મુરનામ્ના ધનંજય

યુદ્ધં સમાહિતં તેન સ્ત્રિયા ચૈવ પ્રયાચિતમ્ ।
કન્યકા યુધ્યતે તત્ર સર્વયુદ્ધવિશારદા

હુંકારૈર્ભસ્મસાજ્જાતો મુર નામા મહાસુરઃ ।
નિહતે દાનવે તસ્મિંસ્તત્ર દેવસ્ત્વબુધ્યત

પતિતં દાનવં દૃષ્ટ્વા તતો વિસ્મયમાગતઃ ।
કેનાયં ચ હતો રૌદ્રો હ્યત્યુગ્રો મમ શાત્રવઃ

અત્યુગ્રં ચ કૃતં કર્મ મમ કારુણ્યતઃ કૃતમ્ ।
કન્યોવાચ-
તેન દેવાશ્ચ ગંધર્વા સયક્ષોરગરાક્ષસાઃ

ઇંદ્રાદ્યાઃ સકલા જિત્વા સ્વર્ગાચ્ચૈવ નિરાકૃતાઃ ।
હરિઃ સુપ્તો મયા દૃષ્ટો મુરઃ પૃષ્ઠે સમાગતઃ

સંહરિષ્યતિ ત્રૈલોક્યં સુપ્તે ચૈવ જર્નાદને ।
તસ્યાસ્તદ્વચનં શ્રુત્વા વિષ્ણુર્વચનમબ્રવીત્

અહં ચ નિર્જિતો યેન કથં સોઽપિ ત્વયા જિતઃ ।
એકાદશ્યુવાચ-
ત્વત્પ્રસાદાચ્ચ ભો સ્વામિન્મહાદૈત્યો મયા હતઃ

શ્રીભગવાનુવાચ-
આનંદં ત્રિષુ લોકેષુ મુનયો દેવતા ગતાઃ ।
બ્રૂહિ ત્વં ચ મયા ભદ્રે યત્તે મનસિ રોચતે ।
દદામિ ચ ન સંદેહો યત્સુરૈરપિ દુર્લ્લભમ્

એકાદશ્યુવાચ-
યદિ તુષ્ટોઽસિ મે દેવ સત્યમુક્તં જનાર્દન ।
વરમેકં તુ વાંચ્છામિ હૃદયે ચ જગત્પતે

પ્રાર્થયામિ ચ દેવેશ ઈપ્સિતં ચ મયા પ્રભો ।
યદિ સત્યં જગન્નાથ તિસ્રો વાચો દદાસિ મે

શ્રીભગવાનુવાચ-
સત્યં સત્યં મયા પ્રોક્તં અવશ્યં તવ સુવ્રતે ।
તિસ્રો વાચો મયા દત્તા ન ચાવાક્યં ભવેદિહ

એકાદશ્યુવાચ-
ત્રિભુવનેષુ ચ દેવેશ ચતુર્યુગેષુ સાંપ્રતમ્ ।
ત્રિષુ લોકેષુ સર્વત્ર તાદૃશં કુરુ મે પ્રભો

સર્વતીર્થપ્રધાનં હિ સર્વવિઘ્નવિનાશિની ।
સર્વસિદ્ધિકરી દેવી ત્વત્પ્રસાદાદ્ભવામ્યહમ્

મામુપોષ્યંતિ યે ભક્ત્યા તવ ભક્ત્યા જનાર્દન ।
સર્વસિદ્ધિર્ભવેત્તેષાં યદિ તુષ્ટોઽસિ મે પ્રભો

ઉપવાસં ચ નક્તં ચ એકભક્તં કરોતિ ચ ।
તસ્ય વિત્તં ચ ધર્મં ચ મોક્ષં વૈ દેહિ માધવ

વિષ્ણુરુવાચ-।
યત્ત્વં વદસિ કલ્યાણિ તત્સર્વં ચ ભવિષ્યતિ ।
સર્વાન્મનોરથાન્ભદ્રે દાસ્યસિ ત્વં ચ નાન્યથા

મમ ભક્તાશ્ચ યે લોકે યે ચ ભક્તાસ્તુ કાર્ત્તિકે ।
ચતુર્યુગેષુ વિખ્યાતાસ્ત્રિષુ લોકેષુ વૈ પ્રભો

ત્વાં ચ શક્તિમહં મન્યે એકાદશીવ્રતસ્થિતાઃ ।
મમ પૂજાં કરિષ્યંતિ મોક્ષગાસ્તે ન સંશયઃ

તૃતીયા ચાષ્ટમી ચૈવ નવમી ચ ચતુર્દશી ।
એકાદશી વિશેષેણ તિથિરેષા હરિપ્રિયા ।
સર્વતીર્થાધિકં પુણ્યં સત્યં સત્યં ન સંશયઃ

ઇદં દત્ત્વા વરં તસ્યૈ તિસ્રો વાચો ન સંશયઃ ।
હૃષ્ટા પુષ્ટા ચ સંજાતા એકાદશીમહાવ્રતા

શત્રું હંસિ પરાં તસ્ય દદાસિ પરમાં ગતિમ્ ।
ત્વં હંસિ સર્વવિઘ્નાનિ સર્વસિદ્ધિવરપ્રદા

ઉભયોઃ પક્ષયોઃ પાર્થ તુલ્યા એકાદશી શુભા ।
ન શુક્લા નૈવ કૃષ્ણા ચ વિભેદં નૈવ કારયેત્

વિભેદો નૈવ કર્ત્તવ્યઃ સમસ્તવ્રતકારિભિઃ ।
દિવા વા યદિ વા રાત્રૌ શૃણોતિ ભક્તિતત્પરઃ

તિથિરેકા ભવેત્સર્વા પક્ષયોરુભયોરપિ ।
ઉભયૈકાદશી સ્વલ્પા હ્યંતે ચૈવ ત્રયોદશી

મધ્યે તુ દ્વાદશી પૂર્ણા ત્રિસ્પૃશા સા હરિપ્રિયા ।
એકામુપોષયેત્તાં વૈ સહસ્રૈકાદશીફલમ્

સહસ્રગુણિતં હ્યેવં દ્વાદશ્યાં પારણે કૃતે ।
અષ્ટમ્યેકાદશી ષષ્ઠી તૃતીયા ચ ચતુર્દશી

પૂર્વવિદ્ધા ન કર્તવ્યા પરવિદ્ધામુપોષયેત્ ।
એકાદશી હ્યહોરાત્રં પ્રભાતે ઘટિકા ભવેત્

સા તિથિઃ પરિહર્તવ્યા ઉપોષ્યા દ્વાદશીયુતા ।
એવંવિધા મયા પ્રોક્તા પક્ષયોરુભયોરપિ

એકાદશ્યાં પ્રકુર્વીત હ્યુપવાસં ન સંશયઃ ।
તે યાંતિ વૈષ્ણવં સ્થાનં યત્રાસ્તે ગરુડધ્વજઃ

ધન્યાસ્તે માનવા લોકે વિષ્ણુભક્તિપરાયણાઃ ।
એકાદશ્યાશ્ચ માહાત્મ્યં સર્વકાલેષુ યઃ પઠેત્

ગોસહસ્રફલં સોઽપિ પુણ્યં પ્રાપ્નોતિ માનવઃ ।
દિવા વા યદિ વા રાત્રૌ યે વૈ શૃણ્વંતિ ભક્તિતઃ

બ્રહ્મહત્યાદિપાપેભ્યો મુચ્યંતે નાત્ર સંશયઃ ।
વિષ્ણુધર્મસમં નાસ્તિ ગીતાર્થં ચ નૃપોત્તમ ।
એકાદશીસમં નાસ્તિ વ્રતં પાપપ્રણાશનમ્

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખંડે ઉમામહેશ્વરસંવાદે એકાદશ્યુત્પત્તિ મુરવધોનામાષ્ટત્રિંશોઽધ્યાયઃ