પદ્મ પુરાણ · અધ્યાય 6.30

નારદ ઉવાચ-
બ્રહ્મન્સંવત્સરાખ્યસ્ય દીપસ્ય વિધિમુત્તમમ્ ।
સર્વવ્રતપ્રધાનસ્ય માહાત્મ્યં પ્રવદસ્વ મે

યેન વ્રતાનિ સર્વાણિ કૃતાન્યેવ ન સંશયઃ ।
સર્વકામસમૃદ્ધિશ્ચ સર્વપાપક્ષયો ભવેત્

મહાદેવ ઉવાચ -
વદામિ તવ દેવર્ષે રહસ્યં પાપનાશનમ્ ।
યચ્છ્રુત્વા બ્રહ્મહા ગોઘ્નો મિત્રઘ્નો ગુરુતલ્પગઃ

વિશ્વાસઘાતી ક્રૂરાત્મા મુક્તિમાપ્નોતિ શાશ્વતીમ્ ।
શતં કુલાનામુદ્ધૃત્ય વિષ્ણોર્લોકં સ ગચ્છતિ

તદહં કથયિષ્યામિ દીપવ્રતમનુત્તમમ્ ।
સંવત્સરપ્રમાણસ્ય વિધિં માહાત્મ્યમેવ ચ

હેમંતે પ્રથમે માસિ પ્રાપ્ય હ્યેકાદશીં શુભામ્ ।
બ્રાહ્મે મુહૂર્ત્તે ચોત્થાય કામક્રોધવિવર્જિતઃ

નદીસંગમતીર્થેષુ તડાગેષુ સરિત્સુ ચ ।
સ્નાનં સમાચરેત્તત્ર ગૃહે વા નિયતાત્મવાન્

સ્નાતોઽહં સર્વતીર્થે તત્સ્નાનં દેહિ મે સદા

સ્નાનમંત્રઃ ।
દેવાન્પિતૄંશ્ચ સંતર્પ્ય કૃતજપ્યો જિતેંદ્રિયઃ ।
તતઃ સંપૂજયેદ્દેવં લક્ષ્મીનારાયણં પ્રભુમ્ ।
પંચામૃતેન સંસ્નાપ્ય તતો ગંધોદકેન ચ

સ્નાતોઽસિ લક્ષ્મ્યા સહિતો દેવદેવ જગત્પતે ।
માં સમુદ્ધર દેવેશ ઘોરાત્સંસારબંધનાત્

તતઃ સંપૂજયેદ્દેવં લક્ષ્મ્યા સહ જનાર્દનમ્ ।
મંત્રૈસ્તુ વૈદિકૈર્ભક્ત્યા તથા પૌરાણિકૈરપિ

અતો દેવેતિ ગંધાદિ પૌરુષેણાપિ વા પુનઃ ।
નમો મત્સ્યાય દેવાય કૂર્મદેવાય વૈ નમઃ

નમો વારાહદેવાય નરસિંહાય વૈ નમઃ ।
નમોઽસ્તુ બુદ્ધદેવાય કલ્કિને ચ નમોનમઃ

નમોઽસ્તુ રામદેવાય વિષ્ણુદેવાય તે નમઃ ।
નમઃ સર્વાત્મને તુભ્યં શિ રૈત્યભિપૂજયેત્ ।
કેશવાદીનિ નામાનિ તૈર્વા સંપૂજયેદ્ધરિમ્

વનસ્પતિરસો દિવ્યઃ સુરભિર્ગંધવાઞ્છુચિઃ ।
ધૂપોઽયં દેવદેવેશ નમસ્તે પ્રતિગૃહ્યતામ્ ૧૫ ।ધૂપમંત્રઃ ।
દીપસ્તમો નાશયતિ દીપઃ કાંતિં પ્રયચ્છતિ ।
તસ્માદ્દીપપ્રદાનેન પ્રીયતાં મે જનાર્દનઃ ૧૬। દીપમંત્રઃ ।
નૈવેદ્યમિદમન્નાદ્યં દેવદેવ જગત્પતે ।
લક્ષ્મ્યા સહ ગૃહાણ ત્વં પરમામૃતમુત્તમમ્ ૧૭। નૈવેદ્યમંત્રઃ ।
અર્ઘ્યં દદ્યાત્તતો ભક્ત્યા એવં ધ્યાત્વા જનાર્દનમ્ ।
ફલેન ચૈવ હસ્તેન શંખેનાદાય ચોદકમ્

જન્માંતરસહસ્રેણ યન્મયા પાતકં કૃતમ્ ।
તત્સર્વં નાશમાયાતુ પ્રસાદાત્તવ કેશવ ૧૯। ઇતિ અર્ઘમંત્રઃ ।
તતઃ કુંભં નવં શુભ્રં ઘૃતપૂર્ણં સમાનયેત્ ।
લક્ષ્મીનારાયણસ્યાગ્રે તૈલપૂર્ણમથાપિ વા

તસ્યોપરિ ન્યસેત્પાત્રં તામ્રં મૃન્મયમેવ ચ ।
નવતંતુસમાં વર્તિં તસ્મિન્પાત્રે તુ નિર્વપેત્

તતઃ પ્રબોધયેદ્દીપં સ્થાપ્ય કુંભં સુનિશ્ચલમ્ ।
પુષ્પગંધાદિભિઃ પૂજ્ય તતઃ સંકલ્પયેચ્છુચિઃ

મંત્રેણાનેન દેવર્ષે અસમીરેષુ ધામસુ ।
કામો ભૂતસ્ય ભવ્યસ્ય સમ્રાડેકો વિરાજતે

દીપઃ સંવત્સરં યાવત્મયાયં પરિકલ્પિતઃ ।
અગ્નિહોત્રમવિચ્છિન્નં પ્રીયતાં મમ કેશવ

તતો જિતેંદ્રિયો ભૂત્વા શ્રુતિજ્ઞાનપરાયણઃ ।
નાલપેત્પતિતાન્પાપાંસ્તથા પાખણ્ડિનો નરાન્

રાત્રૌ જાગરણં ગીતં નૃત્યવાદ્યાદિકૈસ્તથા ।
પુણ્યપાઠૈશ્ચ વિવિધૈર્ધર્માખ્યાનૈરુપોષણૈઃ

તતઃ પ્રભાતસમયે કૃતપૂર્વાહ્ણિક ક્રિયઃ ।
બ્રાહ્મણાન્ભોજયેદ્ભક્ત્યા યથાશક્ત્યા પ્રપૂજયેત્

સ્વયં ચ પારણં કૃત્વા પ્રણિપત્ય વિસર્જયેત્ ।
એવં સંવત્સરં યાવદહોરાત્રં દૃઢવ્રતઃ

દીપં પલસુવર્ણેન તદર્દ્ધાર્દ્ધેન વા પુનઃ ।
વર્તિસ્તુ રાજતી પ્રોક્તા દ્વિપલાર્દ્ધાર્દ્ધિકાપિ વા

ઘૃતપૂર્ણં તથા કુંભં તામ્રપાત્રસમન્વિતમ્ ।
લક્ષ્મીનારાયણો દેવો યથાશક્ત્યા હિરણ્મયઃ

કાર્યો ભક્તિમતા પુંસા મુક્તિદ્વારમભીપ્સતા ।
તતો નિમંત્રયેદ્વિદ્વાન્બ્રહ્મણાન્સાધુસત્તમાન્

દ્વાદશોત્તમપક્ષે તુ વિપ્રાન્ષણ્મધ્યમે તથા ।
અન્યથા કારયેત્ત્રીન્વા એકં કર્મકરં દ્વિજમ્

સપત્નીકં દ્વિજં શાંતં ક્રિયાવંતં વિશેષતઃ ।
ઇતિહાસપુરાણજ્ઞં ધર્મજ્ઞં મૃદુમેવ ચ

પિતૃભક્તં ગુરુપરં દેવબ્રાહ્મણપૂજકમ્ ।
પાદાર્ઘદાનવિધિના વસ્ત્રાલંકારભૂષણૈઃ

સંપૂજ્ય પત્ન્યા સહિતમેકં ભક્ત્યા ચ પૂર્વવત્ ।
લક્ષ્મીનારાયણં દેવં દીપવર્તિયુતં તથા

તામ્રપાત્રોપરિસ્થાપ્ય ઘૃતકુંભેન સંયુતમ્ ।
બ્રાહ્મણાય તતો દદ્યાદ્ધ્યાત્વા નારાયણં પરમ્ ।
મંત્રેણાનેન દેવર્ષે તમહં કથયામિ તે

અવિદ્યા તમસા વ્યાપ્તે સંસારે પાપનાશનઃ ।
જ્ઞાનપ્રદો મોક્ષદશ્ચ તસ્માદ્દત્તો મયાનઘ

ઇતિ દીપમંત્રઃ ।
દક્ષિણાં ચ યથાશક્ત્યા દત્ત્વા વિપ્રાય ભક્તિતઃ ।
ભોજયેદ્બ્રાહ્મણાન્પશ્ચાદ્ઘૃતપાયસમોદકૈઃ

વસ્ત્રૈરાચ્છાદયેત્પશ્ચાત્સપત્નીકં તથા દ્વિજમ્ ।
શય્યાં સોપસ્કરાં દદ્યાદ્ધેનું ચૈવ સવત્સકામ્

તેભ્યસ્તુ દક્ષિણાં દદ્યાદ્યથાવિત્તાનુસારતઃ ।
સુહૃત્સ્વજનબંધૂશ્ચ ભોજયેત્પૂજયેત્તથા

એવં મહોત્સવં કુર્યાદ્દીપવ્રત સમાપને ।
તતો વિસર્જયેત્પશ્ચાત્પ્રણિપત્ય ક્ષમાપયેત્

એવં કૃતે તુ યત્પુણ્યં તથા સાંક્રાંતિકૈશ્ચ યત્ ।
સંવત્સરાખ્ય દીપસ્ય તત્ફલં પ્રાપ્યતે નરૈઃ

માસવ્રતૈશ્ચ યત્પુણ્યં તત્પુણ્યં પ્રાપ્યતે નરૈઃ ।
સંવત્સરસ્ય દીપસ્ય વ્રતેન ચરિતેન ચ

દાનવ્રતૈર્યથાસંખ્યૈર્યશ્ચ યોગવ્રતૈસ્તથા ।
તત્ફલં સમવાપ્નોતિ દીપે સાંવત્સરે કૃતે

ગોભૂહિરણ્યદાનાનિ ગૃહાદીનાં વિશેષતઃ ।
યત્ફલં લભતે વિદ્વાન્તત્ફલં દીપદો ભવેત્

દીપદઃ કાંતિમાપ્નોતિ દીપદો ધનમક્ષયમ્ ।
દીપદો જ્ઞાનમાપ્નોતિ દીપદઃ પરમં સુખમ્

દીપદાનાચ્ચ સૌભાગ્યં વિદ્યામત્યંતનિર્મલામ્ ।
આરોગ્યં પરમામૃદ્ધિં લભતે નાત્ર સંશયઃ

દીપદઃ સુભગાં ભાર્યાં સર્વલક્ષણસંયુતામ્ ।
પુત્રાન્પૌત્રાન્પ્રપૌત્રાંશ્ચ સંતતિં ચાક્ષયા લભેત્

બ્રાહ્મણઃ પરમં જ્ઞાનં ક્ષત્રિયો રાજ્યમુત્તમમ્ ।
વૈશ્યો ધનપશૂન્સર્વાઞ્છૂદ્રઃ સુખમવાપ્નુયાત્

કુમારી ચાપિ ભર્તારં સર્વલક્ષણસંયુતમ્ ।
પ્રાપ્નોતિ પરમાયુશ્ચ પુત્રાન્પૌત્રાંશ્ચ પુષ્કલાન્

વૈધવ્યં નૈવ યુવતી કદાચિદપિ પશ્યતિ ।
ન વિયોગમવાપ્નોતિ દીપદાનપ્રભાવતઃ

નાધયો વ્યાધયશ્ચૈવ જાયંતે દીપદાનતઃ ।
ભયાત્પ્રમુચ્યતે ભીતો બદ્ધો મુચ્યેત બંધનાત્

બ્રહ્મહત્યાદિભિઃ પાપૈર્દીપવ્રતપરાયણઃ ।
મુચ્યતે નાત્ર સંદેહો બ્રહ્મણો વચનં યથા

ચાંદ્રાયણાનિ કૃચ્છ્રાણિ ચરિતાનિ ન સંશયઃ ।
યેન સાંવત્સરો દીપો બોધિતઃ શાશ્વતો હરેઃ

તે ધન્યાસ્તે મહાત્માનસ્તૈઃ પ્રાપ્તં જન્મનઃ ફલમ્ ।
યૈઃ સંપૂજ્ય હરિં ભક્ત્યા દીપઃસાંવત્સરઃ કૃતઃ

યેઽપિ સંવર્ત્તયંતીહ દીપવર્તિવિલોકનાઃ ।
તે યાંતિ પરમં સ્થાનં યત્સુરૈરપિ દુર્લભમ્

યેન તૈલં ચ વર્તિં ચ યથાશક્ત્યા પ્રદીપકે ।
પ્રક્ષેપયંતિ સતતં તે યાંતિ પરમાં ગતિમ્

ગચ્છંતં દીપકં શાંતિં ન શક્નોતિ પ્રબોધિતુમ્ ।
કથયત્યન્યલોકાનાં તેઽપિ તત્ફલભાગિનઃ

સ્તોકં સ્તોકં ચ ભિક્ષિત્વા તૈલં દીપાર્થમેવ ચ ।
કરોતિ દીપકં વિષ્ણોઃ પુણ્યં તેનાપિ લભ્યતે

દીપં પ્રજ્વાલ્યમાનં તુ યઃ પશ્યત્યધમો નરઃ ।
કૃતાંજલિપુટો વિષ્ણોર્વિષ્ણુલોકમવાપ્નુયાત્

દીપપ્રજ્વાલને બુદ્ધિં યો દદ્યાત્કુરુતે સ્વયમ્ ।
સર્વપાપવિનિર્મુક્તો વિષ્ણુલોકમવાપ્નુયાત્

અત્રાપ્યુદાહરંતીમમિતિહાસં પુરાતનમ્ ।
યસ્ય શ્રવણમાત્રેણ મુચ્યતે સર્વકિલ્બિષૈઃ

સરસ્વત્યાસ્તટે રમ્યે સિદ્ધાશ્રમ ઇતિ શ્રુતઃ ।
તત્રોવાસ દ્વિજઃ પૂર્વં કપિલો નામ વેદવિત્

વ્રતોપવાસનિરતો દરિદ્ર શ્રોઃત્રિયસ્તથા ।
ભિક્ષાવૃત્ત્યા ચ કુરુતે કુટુંબ પરિપાલનમ્

વ્રતોપવાસનિયમૈર્વિષ્ણુમારાધયત્યસૌ ।
વિષ્ણું સંપૂજ્ય વિધિવદ્દીપં બોધયતે સદા

સમાદાય ચ તત્તૈલં સ્વગૃહે પૂજ્ય કેશવમ્ ।
દીપં ભક્ત્યા ચ પરયા બોધયેદ્ધરિતુષ્ટયે

એવં પ્રવર્ત્તમાનસ્ય કપિલસ્ય મહાત્મનઃ ।
માર્જારસ્તીક્ષ્ણંદંષ્ટ્રસ્તુ મૂષકાન્ભક્ષયેત્સદા

તત્રાગચ્છતિ ભક્ષ્યાર્થં મૂષકાનામહર્નિશમ્ ।
કૃત્વા ધ્યાનં સ ભક્ષ્યાર્થં નિત્યં નારાયણાગ્રતઃ

ભક્ષિતા બહવસ્તેન મૂષકા દ્વિજવેશ્મનિ ।
યે યે તૈલાર્થમાયાંતિ વર્ત્યપાહરણાય ચ

તાંસ્તાંસ્તુ ભક્ષયત્યેવ મૂષકાન્ધ્યાનતત્પરઃ ।
એવં પ્રવર્તમાનસ્ય કદાચિત્કાલપર્યયાત્

એકાદશ્યાં સ કપિલો બ્રાહ્મણઃ સ્વગૃહે શુચિઃ ।
સોપવાસઃ સપત્નીકઃ પૂજયામાસ ચાચ્યુતમ્

તતો જાગરણં ચક્રે સ્તુતિનૃત્યપરાયણઃ ।
અર્દ્ધરાત્રે તુ સંપ્રાપ્તે નિદ્રયા મોહિતો દ્વિજઃ

માર્જારશ્ચાગતસ્તત્ર તીક્ષ્ણદંષ્ટ્રો લઘુક્રમઃ ।
લક્ષયામાસ નૈવેદ્યં ગૃહકોણે સ્થિતઃ સદા

અદ્રાક્ષીન્મૂષિકાં ક્ષુદ્રા તૈલપાનાર્થમાગતામ્ ।
મંદતેજસિ દીપે તુ વર્ત્યપાહરણોચિતામ્

સમુત્પત્ય પદાક્રમ્ય તદા સા બિલમાવિશત્ ।
તસ્યાઃ પાદેન વૈ વર્ત્યા દીપઃ સંબોધિતો ભૃશમ્

તૈલપાત્રં ચ નમિતં સુપ્રકાશોઽભવત્તદા ।
બ્રાહ્મણોઽપિ જજાગાર ત્યક્ત્વા નિદ્રાં વિમોહિનીમ્

માર્જારોઽપિ ચ તાં રાત્રીમજાગ્રચ્ચાખુભક્ષકઃ ।
તતઃ પ્રભાતે વિમલે કૃત્વા નિત્યક્રિયાં દ્વિજઃ

તતશ્ચ પારણં ચક્રે વિપ્રો બંધુજનૈઃ સહ ।
એવં પ્રવર્ત્તમાનસ્ય કપિલસ્ય મહાત્મનઃ

બભૂવુઃ પુત્રપૌત્રાશ્ચ ધનધાન્યમનુત્તમમ્ ।
આરોગ્યં પરમામૃદ્ધિમવાપ મહતીં શ્રિયમ્

દીપવ્રતપ્રભાવેન કપિલો મોક્ષમાગતઃ ।
સંભેદ્ય મંડલં પુણ્યં સવિતુઃ શશિનસ્તથા

દીપજ્યોતિઃસ્વરૂપેણ પરમાત્મા નિયુક્તવાન્ ।
મૂષિકાપિ ચ કાલેન મમાર બિલમધ્યતઃ

વિમાનવરમાસાદ્ય વિષ્ણુલોકં જગામ સા ।
માર્જારોઽપિ ચ કાલાંતે મૃતઃ સ્વર્ગં જગામ સઃ

વિમાનવરમારુહ્ય દેવગંધર્વસેવિતમ્ ।
અપ્સરોભિઃ પરિવૃતો વિદ્યાધરગણૈર્યુતઃ

સ્તૂયમાનો મહાતેજા જયશબ્દાદિ મંગલૈઃ ।
સ્તૂયમાનઃ સ વૈ નાગૈર્વિષ્ણુલોકં જગામ સઃ

કલ્પકોટિસહસ્રાણિ કલ્પકોટિશતાનિ ચ ।
ભુક્ત્વા ચ વિપુલાન્ભોગાન્તતો રાજાભવદ્ભુવિ

સુધર્મા નામ ધર્માત્મા દેવબ્રાહ્મણપૂજકઃ ।
રૂપવાન્સુભગશ્ચૈવ મહાબલપરાક્રમઃ

તસ્ય પ્રિયતમા ભાર્યા સર્વલક્ષણસંયુતા ।
ભર્તૃભક્તા તથા શીલા નામ્ના સા રૂપસુંદરી

સર્વાસાં ચૈવ નારીણાં મધ્યે સા સુભગાભવત્ ।
પુત્રાશ્ચ બહવો જાતાસ્તથા દુહિતરો ઘનાઃ

એવં વિહરતોસ્તદ્વદ્દંપત્યોઃ પ્રીતિપૂર્વકમ્ ।
આગતઃ કાર્ત્તિકો માસો હરિનેત્રાવબોધકૃત્

તસ્મિન્દીપાઃ પ્રબોધ્યંતે નારાયણપરાયણૈઃ ।
કૃચ્છ્રચાંદ્રાયણાદીનિ વ્રતાનિ નિયમાસ્તથા

ક્રિયંતે વિષ્ણુભક્તૈશ્ચ સંસારભયભીરુભિઃ ।
અથ પ્રબોધિનીં પ્રાપ્ય રાજા રાજ્ઞીમથાબ્રવીત્

ભદ્રે પ્રબોધિની પુણ્યા વિષ્ણોર્નાભિસરોરુહે ।
કરિષ્યામ્યદ્ય પૂજાં ચ સોપવાસો જિતેંદ્રિયઃ

સ્નાત્વા ચ પુષ્કરે તીર્થે પુંડરીકાક્ષમચ્યુતમ્ ।
પૂજયિષ્યામિ દેવેશં લક્ષ્મ્યા સહ જનાર્દનમ્

ઇતિ સા વાંછિતં શ્રુત્વા ભર્તુઃ પ્રિયહિતે રતા ।
ઉવાચ વચનં ગુહ્યં ભર્ત્તારં ચારુહાસિની

રૂપસુંદર્યુવાચ-
મમાપિ હૃદયે કામઃ સમુત્પન્નો નરાધિપ ।
રૂપસૌંદર્યવાંછા ચ હૃદયે મમ વર્ત્તતે

પુષ્કરં પ્રથમં તીર્થં ગંતુમિચ્છે ત્વયા સહ ।
તતો રાજા તયા સાર્દ્ધમાગતઃ પુષ્કરં તદા

હસ્ત્યશ્વરથવૃંદૈશ્ચ સમાગત્ય પુરોહિતૈઃ ।
તતઃ સ્નાત્વા તથા ધ્યાયન્તર્પયન્પિતૃદેવતાઃ

પૂજયામાસ દેવેશં પુંડરીકાક્ષમચ્યુતમ્ ।
દીપમાલાકુલે તત્ર સર્વતઃ સુમનોહરે

દદર્શ લિખિતં તત્ર માર્જારં દેવતાલયે ।
તં દૃષ્ટ્વા પ્રાકૃતં કર્મ જન્મ સ્મૃત્વા નૃપસ્તદા

મુખપંકજમાલોક્ય પ્રિયાયાઃ પ્રજહાસ ચ ।
રૂપસુંદર્યુવાચ-
મમ સન્મુખમાલોક્ય ભર્તઃ કિં સ્મિતકારણમ્

કથયામાસ હૃષ્ટાત્મા પ્રાક્તનં કર્મણઃ ફલમ્ ।
રાજોવાચ-
અહમાસં પુરા દેવિ માર્જારો બ્રાહ્મણાલયે

ભક્ષિતા મૂષકાસ્તત્ર મયા શતસહસ્રશઃ ।
તતો નારાયણસ્યાગ્રે દીપઃ સંરક્ષિતો યતઃ

વ્યાજેનાપિ મયા દેવિપ્રાપ્તં તત્કર્મણઃ ફલમ્ ।
વિષ્ણુલોકમનુપ્રાપ્ય રાજ્યં પ્રાપ્તં મયાધુના

રૂપસુંદર્યુવાચ-।
મમાપિ સ્મરણં જાતં પ્રાકૃતસ્ય ચ જન્મનઃ ।
મૂષિકા ચાહમપ્યાસં ક્ષુદ્રા બ્રાહ્મણવેશ્મનિ

કાર્તિકે ચ પ્રબોધિન્યાં મંદીભૂતે ચ દીપકે ।
વર્ત્યગ્રાહરણાર્થાય નિર્ગતાહં તદા બિલાત્

દૃષ્ટ્વા નારાયણં દેવં પૂજિતં કુસુમૈસ્તથા ।
નિદ્રાભિભૂતં વિપ્રં ચ વર્ત્તિઃ કૃષ્ટા મયા તદા

ઉત્થિતસ્ત્વં યદા તત્ર માં ગૃહીતું કૃતક્ષણઃ ।
દૃષ્ટ્વા ત્વં ચ પ્રણષ્ટાહં પ્રવિષ્ટા બિલમધ્યતઃ

વિશંત્યા મમ પાદેન દીપવર્ત્તિર્વિજૃંભિતા ।
તૈલપાત્રં ચ નમિતં તેનાહં સુખભાગિની

તન્મયા રાજરાજેંદ્ર દીપં ચૈવ પ્રકાશિતમ્ ।
ઇદાનીં ચ મયા પ્રાપ્તં રૂપલાવણ્યમુત્તમમ્

ત્વં ચ ભર્ત્તા તથા રાજ્યં પુત્રાશ્ચૈવંવિધં સુખમ્ ।
દીપપ્રબોધનાજ્જાતં જ્ઞાનમત્યંત દુર્લ્લભમ્

તસ્માત્સર્વપ્રયત્નેન દીપવ્રતમનુત્તમમ્ ।
આવાં હિ પરયા ભક્ત્યા કુર્વશ્ચૈવ વિશેષતઃ

તદેતત્કર્મણઃ પ્રાપ્તં ફલં રાજ્યાદિસંપદઃ ।
પૂર્વજન્મસ્મૃતં ચાપિ સર્વપાપક્ષયસ્તથા

તસ્માત્સર્વપ્રયત્નેન વિધિમંત્રાદિપૂર્વકમ્ ।
દીપવ્રતં કૃતં પુંભિઃ પુણ્યં ચંદ્રાર્કતારકમ્

ઇતિ શ્રુત્વા વચો રાજા ચક્રે દીપવ્રતં તદા ।
પ્રિયયા સહ દેવર્ષે સમ્યક્શ્રદ્ધાસમન્વિતઃ

તસ્મિંસ્તુ પુષ્કરે તીર્થે કૃત્વા દીપવ્રતં તુ તૌ ।
અવાપતુઃ પરાં મુક્તિં દેવદાનવદુર્લ્લભામ્

એતદ્દીપસ્ય માહાત્મ્યં યે શૃણ્વંતિ નરા ભુવિ ।
સર્વપાપવિનિર્મુક્તાઃ પ્રયાંતિ હરિમંદિરમ્

યે ચ કુર્વંતિ પુરુષાઃ સ્ત્રિયો વા ભક્તિતત્પરાઃ ।
તે સર્વે પાપનિર્મુક્તા યાંતિ બ્રહ્મસનાતનમ્

દીપવ્રતમિદં વિદ્વન્કથિતં તે વિમુક્તિદમ્ ।
સર્વસૌખ્યપ્રદં ધન્યં મહાવ્રતમિદં તવ

નેત્રરોગા વિનશ્યંતિ યથા પાપપ્રભાવજાઃ ।
આધયો વ્યાધયઃ સર્વે નશ્યંતે હિ કૃતેક્ષણાત્

ન દારિદ્ર્યં ન શોકં ચ ન મોહો ન ચ વિભ્રમઃ ।
ગૃહે લક્ષ્મીઃ સમાયાતિ જન્મજન્મનિ વાડવ

ઇતિ શ્રીપાદ્મેમહાપુરાણે પંચપંચાશત્સહસ્રસંહિતાયાં ઉત્તરખણ્ડે ઉમાપતિનારદસંવાદે દીપવ્રતમાહાત્મ્યંનામ ત્રિંશોઽધ્યાયઃ