પદ્મ પુરાણ · અધ્યાય 6.2

મહેશ ઉવાચ-
એકલક્ષં પંચવિંશત્સહસ્રા પર્વતાસ્તથા ।
તેષાં મધ્યે મહત્પુણ્યં બદ્રિકાશ્રમમુત્તમમ્

નરનારાયણો દેવો યત્ર તિષ્ઠતિ નારદ ।
તસ્ય સ્વરૂપં તેજશ્ચ વક્ષ્યામીહ ચ સાંપ્રતમ્

હિમપર્વતશૃંગે ચ કૃષ્ણાકારતયા દ્વિજ ।
દ્વૌ પુરુષૌ તત્ર વર્તેતે નરનારાયણાવુભૌ

શ્વેત એકસ્તુ પુરુષઃ કૃષ્ણો હ્યેકતમઃ પુનઃ ।
તેન માર્ગેણ યે યાંતિ હિમાચલકૃતોદ્યમાઃ

પિંગલશ્વેતવર્ણશ્ચ જટાધારી મહાપ્રભુઃ ।
કૃષ્ણો નારાયણો હ્યેષ જગદાદિર્મહાપ્રભુઃ

ચતુર્બાહુર્મહાન્શ્રીમાન્વ્યક્તોઽવ્યક્તઃ સનાતનઃ ।
ઉત્તરાયણે મહાપૂજા જાયતે તત્ર સુવ્રત

ષણ્માસાદિકપર્યંતં પૂજા નૈવ ચ જાયતે ।
હિમવ્યાપ્તં તદા જાતં યાવદ્વૈ દક્ષિણં ભવેત્

અત એતાદૃશો દેવો ન ભૂતો ન ભવિષ્યતિ ।
તત્ર દેવા વસંતીહ ઋષીણાં ચાશ્રમાસ્તથા

અગ્નિહોત્રાણિ વેદાશ્ચ ધ્વનિઃ પ્રશ્રૂયતે સદા ।
તસ્ય વૈ દર્શનં કાર્યં કોટિહત્યાવિનાશનમ્

અલકનંદા યત્ર ગંગા તત્ર સ્નાનં સમાચરેત્ ।
કૃત્વા સ્નાનં તુ વૈ તત્ર મહાપાપાત્પ્રમુચ્યતે

યત્ર વિશ્વેશ્વરો દેવસ્તિષ્ઠત્યેવ ન સંશયઃ ।
એકસ્મિન્નવસરે બ્રહ્મન્સુતપસ્તપ્તવાનહમ્

તદા નારાયણો દેવો ભક્તાનાં હિ કૃપાકરઃ ।
અવ્યયઃ પુરુષઃ સાક્ષાદીશ્વરો ગરુડધ્વજઃ ।
સુપ્રસન્નોઽબ્રવીન્માં વૈ વરં વરય સુવ્રત

શ્રીનારાયણ ઉવાચ-।
યદ્યદીપ્સસિ દેવ ત્વં તં તં કામં દદામ્યહમ્ ।
ત્વં કૈલાસવિભુઃ સાક્ષાદ્રુદ્રો વૈ વિશ્વપાલકઃ

રુદ્ર ઉવાચ-।
અલં ગૃહ્ણામિ ભો દેવ સુપ્રસન્નો જનાર્દન ।
દ્વૌ વરૌ મમ દીયેતાં યદિ દાતું ત્વમિચ્છસિ

તવ ભક્તિઃ સદૈવાસ્તુ ભક્તરાજો ભવામ્યહમ્ ।
સર્વે લોકા બ્રુવંત્વેવમયં ભક્તઃ સદૈવ હિ

તવ પ્રસાદાદ્દેવેશ મુક્તિદાતા ભવામ્યહમ્ ।
યે લોકા માં ભજિષ્યંતિ તેષાં દાતા ન સંશયઃ

વિષ્ણુભક્ત ઇતિ ખ્યાતો લોકે ચૈવ ભવામ્યહમ્ ।
યસ્યાહં વરદાતા તુ તસ્ય મુક્તિર્ભવેત્પ્રભો

જટિલો ભસ્મલિપ્તાંગો હ્યહં વૈ તવ સંનિધૌ ।
તવ ચરણપ્રસાદેન લોકે ખ્યાતો ભવામ્યહમ્

ઇતિ શ્રીપાદ્મેમહાપુરાણે પંચપંચાશત્સહસ્રસંહિતાયાં નારદોમાપતિસંવાદે બદરીનારાયણમાહાત્મ્યે રુદ્રપ્રસાદોનામ દ્વિતીયોઽધ્યાયઃ