પદ્મ પુરાણ · અધ્યાય 6.198

કુમારા ઊચુઃ-
અથ તે સંપ્રવક્ષ્યામઃ સપ્તાહશ્રવણે વિધિમ્ ।
યેન ભાગવતં સિદ્ધ્યેત્પુંસાં કૃષ્ણાર્પિતાત્મનામ્

દૈવજ્ઞં શાસ્ત્રકુશલં સમાહૂય ધનાંશુકૈઃ ।
સમભ્યર્ચ્ય મુહૂર્તં તુ પ્રાક્પૃચ્છેદ્ભક્તિમાન્નરઃ

સ વદેદ્યં મુહૂર્તં તુ તત્રારંભઃ પ્રશસ્યતે ।
નભોનભસ્યેષોર્જાશ્ચ સહઃ શુચિસમન્વિતાઃ

માસાઃ શ્રેષ્ઠાઃ કથારંભે પૂર્ણા ચાપિ તિથિઃ શુભા ।
ભૌમાર્કિવર્જિતા વારા ભાનિ ધ્રુવ મૃદૂનિ ચ

શુભે યોગે શુભે લગ્ને પ્રારંભઃ શસ્યતે સદા ।
નિત્યાયાં ચ કથાયાં તુ પુરાણાનાં મુનીશ્વર

દ્વાદશીં વર્જયેત્પ્રાજ્ઞઃ સૂતસૂતકસંભવાત્ ।
શ્રીમદ્ભાગવતસ્યાપિ સપ્તાહેનૈવ કેઽપિ ચ

ન નિષેધોસ્તિ દેવર્ષે પ્રાહુરેવં પુરાવિદઃ ।
શ્રીભાગવતસપ્તાહો મહાયજ્ઞઃ સ્મૃતો બુધૈઃ

અતો નિમંત્રણં કાર્યં વૈષ્ણવાનાં સમંતતઃ ।
સતાં સમાજો ભવિતા સપ્તાહં વૈષ્ણવોત્તમાઃ

આગંતવ્યમતશ્ચાત્ર વૈષ્ણવૈઃ શ્રવણાર્થિભિઃ ।
સમાગતાનાં તેષાં તુ નિવાસં પરિકલ્પયેત્

તીર્થે વાપિ વને વાપિ ગ્રામે વાપિ પ્રયત્નતઃ ।
સંશોધિતાયાં ભૂમ્યાં તુ મંડપં પરિકલ્પયેત્

કદલીસ્તંભસંયુક્તં ચતુર્દિક્ષુ ધ્વજાન્વિતમ્ ।
ઉચ્ચમાસનમપ્યુક્તં વક્તુસ્તસ્યાગ્રતો મુને

આપાર્શ્વદ્વયમુક્તાનિ શ્રોતૄણામાસનાનિ ચ ।
ઉદઙ્મુખો ભવેદ્વક્તા સમાજેસ્મિન્વિદાંવરઃ

વેદશાસ્ત્રાર્થતત્વજ્ઞો વૈષ્ણવો બ્રાહ્મણોત્તમઃ ।
દૃષ્ટાંતકુશલો ધીરો વક્તા કાર્યોઽતિનિસ્પૃહઃ

સર્વસંદેહહર્ત્તાપિ કાર્યો વક્તા ન ચૈવ હિ ।
વક્તુઃ પાર્શ્વે સહાયાર્થં સ્થાપ્યોઽન્ય પંડિતઃ સુધીઃ

શ્રોતૄણાં સંશયચ્છેત્તા જ્ઞાનાંબોધવિધાયકઃ ।
કથાવિઘ્નવિઘાતાર્થં ગણેશં પ્રાક્પ્રપૂજયેત્

તતો દુર્ગાં હરં વિષ્ણું બ્રહ્માણં ભાસ્કરં દ્વિજાન્ ।
સંપૂજ્ય વિધિવદ્ભક્ત્યા તર્પયેદ્દેવતાઃ પિતૄન્

મુખ્યઃ શ્રોતા તતઃ પશ્ચાત્પૂજયેત્પુસ્તકે હરિમ્ ।
તતઃ પ્રદક્ષિણીકૃત્ય દ્રવ્યવસ્ત્રફલાનિ ચ

ધૃત્વાંજલૌ પુસ્તકસ્થં હરિં સંપ્રાર્થયેન્મુને ।
ત્વં ભાગવતલોકેસ્મિન્સ્વયં કૃષ્ણો વ્યવસ્થિતઃ

સમાશ્રિતો મયા નાથ મુક્ત્યર્થં ભવસાગરે ।
મનોરથો મદીયોઽયં સર્વથા સફલસ્ત્વયા

નિર્વિઘ્નેન પ્રકર્તવ્યો દાસોઽહં તવ કેશવ ।
ઇત્યુચ્ચાર્ય મુને દ્રવ્યં પુસ્તકાગ્રે સમર્પ્યતુ

વક્તારં પ્રાર્થયેચ્ચાપિ નમસ્કુર્વન્કૃતાંજલિ ।
શુકરૂપદ્વિજશ્રેષ્ઠ સર્વશાસ્ત્રવિશારદ

શ્રીભાગવતવ્યાખ્યાનાદજ્ઞાનં મે વિનાશય ।
ઇતિ સંપ્રાર્થ્ય વક્તારં વરયેત્પંચ વાડવાન્

દ્વાદશાક્ષરમંત્રસ્ય જપાર્થં મુનિસત્તમ ।
ગીતવાદ્યવિધિજ્ઞાંશ્ચ સંપૂજ્યાર્થાંશુકાદિભિઃ

સ્થાપયેત્કીર્તનાર્થં તુ કથાંતે વિધિવન્મુને ।
યસ્તુ જાયા ધનાગાર પુત્રચિંતાં વ્યુદસ્ય ચ

શૃણુયાદેકચિત્તસ્તુ સ સમગ્રં ફલં લભેત્ ।
સૂર્યોદયં સમારભ્ય સાર્દ્ધત્રિપ્રહરાંતકમ્

પઠિત્વાર્થઃ પ્રકર્ત્તવ્યો વાક્યમધ્યાયમેવ વા ।
મધ્યાહ્ને ઘટિકાયુગ્મં વિરમેદપિ નારદ

કથાઽવસાને કર્ત્તવ્યં કીર્તનં કેશવસ્ય ચ ।
ઉપવાસઃ પ્રકર્ત્તવ્યઃ શ્રોતૃભિસ્તત્ફલેપ્સુભિઃ

તદશક્તો હવિષ્યાન્નં સકૃત્સ્વલ્પં સમાહરેત્ ।
જલેનાપિ ફલેનાપિ દુગ્ધેન ચ ઘૃતેન વા

કેવલેનૈવ કર્ત્તવ્યં નિર્વિઘ્નં ધારણં તનોઃ ।
સપ્તાહવ્રતિનાં પુંસાં નિયમાન્શૃણુ નારદ

વિષ્ણુદીક્ષાવિહીનાનાં નાધિકારોઽત્ર કીર્તિતઃ ।
બ્રહ્મચર્યમધઃ સુપ્તિઃ પત્રાવલ્યાં ચ ભોજનમ્

સમાચરેન્નિત્યમેવ સપ્તાહે મુનિસત્તમ ।
દ્વિદલં મધુ તૈલં ચ પરાન્નં ચેક્ષુજં રસમ્

ભાવદુષ્ટં ક્રિયાદુષ્ટં જહ્યાત્પર્યુષિતં વ્રતી ।
પલાંડુલશુનં હિંગું મૂલકં ગૃંજનં તથા

નાલિકાં ચૈવ કૂષ્માંડં નરો નાદ્યાત્કથાવ્રતી ।
કામં ક્રોધં મદં લોભં દંભં માત્સર્યમેવ ચ

મોહં દ્વેષં તથા હિંસાં નૈવ કુર્યાત્કથાવ્રતી

વેદવૈષ્ણવવિપ્રાણાં ગુરુ ગોવ્રતિનાં તથા ।
સ્ત્રી રાજમહતાં ચાપિ નિંદાં જહ્યાત્કથાવ્રતી

સત્યં શૌચં દયામૌનમાર્જવં વિનયં તથા ।
મનઃ પ્રસન્નતાં ચાપિ બુધઃ કુર્યાત્કથાવ્રતી

શ્રીકામસ્તનયાર્થી ચ જયકામશ્ચ મોક્ષધીઃ ।
શૃણુયાદ્વૈ ભાગવતં નિષ્કામઃ શ્રીહરિં લભેત્

સપ્તમે દિવસે કુર્યાલ્લંઘનં તત્સમાપ્તિકે ।
વક્તુશ્ચ પૂજા કર્ત્તવ્યા ગોભૂસ્વર્ગં વરાદિભિઃ

પ્રસાદ તુલસીં માલાં શ્રોતૃભ્યઃ પ્રતિદાપયેત્ ।
ઉત્સવશ્ચ તથા કાર્યો ગીતવાદ્યવિશારદૈઃ

ગીતાર્થં શૃણુયાચ્ચાપિ પરેઽહનિ વિચક્ષણઃ ।
પ્રતિશ્લોકં ચ જુહુયાદ્ગાયત્ર્યા વા યથાવિધિ

પાયસં મધુસર્પિશ્ચ તિલાંસ્તંડુલકાન્યવાન્ ।
શર્કરાં ચ પ્રિયાલં ચ દ્રાક્ષાં વાતામ ખર્જુરૌ

અંભોજાનિ ચ કર્પૂરં ચંદનાગુરુણીપુરમ્ ।
લવંગં બિલ્વપત્રાણિ સહસ્રં ચ પૃથક્પૃથક્

વિઘ્નસ્ય ચ વિઘાતાર્થં ન્યૂનાધિક્યનિવૃત્તયે ।
આત્મનઃ પૂતતાર્થં ચ પઠેન્નામસહસ્રકમ્

દ્વાદશાષ્ટાદશાથાપિ શ્રદ્ધયાહ્યધિકાંસ્તથા ।
પાયસેનાશયેદ્વિપ્રાન્સ્વર્ણં ધેનુશ્ચ દક્ષિણા

વ્રતસિદ્ધ્યર્થમપ્યત્ર પ્રૌષ્ઠપદ્યામથાપિ વા ।
સ્વર્ણસિંહં વિનિર્માય તસ્ય પૃષ્ઠે નિધાય ચ

શ્રીમદ્ભાગવતં વક્ત્રે લેખયિત્વા સમર્પયેત્ ।
એવં કૃતે વિધાને તુ સર્વપાપનિવારણમ્

ભવેચ્છ્રોતુઃ સુફલદં શ્રીમદ્ભાગવતં શ્રુતમ્ ।
ધર્મકામાર્થમોક્ષાણાં સાધનં ભક્તિદાયકમ્

ન કાર્યં વિદ્યતે લોકે યદનેન ન સિધ્યતિ ।
તતો ભાગવતં લોકે પુરાણેભ્યોઽધિકં મતમ્

દોષાષ્ટાદશનિર્મુક્તો વાચકઃ પરિકીર્તિતઃ ।
દ્વાત્રિંશદપરાધૈર્હિ મુક્તો શ્રોતા મતો બુધૈઃ

શ્રીમદ્ભાગવતં નામ પુરાણં કામદં નૃણામ્ ।
તથાપિ શ્રવણં ચાસ્ય નિષ્કામસ્યૈવ ભક્તિદમ્

શ્રીમદ્ભાગવતાભિધઃ સુરતરુસ્તારાંકુરઃ સજ્જનિઃ સ્કંધૈર્દ્વાદશભિસ્તતઃ પ્રવિલસદ્ભક્ત્યાલવાલોદયઃ ।
દ્વાત્રિંશત્ત્રિશતં ચ યસ્ય વિલસચ્છાખાઃ સહસ્રાણ્યલં પર્ણાન્યષ્ટદશેષ્ટદોતિસુલભો વર્વર્તિ સર્વોપરિ

ઇતિ તે કથિતં સર્વં કૃતં ચાપિ તવેપ્સિતમ્ ।
જ્ઞાનવૈરાગ્યભક્તીનાં તારુણ્યં લોકમોક્ષદમ્

સૂત ઉવાચ-
ઇત્યુક્તા તે કુમારાસ્તુ કૃષ્ણાંઘ્રિસુધયાપ્લુતાઃ ।
વિરેમુર્ભગવદ્ભક્તા દીનોદ્ધરણતત્પરાઃ

તદ્વાક્યં તુ સમાકર્ણ્ય નારદો ભગવત્પ્રિયઃ ।
પ્રેમગદ્ગદયા વાચા તાનુવાચ કૃતાંજલિઃ

નારદ ઉવાચ-
ધન્યોસ્મ્યનુગૃહીતોસ્મિ ભવદ્ભિઃ કરુણાપરૈઃ ।
યદ્ભાગવતસપ્તાહાન્નિકટે દર્શિતો હરિઃ

એવં બ્રુવતિ વૈ તસ્મિન્નારદે વૈષ્ણવોત્તમે ।
પર્યટંસ્તં સમાયાતસ્તત્ર યોગેશ્વરઃ શુકઃ

દ્વિરષ્ટવર્ષાકૃતિરંબુજાક્ષો વ્યાસાત્મજો જ્ઞાનપયોધિચંદ્રઃ।
કથાવસાને નિજલાભતુષ્ટો હૃદાનિશં ભાગવતં પઠંશ્ચ

દૃષ્ટ્વા સદસ્યાસ્તમથોરુતેજસંસદ્યઃસમુત્થાય વરાસનં દદુઃ ।
સ ચોપવિષ્ટઃ સુખમાસને યદા તદાવિરાસીદ્ધરિરબ્જલોચનઃ

ભવો ભવાન્યા કમલાસનઃ સુતૈસ્તત્રાગતઃ કીર્તનદર્શનાય ચ ।
સુરેશમુખ્યાસ્ત્રિદશા વિમાનકૈઃ સમાગતાસ્તૈરભવદ્વૃતં નભઃ

પ્રહ્લાદસ્તાલધારીતરલગતિતયા હ્યુદ્ધવઃ કાંસ્યધારી વીણાધારી સુરર્ષિઃ સ્વરકુશલતયા રાગકર્તાઽર્જુનોઽભૂત્ ।
ઇંદ્રો માર્દંગિકોઽભૂજ્જયજય સુવચઃ પ્રાવદંસ્તે કુમારાઃ સદ્ભાવસ્ય પ્રવક્તા નિરતિશયગુણોવ્યાસપુત્રો બભૂવ

નનર્ત્ત મધ્યે ત્રિકમેવ તત્ર જ્ઞાનાદિકાનાં નવરૂપયુક્તમ્ ।
અલૌકિકં કીર્ત્તનકં સમીક્ષ્ય પ્રસન્નચેતા હરિરિત્યુવાચ

મત્તો વરં ભાગવતા વૃણીધ્વં પ્રીતાત્કથાકીર્ત્તનતો ભૃશં વઃ।
શ્રુત્વાથ તદ્વાક્યમતિપ્રસન્ના પ્રેમાર્દ્રચિત્તા હરિમૂચિરે તે

કુમારા ઊચુઃ-
સપ્તાહયજ્ઞેન વિતાયતેન સદ્યઃ પ્રસન્નો ભવિતા મુરારે ।
કલૌયુગે ઘોરતરે નરાણાં સ્વલ્પાયુષાં વિઘ્નશતાકુલાનામ્

એવં વરં વિશ્વવિધાનપાલનપ્રણાશહેતોર્ભવતોખિલાત્મનઃ ।
વૃણીમહેઽન્યો ન મનોરથો વિભો ભવત્પદાંભોજનિષેવિણાં હિ નઃ

એવમસ્ત્વિતિ ચૈવોક્ત્વા તત્રૈવાંતર્દધે હરિઃ ।
નારદઃ સુપ્રસન્નાત્મા કુમારાનભ્યવાદયત્

તતસ્તે સનકાદ્યાશ્ચ ભૃગ્વાદ્યાશ્ચ શુકાદયઃ ।
પ્રયયુઃ સ્વાશ્રમાન્હૃષ્ટાઃ પીત્વા તચ્ચ કથામૃતમ્

ભક્તિઃ સુતાભ્યાં સહિતા નારદેન પ્રવર્તિતા ।
ભૂમંડલે સમસ્તેઽસ્મિસ્તદા પ્રભૃતિ શૌનક

શિવ ઉવાચ-
આખ્યાનં મહદાકર્ણ્ય પ્રીતાત્મા શૌનકઃ પ્રિયે ।
પર્યપૃચ્છત્પુનઃ સૂતં સર્વસંદેહભંજનમ્

શૌનક ઉવાચ-।
શુકેનોક્તં કદા રાજ્ઞે ગોકર્ણેન કદા પુનઃ ।
સુરર્ષયે કદા બ્રાહ્મૈરેતદાખ્યાહિ માનદ

સૂત ઉવાચ-
શ્રીકૃષ્ણનિર્ગમાત્ત્રિંશદ્વર્ષાવધિગતે કલૌ ।
ભાદ્રશુક્લનવમ્યાં વૈ કથારંભં શુકોઽકરોત્

પરીક્ષિચ્છ્રવણાંતે તુ ગતે વર્ષશતદ્વયે ।
શુચિશુક્લનવમ્યાં તુ ગોકર્ણોકથયત્કથામ્

કલૌ સહસ્રમબ્દાનામધુના પ્રગતં દ્વિજ ।
પરીક્ષિતો જન્મકાલાત્સમાપ્તિં નીયતાં મખઃ

ઈશ્વર ઉવાચ-
ઇતિ શ્રુત્વા વચસ્તસ્ય શૌનકો મુનિસત્તમઃ ।
પૂર્ણં ચકાર તં યજ્ઞં સહસ્રપરિવત્સરમ્

બ્રાહ્મં પાદ્મં વૈષ્ણવં ચ કૌર્મ્યં માત્સ્યં ચ વામનમ્ ।
વારાહં બ્રહ્મવૈવર્ત્તનારદીયં ભવિષ્યકમ્

આગ્નેયમર્દ્ધં વૈ સૂતાચ્છુશ્રુવુર્લોમહર્ષણાત્ ।
એતાનિ તુ પુરાણાનિ દ્વાપરાંતે શ્રુતાનિ હિ

શૌનકાદ્યૈર્મુનિવરૈર્યજ્ઞારંભાત્પુરૈવ હિ ।
યદા તુ તીર્થયાત્રાયાં વલદેવઃ સમાગતઃ

નૈમિષં મિશ્રિકં નામ સમાહૂતો મુનીશ્વરૈઃ ।
તત્ર સૂતં સમાસીનં દૃષ્ટ્વા ત્વધ્યાસનોપરિ

ચુક્ષુભે ભગવાન્રામઃ પર્વણીવ મહોદધિઃ ।
આષાઢશુક્લદ્વાદશ્યાં પારણાહનિ પાર્વતિ

પૂર્વાર્દ્ધયામવેલાયાં ભાવિત્વાત્કૃષ્ણમાયયા ।
મુગ્ધો દર્ભકરો રામઃ પ્રાહરલ્લોમહર્ષણમ્

તતો મુનિગણાઃ સર્વે હાહાકારપરાયણાઃ ।
બભૂવુર્નગજેત્યર્થં શોકદુઃખાકુલાંતરાઃ

ઊચુશ્ચ રામં લોકેશં વિનયેન ક્ષમાપરાઃ ।
ઋષય ઊચુઃ-
રામરામ મહાબાહો ભવતા લોકકારિણા

અજાનતેવાચરિતા હિંસા બ્રહ્મવધાધિકા ।
વ્યાસશિષ્યો હ્યયં સાક્ષાત્પુરાણર્ષિર્મહાતપાઃ

અસ્મૈ હ્યધ્યાસનં દત્તમસ્માભિર્યજ્ઞકર્મણિ ।
અષ્ટાદશપુરાણાનાં વાચકાય કૃતક્ષણૈઃ

કથાયાં જગદીશસ્ય દીર્ઘમાયુશ્ચ માનદ ।
તદ્ભવાંલ્લોકરક્ષાર્થં ધર્મસેતુપ્રવર્તકઃ

આવિર્ભૂતો જગન્નાથો નિગ્રહાનુગ્રહક્ષમઃ ।
ઇત્યુક્ત્વા મુનયસ્તે તુ બલદેવાગ્રતઃ પ્રિયે

તૂષ્ણીં બભૂવુઃ સહસા સ્મરંતો નિયતેર્બલમ્ ।
તતઃ પ્રોવાચ ભગવાન્રામઃ શત્રુનિષૂદનઃ

વિપ્રાન્સંપ્રીણયંસ્તાંસ્તુ લોકવેદપથાનુગઃ ।
શ્રીરામ ઉવાચ-
વિપ્રાઃ શૃણુત ભદ્રં વઃ કોપં ત્યક્ત્વા સુદૂરતઃ

યદહં વેદ્મિ ભવતામભીષ્ટં કાર્યસિદ્ધિદમ્ ।
અસ્ય પુત્રો મહાજ્ઞાની ભવિષ્યતિ વરાન્મમ

ભવતામીપ્સિતં સર્વં શાસ્ત્રં વૈ કથયિષ્યતિ ।
યદર્થમહમાહૂતસ્તચ્ચ કાર્ય્યં સમુચ્યતામ્

ઈશ્વર ઉવાચ-
ઇતિ શ્રુત્વા વચસ્તે તુ રામસ્ય સુમહાત્મનઃ ।
બલ્વલસ્ય વધાર્થાય પ્રેરયામાસુરીશ્વરમ્

તતઃ સ બલ્વલં હત્વા પ્રસાદ્ય મુનિપુંગવાન્ ।
પ્રણિપત્યાભ્યનુજ્ઞાતસ્તીર્થયાત્રામુપાગમત્

તીર્થયાત્રાં ગતે રામે શૌનકાદ્યા મુનીશ્વરાઃ ।
લૌમહર્ષણિમાહૂય સત્કૃત્ય નગનંદિનિ

તત્પદે સ્થાપયામાસુઃ શેષં સંકીર્તનાય વૈ ।
આગ્નેયોત્તરમાહાત્મ્યં શ્રીમદ્ભાગવતાંતકમ્

પુરાણસપ્તકં સાર્દ્ધં શુશ્રુવુર્હૃષ્ટમાનસાઃ ।
દશસપ્તપુરાણાનિ કૃત્વા સત્યવતીસુતઃ

નાપ્તવાન્મનસસ્તોષં ભારતેનાપિ ભામિનિ ।
જ્ઞાત્વાસ્ય હૃદયં ખિન્નં નારદો દેવદર્શનઃ

સમાજગામ ભગવાન્વ્યાસસ્યાશ્રમમુત્તમમ્ ।
તં દૃષ્ટ્વા વાસવીસૂનુઃ સત્કૃત્યાસનપૂર્વકમ્

નારદં પૂજયામાસ વિધિદૃષ્ટેનકર્મણા ।
અથ તં નારદઃ પ્રાહ કિં ભવાન્ક્લિષ્ટમાનસઃ

ધ્યાયતે તત્સમાચક્ષ્વ સર્વં સંદેહકારણમ્ ।
ઇતિ પૃષ્ટઃ સ મુનિના પરાશર સુતોઽબ્રવીત્

બ્રહ્મન્કિં કારણં ચેતો મોહે જાને ન તત્ત્વહમ્ ।
ભવાન્વિજ્ઞાનકુશલો જ્ઞાત્વા તત્પ્રબ્રવીતુ મે

એવં વિજ્ઞાપિતસ્તેન નારદોઽધ્યાત્મકોવિદઃ ।
ઉવાચ પરમં તત્વં યદુક્તં વિધિનાત્મને

નારદ ઉવાચ-
શૃણુ પારાશરે મત્તઃ કારણં યેન વૈ તવ ।
અસંપન્નં મનો ભાતિ શાસ્ત્રયોનેરપિ પ્રભોઃ

ત્વયાવતીર્ય લોકેસ્મિન્વેદા વ્યસ્તા વિભાગશઃ ।
કૃતાનિ ચ પુરાણાનિ સેતિહાસાનિ ચાનઘ

યત્ર સર્વસ્ત્રયી ધર્મો વર્ણાશ્રમનિવાસિનામ્ ।
નિર્દિષ્ટો વીક્ષ્ય કાલેન નૃણામલ્પાયુષાં કલૌ

યત્રાધિકારઃ સર્વેષાં દૃશ્યતે શ્રવણાદિષુ ।
સ્ત્રી શૂદ્ર દ્વિજબંધૂનાં સાધૂનાં સાધુસંગમઃ

ધર્માદયો યથાશશ્વદ્વર્ણિતાસ્તેષુ વૈ ત્વયા ।
પ્રાધાન્યેન તથા નૈવ વર્ણિતો મહિમા હરેઃ ।
સર્વધર્મક્રિયાશૂન્યે કલૌ દોષનિધૌ મુને

ન ગતિઃ પાપકર્તૄણાં વિના કૃષ્ણકથાઽમૃતમ્ ।
એષ એવ ગુણો હ્યસ્મિન્ઘોરે કલિયુગે નરાઃ

યત્કૃષ્ણકીર્તનેનૈવ મુચ્યંતે કર્મબંધનાત્ ।
યજ્ઞો દાનં તપઃ કર્મ જ્ઞાનં ધ્યાનં કૃતાદિષુ

સિદ્ધિદં ચ તથા બ્રહ્મન્નામકીર્ત્તનકં કલૌ ।
અતો વૈ કલિજાતાનામુદ્ધારાર્થં નૃણાં ભવાન્

શ્રીમદ્ભાગવતં નામ પુરાણં વર્ણયત્વલમ્ ।
યેન પ્રવર્તિતેનાંગ ભવતો માનસં ધ્રુવમ્

તોષમેષ્યતિ લોકાશ્ચ પ્રાપ્સ્યંતિ કૃતકૃત્યતામ્

ઈશ્વર ઉવાચ-
એવમાદિશ્ય સ મુનિર્વ્યાસાયામિતતેજસે ।
યયૌ યાદૃચ્છિકઃ શશ્વદ્ગાયન્હરિગુણાન્પ્રિયે

નારદે તુ ગતે પશ્ચાદ્વ્યાસઃ સર્વાર્થદર્શનઃ ।
ચકાર સંહિતામેતાં શ્રીમદ્ભાવતીં પરામ્

પૈલાદીંશ્ચતુરો વેદાનધ્યાપ્ય વિધિપૂર્વકમ્ ।
પુરાણસંહિતાઃ સર્વાઃ સૂતાય પ્રત્યપાદયત્

શ્રીમદ્ભાગવતં નામ પુરાણં બ્રહ્મસંમિતમ્ ।
શુકમધ્યાપયામાસ વિરતં લોકવેદતઃ

સા સંહિતા ભાગવતી લોમહર્ષણસૂનુના ।
શ્રુતા કથયતો રાજ્ઞે ઔત્તરેયાય વૈ શુકાત્

શૌનકાદિઋષિભ્યસ્તુ તેન પ્રોક્તા યથાર્થતઃ ।
વરીવર્ત્તિ પુરાણાનામુપરીયં નગાત્મને

અસ્યાં સંલગ્નચિત્તાનાં નૃણામન્યત્ર નો રતિઃ ।
જાયતે માનસે કૃષ્ણો નંદસૂનુશ્ચકાસ્તિ ચ

યત્તુ પૃષ્ટં ત્વયા ભદ્રે લોકનિસ્તારહેતવે ।
શ્રીભાગવતમાહાત્મ્યં મહ્યં સંકીર્ત્તયેતિ હ

તત્સર્વં ચ મયા તુભ્યં નિર્દિષ્ટં ગણપાંબિકે ।
નાનેતિહાસસહિતં ભક્તિમુક્તિપ્રદાયકમ્

યઃ શૃણોતિ નરો ભક્ત્યા માહાત્મ્યં પઠતેઽપિ ચ ।
અનુમોદનેન વા સોપિ લભતે પરમાં ગતિમ્

દ્વિજોઽધીત્યાપ્નુયાદ્વેદાન્ક્ષત્રિયસ્તુ લભેજ્જયમ્ ।
ધનં વૈશ્યસ્તથાશૂદ્રઃ શ્રુત્વૈવ લભતે ગતિમ્

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખંડે ઉમામહેશ્વરસંવાદે શ્રીમદ્ભાગવતમાહાત્મ્યે અષ્ટનવત્યધિકશતતમોઽધ્યાયઃ