પદ્મ પુરાણ · અધ્યાય 6.182

શિવ ઉવાચ।
અષ્ટમાધ્યાયમાહાત્મ્યં શૃણુ વક્ષ્યામિ પાર્વતિ ।
યસ્ય શ્રવણમાત્રેણ પરાં મુદમવાપ્સ્યસિ

આમર્દકં પુરં નામ્ના વિશ્રુતં દક્ષિણાપથિ ।
દ્વિજન્મા ભાવશર્મેતિ તત્રાસીદ્ગણિકાપતિઃ

ખાદન્માંસં પિબન્મદ્યં ચોરયન્સાધુસંપદઃ ।
રમમાણઃ પરસ્ત્રીભિરાખેટક કુતૂહલી

અત્યવાહયદત્યુગ્રો ગરીયાંસં મનોરથમ્ ।
સુહૃદાં વિટગોષ્ઠ્યાં ચ તાલીફલસુધારસમ્

નિપીય કંઠપર્યંતમજીર્ણેનાતિપીડિતઃ ।
મૃતઃ કાલેન પાપાત્મા જાતસ્તાલીતરુર્મહાન્

તસ્યચ્છાયામુપાશ્રિત્ય નિબિડામતિશીતલામ્ ।
અભૂતાં દંપતી કૌચિદ્બ્રહ્મરાક્ષસતાં ગતૌ

દેવ્યુવાચ।
કિં જાતીયૌ કિમાત્માનૌ કિંવૃત્તાવિત્યુદીરય ।
કર્મણા કેન વા દેવ બ્રહ્મરાક્ષસતા તયોઃ

શિવ ઉવાચ।
વેદવેદાંગતત્વજ્ઞઃ સર્વશાસ્ત્રાર્થકોવિદઃ ।
સદાચારોઽભવત્કશ્ચિદ્દિવજો નામ કુશીવલઃ

જાયા ચ તસ્ય કુમતિ નામધેયા દુરાશયા ।
સ સભાર્યો મહાદાનાન્યાદદાનોઽતિલોભવાન્

મહિષીં કાલપુરુષં હયાદીનનુવાસરમ્ ।
અપ્રયચ્છન્દ્વિજાતિભ્યો દાનલબ્ધાં વરાટિકામ્

કાલેન દંપતી પ્રેતૌ બ્રહ્મરાક્ષસરૂપિણૌ ।
પર્યટંતૌ મહીમેતાં ક્ષુત્તૃષાકુલવિગ્રહૌ

વિશશ્રમતુરાગત્ય મૂલં તાલીતરોસ્તતઃ ।
કથમેતન્મહાદુઃખમાવયોરપગચ્છતિ

કથં વા જાયતે મુક્તિર્બ્રહ્મરાક્ષસયોનિતઃ ।
ઇતિ પૃષ્ટો ગૃહિણ્યાઽસૌ બ્રાહ્મણઃ સમભાષત

બ્રહ્મવિદ્યોપદેશેન વિનાધ્યાત્મવિચારણાત્ ।
વિનાકર્મવિધિજ્ઞાનાત્કથં મુચ્યેત સંકટાત્

ભાર્યોવાચ।
કિં તદ્ બ્રહ્મ કિમધ્યાત્મં કિં કર્મ પુરુષોત્તમ ।
એતાવદુક્તે તત્પત્ન્યા યદાશ્ચર્યમભૂચ્છૃણુ

અષ્ટમાધ્યાયશ્લોકાર્દ્ધશ્રવણાત્સ તરુસ્તદા ।
વિહાય તાલીરૂપં તદ્બભૂવ દ્વિજસત્તમઃ

સદ્યોજ્ઞાનવિધૂતાત્મા વિમુક્તઃ પાપકંચુકાત્ ।
તન્માહાત્મ્યાદ્વિનિર્મુક્તૌ દંપતી તૌ બભૂવતુઃ

એતાવદેવ મુક્તં ચ દૈવાન્નિર્ગત્ય તન્મુખાત્ ।
તતોંતરિક્ષાદાયાંતં ક્વણત્કિંકિણિકં શુભમ્

દિવિ દિવ્યાંગનાવક્ત્રચંદ્રમંડલમંડિતમ્ ।
અપ્સરોવદનાંભોજ ભ્રામ્યદ્ભ્રમરસંકુલમ્

નિર્મથ્યમાનદુગ્ધાબ્ધિ વેલાડિંડિરપાંડુરૈઃ ।
ગંગાતરંગસુભગૈશ્ચામરૈરુપશોભિતમ્

ગાયદ્ગંધર્વસુભગં નૃત્યત્સુરવધૂશતમ્ ।
દિવ્યં વિમાનમારૂઢૌ દંપતી જગ્મતુર્દિવમ્

અત્રત્યં વૃત્તમખિલમેતદ્વિસ્મયકારકમ્ ।
તતો લિલેખ મેધાવી શ્લોકાર્દ્ધમિદમાદરાત્

યયૌ વારાણસીં નામ નગરીં મુક્તિદાયિનીમ્ ।
આરાધયિતુમન્વિચ્છન્દેવદેવં જનાર્દનમ્

સ તત્ર કર્તુમારેભે તપઃ પરમુદારધીઃ ।
અત્રાંતરે જગન્નાથો દેવદેવો જનાર્દનઃ

પૃષ્ટો દુગ્ધાબ્ધિસુતયા સંયોજ્ય કરસંપુટમ્ ।
નિદ્રાપથં વિહાયૈવ સ્થીયતે કથ્યતામિતિ

શ્રીભગવાનુવાચ।
કાશ્યાં ભાગીરથી તીરે તપસ્યતિતરાં દ્વિજઃ ।
ભાવશર્માતિ મેધાવી મદ્ભક્તિરસપૂરિતઃ

જપન્ગીતાષ્ટમાધ્યાયશ્લોકાર્દ્ધં નિયતેંદ્રિયઃ ।
સંતુષ્ટવાનહં દેવિ તદીયતપસા ભૃશમ્

ચિરં વિચારયન્નેવ તત્તપઃ સદૃશં ફલમ્ ।
દાતુમુત્કંઠિતમના વર્તેયં સાંપ્રતં પ્રિયે

પાર્વત્યુવાચ।
હરિઃ પ્રસન્નભૂતોઽપિ ચિંતાં પ્રાપ યદિ પ્રભો ।
ભાવશર્મા હરેર્ભક્તઃ પ્રાપ્તઃ કિં તત્ફલં પુનઃ

શ્રીમહાદેવ ઉવાચ।
તતઃ પ્રસાદમાસાદ્ય પ્રસન્નસ્ય મુરદ્વિષઃ ।
સુખમાત્યંતિકં પ્રાપ ભાવશર્મા દ્વિજોત્તમઃ ।
લેભિરે પદવીં સર્વે તદીયા અપિ વંશજાઃ

તત્કર્મવશતો યે વૈ સંપ્રાપ્તા યાતનાં પુરા ।
એતદેવાષ્ટમાધ્યાયમાહાત્મ્યં કિંચિદેવ તે

કથિતં મૃગશાવાક્ષિ દ્રષ્ટવ્યં તુ સદૈવ ચ

ઇતિ શ્રીપાદ્મે મહાપુરાણે પંચપંચાશત્સા૦ ઉત્તરખંડે ગીતામાહાત્મ્યે દ્વ્યશીત્યધિકશતતમોઽધ્યાયઃ