પદ્મ પુરાણ · અધ્યાય 6.179

શ્રીભગવાનુવાચ।
પંચમસ્યાધુના દેવિ માહાત્મ્યં લોકપૂજિતમ્ ।
કથયામિ સમાસેન સાવધાના શૃણુ પ્રિયે

પિંગલો નામ ભદ્રેષુ પુરુકુત્સપુરે દ્વિજઃ ।
અવદાતે કુલે જાતો વિશ્રુતે વેદવાદિનામ્

કુલોચિતાનિ શાસ્ત્રાણિ તથા વેદાન્વિસૃજ્ય સઃ ।
તૌર્યત્રિકે મતિં ચક્રે વાદયન્મુરજાદિકમ્

કૃતશ્રમસ્તતસ્તત્ર ગીતે નૃત્યે ચ વાદને ।
પરાં પ્રસિદ્ધિમાસાદ્ય નૃપસદ્મ વિવેશ સઃ

સમાતસ્થે સ તેનાસૌ પુરા ભૂમિભુજા સહ ।
પરદારાનુપાહૃત્ય બુભુજે તા અનન્યધીઃ

તત ઉત્સિક્તગર્વોઽયં સૂચમાનો નિરંકુશઃ ।
પરચ્છિદ્રાણિ ચામુષ્મૈ વિવિક્તે સ નિરંતરમ્

તસ્યાસીદરુણા નામ ભાર્યા હીનકુલોદ્ભવા

ભ્રમત્યન્વેષયંતી સા કામુકેન વિહારિણી ।
તમંતરાયં મન્વાના નિશીથિન્યાં નિજાલયે

નિજઘાન શિરશ્છિત્ત્વા નિચખાન મહીતલે ।
વિયોજિતસ્તઃ પ્રાણૈરુપેત્ય યમસાદનમ્

દુર્જયાન્નરકાન્ભુંક્ત્વા ગૃધ્રોઽભૂદ્વિજને વને ।
ભગંદરેણ રોગેણ સાપિ હિત્વા વરાં તનુમ્

ઉપેત્ય નરકાન્ઘોરાન્જજ્ઞે તત્ર વને શુકી ।
કણાનાદાતુકામાં તાં સંચરંતીમિતસ્તતઃ

વિદદાર નખૈસ્તીક્ષ્ણૈર્ગૃધ્રો વૈરમનુસ્મરન્ ।
નૃકપાલે પયઃ પૂર્ણે નિપતંતીં તતઃ શુકીમ્

અભિદુદ્રાવ ગૃધ્રોઽપિ નિજઘ્ને સ ચ જાલિકૈઃ ।
પત્નીવિયોજિતા પ્રાણૈર્નૃકપાલજલે તતઃ

તત્રૈવ નિમમજ્જા સા વેત્યક્રૂરતરઃ ખગઃ ।
પિતૃલોકં પ્રપેદાતે નીતૌ તૌ યમકિંકરૈઃ ।
પ્રાક્કૃતં દુષ્કૃતં કર્મ સ્મરંતૌ ભયભાગિનૌ

તતો યમઃ સમાલોક્ય તયોઃ કર્મ જુગુપ્સિતમ્ ।
અકસ્માદેવતત્સ્નાનાન્મરણે સુકૃતં મહત્

અનુજજ્ઞે તતો લોકમીપ્સિતં ગંતુમેતયોઃ ।
મહાપાતકસંઘાતૈરપિ દુર્દ્ધર્ષમાનસૌ

તતોવિસ્મયમાપન્નૌ સ્મૃત્વા તૌ દુષ્કૃતં નિજમ્ ।
ઉપેત્ય પ્રણતૌ ભૂત્વા વૈવસ્વતમપૃચ્છતામ્

સંચિતં દુષ્કૃતં પૂર્વમાવાભ્યામપિ ગર્હિતમ્ ।
લોકાનામીપ્સિતાનાં તુ કો હેતુસ્તદ્વદસ્વ નૌ

એવમુક્તસ્તતસ્તાભ્યામાહ વૈવસ્વતો વચઃ ।
આસીદ્ગંગાતટે નામ્ના બટુર્બ્રહ્મવિદુત્તમઃ

એકાકી નિર્મમઃ શાંતો વીતરાગો વિમત્સરઃ ।
ગીતાનાં પંચમાધ્યાયમાવર્ત્તયતિ સર્વદા

તેન પુણ્યેન પૂતાત્મા બુદ્ધ્વા બ્રહ્મ સનાતનમ્ ।
પાપીયાનપિ યં શ્રુત્વા તનુમુત્સૃષ્ટવાનસૌ

નિર્મલીકૃતદેહસ્ય ગીતાભિર્ભાવિતાત્મનઃ ।
તત્કપાલજલં પ્રાપ્ય યુવાં યાતૌ પવિત્રતામ્

તદ્ગચ્છતં યુવાં લોકાન્મનોરથપથિસ્થિતાન્ ।
ગીતાનાં પંચમાધ્યાયમાહાત્મ્યેન પવિત્રિતૌ

એવં તૌ બોધિતૌ તેન મુદિતૌ સમવર્તિના ।
વ્યોમયાનં સમારુહ્ય જગ્મતુર્વૈષ્ણવં પદમ્

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખંડે ગીતામાહાત્મ્યે એકોનાશીત્યધિકશતતમોઽધ્યાયઃ