પદ્મ પુરાણ · અધ્યાય 6.169

મહેશ ઉવાચ।
તતઃપરં દેવનદી વાર્ત્રઘ્ની સંગમાત્કિલ ।
પ્રવિષ્ટા ભદ્રયા સાર્દ્ધં સાગરં વરુણાલયમ્

સમુદ્રોઽપિ તયા તાવદાગમ્ય પ્રિયકામ્યયા ।
સાભ્રમત્યાનુરાગેણ કૃતવાન્પ્રિયમેલનમ્

ભદ્રા વાપિ સુભદ્રા યા વયસ્યા સા નદી પુરા ।
સહાયમકરોન્માર્ગે સાક્ષાત્શ્રીરૂપધારિણી

તયોસ્તુસંગમઃ પુણ્યઃ સાગરસ્યોત્તરે તટે ।
તત્ર તીર્થે નરઃ સ્નાત્વા મૃષ્ટં વારિ દદાતિ યઃ

નમસ્કૃત્ય વરાહાય વારુણં સ્થાનમાપ્નુયાત્ ।
પ્રવિશ્ય ભગવાન્વિષ્ણુસ્તેન માર્ગેણ સાગરમ્

જિત્વા વૈ દાનવાન્સર્વાન્દેવાનાં પરિપંથિનઃ ।
દેવો યજ્ઞવરાહશ્ચ સંક્ષોભ્ય મકરાલયમ્ ।
ક્રીડિત્વા સુચિરં કાલં કર્દમાલેન નિર્યયૌ

પાર્વત્યુવાચ।
દેવ યજ્ઞવરાહસ્ય સાભ્રમત્યાં પ્રવેશનમ્ ।
નિર્ગમં કર્દમાલેન બ્રૂહિ ત્વં મમ વિસ્તરાત્

મહાદેવ ઉવાચ।
અંતર્ભૂ ક્રીડિતમિદં વરાહસ્ય હરેઃ પુરા ।
તત્સર્વં કથયિષ્યામિ શૃણુ ત્વં નગનંદિનિ

યોઽયં વૈ ભગવાન્સાક્ષાદ્ધૃતવાન્સૂકરં વપુઃ ।
દેવાનાં કાર્યસિદ્ધ્યર્થં રૂપં ધૃત્વા સુરેશ્વરઃ

ધૃત્વા વૈ પૃથિવીં દેવીં નિર્ગતઃ કર્દમાલયમ્ ।
તત્ર તીર્થં મહજ્જાતં વરાહાખ્યં તુ સુંદરિ

તત્ર સ્નાતિ નરો યસ્તુ મુક્તિભાક્સ ન સંશયઃ ।
અત્ર શ્રાદ્ધં પ્રકુર્વીત પિતૄણાં મુક્તિહેતવે ।
વિમુક્તસ્તૈઃ સમં લોકં પ્રયાતિ સુખદં મહત્

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તર।
ખંડે વારાહતીર્થંનામૈકોનસપ્તત્યધિકશતતમોઽધ્યાયઃ